AITANGISIHA 15
15
Na Isiraelita ka pe hagarapera na ataro
1Igo God iamami, igo ko koro, ko pe hagaparu, ko haritagi
ma ko marungira na ara ni marâ hato igê na hetakiha.
2Henaka vigami tasitasi, igami ka na animu,
suria igami kami pe hagaiga na raramohamu.
Igami kami pe obania vigami tasitasi,
suria igami ka na animu.
3Na aitangisiha renigo ka na ogaha koro teha.
Na aganariana na raramohamu ka na hunana na mêriha hagahu.
4I mareha rârâ ta na takoha hagahagaparu iata na enoni
vige hagatasigami,
se vi na marâ purua ga supurugi na enoni,
se vi na nununa totoperega na ataro.
5Manga na enoni i tako bekabekaga ma ki bâsigi,
na teniha ga angaria ma ngaia ki tangasia na nununa
i pe nahunia na atarona se na mêriha.
6Na enoni i tagarahia na marâ ngekana,
se i angisia, se i rahesia,
ngaia ki takuia na eraha ma ki tarahua na marâ i araria.
Na hagarapeana ni ataro ka na bekabekaganiha
7Takusia na mane i manisingenia
i tagarahigi na marâ renia na mako.
Ngaia ki tagara raha ki pigania na mako ki marumu.
Ngaia ki hagatotogi na marâ igia ga obanigi renia.
Renia na mako nga ngekana ngaia ki hagatotogi re
na marâ ni hagamako ngêra igê, se na apira ma na kâkâ
ma nikâ na marâ tangagi na tarani getigi.
Na tagaraha iana ni hagatotoha ki tagenana tarema.
Ma ngaia marena ki hagakitakitagi
vi na anita na marâ kani araria na anita na tarana.
8Ngaia ki na enoni ma.
Ngaia ki vora me tenia na mako i pe arihu râ,
ki page arihu ma ngaia ki aporo igê na mako,
matena God ki unia aporo na rogaroga ni mêriha
i vatea renia.
Ngaia ka na enoni ma.
Ngaia ki tagara raha ki hagatotoa na ataro
i asa vige katoa ta na marâ,
renia nga na mako,
i hagatotogi re na apira ma na marâ vigana.
9Ngaia ki pe tako renia vi na mêrihana ki abubu
ma ki sugia ma vige meme. Mareha!
Ma na marâ ma i tako bâraha renia, ngaia ki hehanehane
henira na ani ga hagatotogi na marâ
renigi na golo, na siliva ma na kapa.
Ngaia ki ageagesigi ngavê na marâ i tagarahigi.
Ngaigi ka mareha vi na morani,
suria ngaia ki tagara hesuri ma renia na mako.
10Na aitangihana ki manga na rahu ma.
Na marâ i rarunia ki vora re na marâ purua
teharia na momo se na makomako.
Na mêriha iana ki pe teharia na mako,
11suria ngaia ki pe hagarea rârâ God i hagatotoa
ma ki uhia na rogaroga ni mêriha na atarona igê na apena.
12Ngaia ki takusia ma, vi na mêrihana na enoni
ka na marâ ni barebareana ma,
se vi na agua ni hohoronga tanga na hagavarahagi haga.
Ngaia ki hagêguria, vi na tagaraha iana nga kani hagavarahagi haga,
naka ma i he, henaka na tarani ga era.
13Na mane ngekana i tagarahigi na nunuta na ataro
ma na apira ma na marâ vigana renia nga na mako ngekana,
ngaia ki girara ngavê teharira na enoni getera
vi ngaia ki tasi.
Na ai ni Esipito ka hagarapera na ataro
14Na enoni ga tako bekabekaga ngavê teharira na kare gari,
ngaira ka na ani ga merongasira ma ka hagamamasiagara na kariamu, Araha.
15Ngaira ka takusia, vi na nunuta na ataro iata
ga rahesira na enoni ahuroto, kani vi na ataro iata nogata,
henaka i asa vige bâbâ renigi na maata,
se vigo hengohengo i barisuta,
se vige rongorongo renigi na karingata,
se vige hatamigi renigi na kakêni rimata,
se vige arârâ renigi na êgata.
16Vigana, suria ta na mane i enoni ma
ma ki pe nahuni mêrihana marena,
kani tagarahigi ma ki hagatotogi.
I asa ta na enoni ge girara
vige hagatotoa na ataro ke maratorana na enoni.
17Na ara ni enoni ki page meme i ta na matena,
ma na marâ i hagatotoa renigi na rimana erataga
ki bani me igê na haganegahana.
Ngaia marena ki tagarahigi na marâ i hagarapegi,
suria ngaia ki nahuni mêriha,
ma na marâ i hagarapegi ka mareha,
ma ki mareha hagetage vige bani nahunia me na mêriha.
18Na enoni ngegana ka hagarapera na marâ mamauri
ga bera ngavê ma ka pe nahuni takoha rârâ.
19Nikâ ngaira ka pe bâkoro, hanana vi na enoni ke obanira
mangara na ani getera God i visira viga bâkoro
ma ki pe hagaitangira.
Currently Selected:
AITANGISIHA 15: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific