AITANGISIHA 1
1
Gunahia na totosuriana God
1Igamu mu nahuni ramoha i maveta, mu barigia na otoha.
Mu takusia maninga tare na Araha.
Mu garigari takoha i pasina, hanana mu têtê viteana.
2Na ani ga pe uhungia na Araha, ngaira ka page tarahua.
Ngaia ki hagabângenia marena
tangara na ani ga hagêguritogo renia.
3Na takoha ni hagabekaniha ka voasira na enoni tenia God.
Manga igia ma ka beka ka uhungia, na raramohana ki hagamakigia.
4Na aitangisiha ki asa vige oga i pasina na enoni
i tenigi na eraha ma na tasi ki angaria.
5Na higona apu ni hagesuringa koro
ki kitenira na enoni ni hagahagaparunga,
ki usitenigi na tamasinga bekabekaga
ma ki huhura tenira na ani ga hagamamasiagara na enoni.
God ki girara erasigi na tamasinga iaka
6Na higona ni aitangisiha ki takuira na enoni
ma ki hagaitangia na enoni i tamasi erasia God,
suria God ki giraragi na aitangihaka ma na takoha iaka
ma ki rongogi na ara ni tamasinga hato iaka.
7Suria na higona iana na Araha ki raro i maveta hagenani
ma ki taugi haku na ara ni marâ hato igê, tahema,
ngaia ki aitangisigi na ara ni tamasinga iata na enoni.
8Na enoni i tamasigi na tamasinga era, ki asa iana vige oga pinihi.
Na hagaitangiha i araria ki page tarahua nga.
9Na Araha ki haharirigi maninga
na takoha iata na enoni ga pe botage renia.
Na Araha ki rongogi na ringeni na tamasinga iata,
ma ki page hagaitangira meni na bagatauhata.
10God ki kitenira na ani ga meheparapara
ma suria ngaia ki rongogi na ara ni marâ,
ngaia ki giraragi na tamasinga ngurunguru ma na hagagegeha.
11Vikê, siana kamu hagagege rârâ, suria i asa vige tamanigamu.
Siana kamu tamasigi na hagatorainga.
Na ara ni tamasinga pinihi iami ka hagaratemi.
Na enoni ni hagaparunga ki hagamesia so na atarona marena.
God ki obania na mauriha mareha vi na mera
12Siana kamu hagaratena na mera
renigi na bagaparongami se renigi na bagatauhami.
13God ki pe hagavorea na mera ma ki pe vagevage,
matena ga meme na ani i hagavorara.
14Ngaia ki hagavorara na ara ni marâ hato, hanana viga gâga hagahu.
Na ara ni marâ i hagavorara ka komaga ma ka korokoro.
I mareha rârâ ta na marâ i pasita vige hagamesira.
Mareha, na mera ki pe marungia na maveta ikê,
15suria na otoha iana God ki asa vige page me.
16Na enoni ga pe botage renia God ka hagarateta mareta
renia na mera meni na tamasinga iata ma na bagatauhata.
Na mera ki bara i na aitangihata manga vi ngaia ki na rokota.
Ngaira ma na mera ka suruheri nga.
Na tarana i ararira ngekana!
Currently Selected:
AITANGISIHA 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific