AITANGISIHA 3
3
Na meta na ani ga toto suria God
1Na atarota na enoni ga toto suria God ka oga i rimana God
ma ki asa vige hatamigi na mamasiaganiha.
2Tangara na enoni bonobonoga ngaira ka bani me
ma na mera iata ki erataga ngavê.
3Ngaira ka magahuru panigia ma ki mareha vi na hatungina tangara.
Na enoni koro ka oga hete igê na marapeha.
4Tangara na enoni ki bâ manga vi na hagaitangiha ki tarahura,
ma ngaira ka tako togo ngavê vi ngaira ka pe meme.
5I murina na hagaitangiha abubu
ngaira ka page nahunia na marâ i koro teha ngavê,
suria God ki uhungira ma ki tarahua vi ngaira ka araria.
6Ngaia ki uhungira
manga ga hagamatarotaroa na golo renia na gi ki taranina,
ma ki aganarira manga i aganarira na enoni ga susu tanga.
7Igê na matena God ki surira na enoni koro ma ki vurira,
ngaira ka page vavata manga na gi i raboa igê na go maria.
8Ngaira ka page surira na enoni hato i maveta
ma ka page marungira.
Ma na Araha ki page Araha raha iata tare ki bê ki arâ.
9Na ani ga tako togo renia na Araha
ka page aitangisia na monariha na tauhana.
Na ani ga toto suria ka page oga igê na hetakuiha iana,
suria ngaia ki koro ma ki hetaki tangara na ani i bani atera.
Na meta na ani ga pe botage renia God
10Tangara na enoni ga pe botage renia God
ki page tarahura na hagaitangiha meni na bagaitangihata,
suria ngaira ka haritohea na Araha
ma ka ruhira na enoni ga toto suria God.
11Tanga na enoni i usitenigi na takoha mataha ma na hagaotonga koro,
na ogaha erataga ki tâtâ nanêa.
Ngaia ki nanasi hagaborâ ma ki tagara bâraha purua ma.
Na tagaraha iana ki asa vige akê me bâkoro.
12Na gete i auragia ki page tabaga
ma na kareterua ka page oga sutaga.
Na enoni ka page arangenira na raraha iaterua.
Na ogaha koro i maana God ki teha
13I babarisi na gete i gomara,
manga vi ngaia ma ki pe gamogamo rârâ.
Igê na tangiana ni suriha raha God ki page korokoro tanga
ma ngaia ki page vagevage ngavê.
14I babarisi na mane na voemavo,
suria God ki page haganahunia renia na vagevageha,
manga vi ngaia ma ki pe aharêngigi rârâ na ramata
ma ki pe mangariaga i obana tanga na Araha.
Igê na tangiana ni suriha raha ngaia ki page nahunia
na mena na totosuriha iana i teharia vige apara kare:
ngaia ka na agua i pasina na Araha God.
15Na ogaha koro i maana God
ki manga na apinige i rasirasi na guani ga koro ngavê.
Na takoha mataha ki manga na vagana na apinige
ki mauri ma ki girara i papêhu tare.
16Na kare igê na gamogamoha se na kare ni tara
ka page meme buta.
17Ma ki manga ga mauri arihu, na enoni ka page bâbâ so renira
ma ki asa vige hagahigasira, henaka ga gemêa.
18Ma ki manga ga meme buta, ngaira ka page raruni baguru
ma ka page obaera igê na tangiana ni suriha raha.
19Na hatungina tangara na kare ni tara ki eratage ngavê.
Currently Selected:
AITANGISIHA 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific