AITANGISIHA 14
14
1I tagenana ma tanga na enoni i nanê
vi arâ igê na haka igê na asi era.
Ngaia ki avarasia ta bogona na apinige,
i pe gatagata manga na haka i sugi arâ igê.
2Ta na enoni ki takusia na haka,
suria i tangasia na hagavarahagi haga,
ma na mane i manisingenia na tagaraha ni haka ngaia ki tagarahia.
3Ma ti ki hagaotoa na haka?
Igo nga God vaemamami kanigo girara, ma ko anumasia.
Igo nga kanigo bêngenia bâkoro na haka igê na asi era.
Na enoni ka girara ga arâ igê na haka,
4henaka ga pe manisingenia rârâ,
suria igo ko girara go hagatahira tenia na ani mavê na perenga.
5Igo ko pe obania, vi na marâ i tagarahigi na takoha mataha iamu
vige gâga purua ma.
Tahema na enoni ka girara ga hagêguria na bahitana na apinige.
Ngaira ka arâ i asi ma ka atata râ bâkoro ma.
6Nga hanana i nago kerevê noga ngekana igê na matena
ga meme igê na enoni paroparo, ga borahu ma ka ramo.
Na manavana na maveta ki ruku igê na haka ma ki tahi,
suria go hagaotoa,
ma ki vora re na hunana na apaparaha haoru ninuni i maveta ki bê ki arâ.
7God ki koro tanga na apinige na haka iana o Noa,
suria i hagatahira na enoni ga koro i maana
8ma ki kitenia ngavê na nununa na ataro na marâ ga tagarahia na enoni.
Ngaia ki kitenia nikâ na ani i tagarahia,
suria i tagarahia na marâ i girara i magahuru râ
ma ki vi, vi na ataro.
9God ki kitenira tagenata na enoni ga erataga henigi na eraha iata.
10Ngaia ki hagaitangira tagenata na marâ ga tagarahigi na enoni
ma ngaira ka tagarahigi.
11Vikana God ki page hagaitangigi na nununi na ataro iata na enoni ahuroto.
Henaka ngaira ka tagarahigi renigi na marâ God i hagavoragi.
Ngaigi ki vora re na marâ God i kitinigi ngavê
ma ka uhungigi na atarota na enoni
ma ka hagatasira na enoni ga tako bekabekaga.
Na hunana na vogasiha ni ataro
12Igê nga na matena na enoni ka haganega ka tagarahigi igê na nunuta na ataro,
ngaira ka haganega ka paronga iera.
Na tagarahiana ni nununi ataro
ngaia nga ka na hunana na hagaerasiana na ogaha iata na enoni.
13Ngaigi ki pe bani oga me i kerevê noga
ma ki asa vige oga tare.
14Na paroparoha iata na enoni kaniga hagavoregi.
Tahema na hatongita ki pe arihu.
15Ta na mane ma ki angisia bâraha na karena i meme buna.
Vikê ngaia ki tahetahe nununa na karena
i pe bani hinarua vige meme tenia.
Ngaia ki hagahigasia na enoni i me,
ki katoa manga vi ngaia ka na ataro.
Ngaia ki hagatarêngenigi na tarani ni vogasiha ma ni hagarahenga
tangara na enoni i ruguhana.
16Ki arârâ ma na tauhana erataga ngekana
ki akê me ki gatagata ngavê ma ki tongatonga re ramata.
Vikê na enoni ga nahuni ramoha ka bonasira na enoni getera
ka vogasigi na nununi ga visigi vi na ataro.
17Matena na enoni ka obania bâraha viga hagahigasia na maneraha iata,
ma ki bara tangara suria ga oga hagatê tenia,
ngaira ka takusia râ ma vi manga i he ki bâ,
ma ka tagarahia na nununa ki bâbâ manga ngaia.
Vikana ngaira ka girara ga hagahigasia na maneraha iata
i pe oga nga i pasita, manga vi ngaia ki oga i pasita.
18Na enoni ga tagarahigi na nununa na maneraha
ka metogeaga na vogasiha ni maneraha i berarogata na enoni,
henaka na enoni ka pe hagarea na maneraha.
19Na enoni ga manisingenia na tahenga
ka tagarahigi bâkoro ngavê na nununa na maneraha
teharia manga hanana i bâ na maneraha,
suria ga obania viga hagakoro obana na maneraha.
20Hemuri na enoni ga hagahigasia i nago na maneraha,
ka kahu rahesia, suria na bâkorohana na nununa ki hagamura.
21Na ogaha iata na enoni ka tu igê na tarana ngekana.
Na enoni ga mamasiaga renigi na bagabevoani,
se renia na maneraha ki hagamamasiagara,
ngaira ka toregi na hê se na bogoni na apinige
ma ka vivi, vi God kani ngaigi.
Na vogasiha ni ataro ki hagavoregi na eraha
22Na tarana gi tage i hagarate.
Na aitangisiha iata renia God ki râ tasi.
Ma nikâ ngaira ka oga igê na hearihatana ni eraha.
Ma suria ngaira ka pe hagarea, ngaira ka vi ma,
vi na hearihatana ni eraha ka na marapeha.
23Igê na hagarahenga ngaira ka nahuira ka meme na kere kare.
Ngaira ka pinihigi na hagarahenga iata tenira na enoni getera.
Igê na hagarahenga iata ngaira ka totono papasi
ma ka atani paronga era mavê.
24Na eraha ki aharêsia na ogaha iata.
Ngaira ki asa vige hagahigasia rârâ na êragiha iata.
Ta na mane ki hagabekasia ta na mane ki nahuia ki meme
se ki hagaera obana suria i memêru kaniana.
25I mareha rârâ ta na marâ, nga noga ma na nahunga ninuni,
ka hanago, ka hagahagaparu, ka vatevate, ka pe toto hesuri,
ka katogi na perenga, ka tohe vero,
26ka hagamamasiagara na enoni koro,
ka pe visira koro na enoni ga koro tangara,
ka aharêngigi na ramata hato,
na mane ka paronga era henira na mane, ma na gete henira na gete,
ka hekasigi, ka gamogamo,
ma ka katogi na ani mavê na tarani ga era.
27Na vogasiha ni ataro, henaka ga pe gâga
ngaia ki na haganegahani, na hatongini, na hunani
ma na guani na ara ni eraha hato.
28Na enoni ga rahesira na ataro ka vagevage bekabekaga ngavê
se ka tamasi poropete ma ka hagaparu ma,
se i erataga na ogaha iata,
se ga atani tohetohe vero râ nga.
29Suria ga hagarapera na nunuta na ataro, ga pe nahuni mêriha,
tahema ngaira ka pe rarunia na hagaitangiha meni na tohenga vero iata.
30Henaka, ma i ta na matena na hagaitangiha ki page tarahura
surirerua na tarani gi rua.
Na ani gi tage: na takoha iata renia God ki râ tasi,
suria ngaira ka hagarapera na ataro.
Ma na ruata: ngaira ka hagahagabeka ma ka tohetohe vero,
suria ga pe hagahigasigi rârâ na marâ ga apuna.
31Mareha vi na ramoha iana na marâ ga tohe renia
ma na hagaitangiha hete i ararira na enoni tasi
kani page tarahura na enoni erataga.
Currently Selected:
AITANGISIHA 14: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific