AITANGISIHA 5
5
Na suriha raha
1Igê na tangiana ni suriha raha na enoni koro ki page takotako togo,
matena i rêra i maata na ani ga hagamamasiaga apena
ma ka memarabe renigi na tagaraha raha iana.
2Ngaira ka page konetenia, matena ga bâsia i tahitahi.
Ngaira ka page tatata ma ka page bubununuga ngavê.
3Ngaira ka page tangahurira renigi na bagatauhata
ma ka page kasikasigi na obata, suria ga anumanuma.
Ngaira ka page hetamatamasi, ka vivi:
4“Na mane ga rurusia ea ngekana, ga vi ma viga mehagaru.
Igia ka beka ngavê!
Igia ka vi ma, vi na tauhana ki râ bekabekaga
ma na matena i me igia ka pe hagahigasia.
5Ma ke bâ! I ngekê ngaia ki na hitangita o karena marena God
ma ki nahunia na atohana i berarogata na kariana God.
6Igia hete kaniga hagatasia na tara ni monariha.
Na arito ni ogaha koro ki pe raboa tangagia ma ki pe mavesigia.
7Igê na ogaha hagenani iaka igia ka râ suria na tara ni eraha.
Igia ka aharêvoro igê na bagamasusu raha i mareha igê na tara,
i mareha vige râ suria hete na tara na Araha i obanigia tanga.
Na eraha iaka ngekana ki erasigia ngavê.
8Manga i he kani tamanigia na paroparoha iaka?
Igia ka ageagesigi na ruruguha iaka.
Manga i he kaniga tamanigia?
9Ngaigi hato ki magahuru manga na mamaru i riri
se ta na rongoha ga rongoa ma ka hatani bonotenia ngavê.
10Na haka ki vorovoro asi igê na avoa,
ma na matena i bani arâ, ki asa vige bâ peregana
se vige vi, vi na agua i râ igê kani akana.
11Na manu ki gaha i bevoa ma ki asa vige bâbâ peregana.
Ngaia ki gaha, suria na gagahana ka kavokavo igê na roga.
Ngaia ki taritari vausi ma ki asa vige bâbâ peregana.
12Na mage ki gaha tanga na bubusikare.
Ngaia ki tarasia na rogaroga, i takutaku i muri
ma ki asa vige bâbâ peregana.
13I tagenana ma nikâ igia.
Igia ka voravora me ma hemuri ka magahuru.
Igia ka pe hagabângenia na ogaha koro.
Mareha rârâ vi na pereperegana.
Na eraha iaka ki hagamagahurugia ngavê.”
14Na takotogoha iata na enoni erataga ki manga i he?
Ngaia ki manga na momogani na go maria na roga ki ahegenigi râ.
Se i manga na robona na asi na roga raha ki tahusingenigi râ.
Se i manga na robona na gi i aheahe râ renia na roga.
Se i manga na kere takusiha i gaha me ma ki magahuru râ.
Se i manga na enoni i gâga henigo suria râ ma na tangiana gi tage.
15Ma na enoni ga hagabângenia na ogaha koro i maana God
ka gâga hagahu hete ma na Araha ki page vurira bâkoro.
God raramohaga hunia ki page marupera bâkoro.
16Ngaia ki page kasira akê
ma ki page nakagi na tarepuri bâkoro i bêta, suria ga koro teha.
Ngaia ki page anumasira
ma ki page ngahingahi pusira renia na raramohana.
17Igê na togeaganiha iana ngaia ki page tangaru
ma ki page hagatangarugi na marâ i bani hagavoragi,
hanana ga hagaitangira na merongana.
18Na otoha ka na kapa pusia na matona.
Na suriha oto iana ka na rarasê na kapa.
19Na parongana koro ngavê ka na bêata i tehateha tare.
20Na mangariaganiha raha iana ka na tatapa borahu i bani mamaniniaga.
Na ara ni marâ hato i bani hagavoragi ka page haku henia
ka meraheariha na ani ga beka ka merongasia.
21Na anina i asa vige atara ka page suhira na merongana.
I bâ manga na vaha ka mangagi na epage ga hanatenigi na mage.
22Na mangariaganiha iana ki manga na hêsigogo,
i sigohenigi na hê na rangi ka takera na merongana.
Na asi ma na ve ka page tarira ma ki asa vige hetaki.
23Na roga raha ka page ahegenira râ
manga vi ngaira ka na marusini na rê.
Na aharêngiani na ramata ki page ruhuruhua na maveta hagenani.
Na ani ga nahuni ramoha ka page vota renigi na bagatauhata.
Currently Selected:
AITANGISIHA 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific