AITANGISIHA 4
4
1Na ogaha koro i maana God ki koro teharia vige apara kare,
suria God ma na enoni ka page ama ni takusia tare nga na ogaha koro.
2Na ogaha koro i maana God
ki na hagararinga tangara na enoni, hanana ga arâ suria.
Manga i pe gâga na hagararinga ngekana, na enoni ka tangasia.
Na ogaha koro ngekana ki tehateha tare ki bê ki arâ.
Ngaia ki tongatonga renia na tarepuri ni tehanga,
suria i teharigi na ara ni korohata na enoni.
3Henaka ga rakorako na kare ni tara,
ngaira ki asa vige akê me bâkoro,
suria ngaira ka na kare ni tara nge.
Ngaira ka mangagi na vagani na apinige ga pe kanu
ma ka pe nahunigi na hunani nganganihaga igê na hakuta ninuni.
4Ngaira ka mangagi na apinige ga pe kanu na vagani.
Henaka ga papêhu sisite râ, ngaigi ki ababarere igê na roga
ma na roga raha ki bogegi,
suria ga pe nahunigi na hunani nganganihaga.
5Na arani ka babaro agani, matena ga sisite mêngagi.
Na guani ki asa vige mata.
Ga pe arari ni ngêra se vi na ta.
6Igê na tangiana ni suriha raha na kare ni tara
ka page ranganigi na bagatauhata na enata ma ka page tugurira.
Na enoni koro i meme karekare
7Na enoni ga koro i maana God ka page mamaro,
henaka ga meme karekare.
8Igia ka hagahigasira na gemêa,
mareha vi suria ga mauri arihu me noga
se vige rako na harisi iata. Mareha.
9Na gohogohoraganiha ki vi aitangisiha
ma na gemêaha ki vi na ogaha koro i maana God.
10Bâsia o Enoke.
Ngaia ki hagakoro obana God ma God ki takuia.
Ngaia ki oga i berarogata na enoni tasi
ma God ki torea vê,
11i era ma na eraha ki hagaerasia na aitangihana
se vi na hagahagaparunga ke hagatasia na atarona.
12Igia hato ka bani girara,
vi na eraha ki girara i hagamura ngavê na enoni,
hanana ngaira ka pe girara vi na ta ki koro,
henaka ngaira ka bâsia re maata.
Na teniha era ki girara i angaria na enoni koro
ma ki girara i hagaerasia ngavê na aitangihana.
13Henaka o Enoke ki pe mêri arihu ma ngaia ki bani koro teha
ma na enoni getera ka obanigi rako na harisi
tanga viga korokoro teha vikana.
14Na Araha ki obakoro renia na ogaha iana o Enoke
tahema ngaia ki hatani torea vê hura tenia na maveta erataga ngekê.
Na enoni ka girara na tarana ngekana
ma ka pe tako mataha renia.
I bâ manga vi ngaira ki asa ngavê tangara vige girara,
15vi God ki koro ma ki hetaki tangara na kariana
ma ki anumasira na ani ga hagakoro obana.
16Na enoni i koro na ogaha iata i maana God
ma ka bani me hunu,
ngaira ka hagamakira na enoni erataga ga gâga mêngara.
Na enoni na gapu haoru ga bani koro teha
ka hagamakira na gemêa erataga.
17Na enoni ni takoha mataha ka meme karekare vari,
ma na enoni era ki asa vige aitangisia
vi na tauhana na Araha ngekana
ki torera vê hanana i hagatahira.
18Ngaira ka tamasi hagaru
renia na mera iana na enoni ni takoha mataha,
ma na Araha ki sugi rurusira.
Matena ga meme, ka atani bagira mavê
ma na enoni ga bani me ka page meramarabe ma ka page makimaki tenira.
19God ki page rahutenira so ngurira i ano
ma ki asa iata vige tamasi.
Ngaia ki page ngingira manga na nunu i ngingia na ruma ki aruhuruhu.
Ngaira ka page oga igê na mamasiaganiha raha ngavê.
Na enoni ka hatani hitenira ngavê.
20Ngaira ka page tatata, matena ga arâ me tanga na suriha raha.
God ki page tamasigi na tasi iata tangara.
Na bagatauhata mareta ka page ranganira.
Currently Selected:
AITANGISIHA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific