AITANGISIHA 13
13
Na vogasiha ni ataro ki râ bekabekaga
1Na enoni ga pe hagarea God ngaira ka beka ngavê.
Henaka ga bâsigi na marâ koro rihira,
na enoni ngegana ki asa vige tahetara vi God ki gâga.
Henaka ngaira ka hagesuringenigi na marâ God i hagavoregi,
ngaira ka pe tahetara vi na ani i hagavoragi ki goga.
2Ngaira ka takusia ma, vi na gi, se vi na roga, se vi na roga raha,
se vi na higu, se vi na ve oto, se vi na marâ ga mave i vavearo
ka na ataro ga marungia na maveta.
3Suria na enoni ka gahe surigi na bâkorohani na marâ ngegana,
tahema ngaira ka takusia ma, vi ngaira ka na ataro
ma ka pe tahetara hete renia na Araha, na Avanuni,
i teharigi ngaigi hato haku,
suria ngaia ki hagavoragi henigi na bâkorohani.
4Suria na enoni ka konetenigi
na ramoha ma na tagaraha iani na marâ ngegana,
ki ararira hete vige girara
vi na ani hagavoragi ki ramo teharigi ngaigi.
5Manga vi igia ma ke hagakitakitagi na hahanetagani
ma na bâkorohani na marâ God i hagavoragi,
igia ke kahu girara vi ngaia nga God kani hagavoragi.
6Henaka vikana, ma siana igia ka visira bâraha na enoni ngegana.
Vari ngaira ka hagatasia na tara,
matena ga uhungia maninga viga garia God,
ma ki bara tangara vige tarahua.
7Matena ga hahutugigi na tagaraha iana God rihira,
na bâkorohani ka hagatasira
ma ka katora ka takusigi vi na ataro kani ngaigi.
8Henaka, ma ngaira ka tasi.
9Ngaira ka girara ga hagesuringenigi na marâ hato ga goga
ma ka girara ga hahutugia na maveta.
Tanu hega kaniga pe tarahua
na Araha iani na marâ hato?
10Tani na enoni ka nagia ve ngavê,
suria ga tako togo renigi na marâ ga pe nahuni mêriha.
Ngaira ka rahesigi na marâ ga tahegi bâkoro na enoni, ka
taruhigi renigi na golo ma na siliva, ka vi vi ngaigi ka na ataro:
na nunuta na puruka ma na marâ vigana,
se na hê purua i tahea ta na enoni i kerevê râ.
11Bâsia na mane i manisingenia i tagarahigi na apinige.
Ngaia ki tapia so na apinige koro ma ki gaia maninga na gavona.
Hemuri ngaia ki tagarahia maninga renia ta na marâ i araria na mêriha.
12Na asitarigani ngaigi ka na ario iana i hagamako renigi na ngêra.
Hemuri ngaia ki gâga so ki ngêngê masu.
13I berarogani vari tagua ki gâga ma ki pe araria ta na marâ,
suria i ahiohio se i boroboroga.
Ngaia ki torea ma ki tahea haharitagi igê na matena i pe aruma igê.
Matena i nahunia na matora, ngaia ki tahea
ki nununia igê na enoni,
14se igê ta na marâ purua mamauri.
Ngaia ki taruhia renia na puara memera,
hanana ga magahuru na agua ga bera.
15Hemuri ngaia ki tagarahia na kere ruma sisite tanga
ki naka igê na apê ma ki rapusia râ igê renigi na nila.
16Ngaia ki naka maninga, hanana siana ki votavota,
suria i girara, vi na marâ ngekana
ki pe girara ge tamania so marena.
Tahema ngaia ki tamania, suria ngaia ka na nununa ma.
17Henaka, ma ngaia ki pe maki vige avarasia na marâ i pe nahuni mêriha ngekana
tanga na êragiha iana tangara na karena ma tangagi na nahuninga iana.
18Ngaia ki avarasia na marâ i pe nahuni ramoha ngekana tanga na apekoroha.
Ngaia ki avarasia na marâ i me ngekana renia na mêriha.
Ngaia ki avarasia na marâ purua ngavê.
Henaka ngaia ki na marâ i asa vige arârâ,
ma ngaia ki avarasia vi akê me maninga na râha iana.
19Na marâ i pe nahuni ramoha rârâ rimana,
ma ngaia ki avarasia,
hanana ga tavoraha bâkoro na tagaraha ni haga iana,
na nahuninga iana ma na tagaraha iana.
Currently Selected:
AITANGISIHA 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific