AITANGISIHA 2
2
Na takoha iata na enoni ga pe botage renia God
1Na tamasinga iata na enoni erataga ki râ tasi,
matena ga hetamatamasi so mareta, ka vivi:
‘Na mêriha iaka ki abubu ma na mamasiaganiha ki aharêsia.
Ma na matena tanga ga meme, igia ka meme ma ki asa vige tahi tenia.
I mareha rârâ vige bani rongoa me ta na enoni
vige aporo me tenia na agua iata na enoni ga bani me.
2Igia ka ata ni vora ma me.
Ma i murina ga meme, igia ki manga ga pe vora me rârâ.
Na rogaroga ni mêriha iaka ki manga na kere roborobo gi tage na gi.
Na ramoha ni takoha iaka ki manga na kere ririki na gi,
suria na bunaniaka ki tagara.
3Matena i meme na kere ririki,
na apeka ka voravora re na rahu
ma na rogaroga ni mêriha iaka ki magahuru ki voravora re na roga purua ma.
4Ki arârâ, mareha ta na enoni vige giraragi
na ataka se vi na marâ igia ga katogi.
Na mêrihaka ka riri tare mangagi na muritagani na vaha
ma ka magahuru mangagi na kârupu matena i takirigi na arito.
5Na ogaha iaka i maveta ki manga na mamaru i riri.
I asa iaka hagetage vige gavatenia na tangiana ni mera iaka.
Ngaia ngaia noga. I asa ta na enoni vige gurua akê.’
6Nika, ge vagevagesigi na marâ koro igê na ogaha iaka.
Na ta nikâ? Igia ka karekare mênga.
Ge ageagesigi na marâ ni maveta.
7Ge tono na vaini i akê na meni.
Ge monegia mareka renigi na marâ i sigini koro ngavê.
Ge ruguni na ara ni takani na mahe igê na mateni tange.
8Ge ruguni na takani na taritari hemuri ki kahu maugu
ma ke takerenigi ririhu na bêka.
9Na ta nikâ?
Igia hato ge nakagi na girarani na vagevageha iaka
i na ara ni agua. Nga hanaka ngekana!
10‘Ge hagamamasiagara na enoni matareha, henaka vi ngaira ka koro.
Ge pe hanetasira na gete na nâ se na gemêa ga gohogohuraga.
11Ngaia ma na raramohaka ke hagabângenia tangagia na ta ki oto,
suria na makumakusigana ka na nagiaveha ma.
12Ge gamorahira na enoni koro,
suria ga hagaera obaka ma ka ramonigia renia na ogaha iaka.
Ngaira ka visigia, vi igia ka aharê igê na ramata iana o Moise
ma ka erasigi na tauhata na êvarika.
13Ngaira ka vi, vi ngaira ka girara God
ma ka visira mareta vi na kariana na Araha.
14Ngaira ka urapusia na ogaha iaka.
Igia ka pe pasi bâsira na enoni vigana.
15Ngaira ka pe mangara na enoni getera.
Ngaira ka tora getera ngavê.
16Ngaira ka takusia vi igia ka erataga.
Ngaira ka makimaki tenigia manga na ae.
Ngaira ka ageagesia vi God ka na vaemata
ma ka tongesuria vi na hatongina tangara na enoni koro ka na vagevageha.
17Ga page bâsira manga vi i monari!
Naka ke bâsia na tarana i page tarahura matena ga meme!
18Manga i monari vi na enoni koro ka na kariana God,
God ki page tamanira ki hagatahira tenira na merongata.
19Hoi, ge uhungira.
Ge hagamamasiagara ngavê ma ke hagatavatavara,
hanana ge girara vi ngaira ka piringiape ma ka haritagi.
Vari ga page manga ngekana se mareha.
20Ge surira ke me igê na makiha,
suria God ki page anumasira, manga ngaira ga bani vi!’
21Nga hanana ga tako na enoni era ngegana ma na takoha iata ki pe oto.
Na eraha iata mareta ki hagagurura.
22Ngaira ka bonoani renigi na takoha pinihi iana God.
Ngaira ki asa vige naasia se vi ge tongesuria
na mena na ogaha i koro ma ki matarotaro i maana God.
23Matena God ki hagavoragia, ngaia ki pe hagavoragia tanga vige meme.
Ngaia ki hagavoragia ka manga ngaia marena hete i pe meme.
24Na mera ki râ me i maveta, suria Satana ki hengari,
ma na kariana ngaia ngaira nga kaniga page meme.
Currently Selected:
AITANGISIHA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific