AITANGISIHA 12
12
1Na rogaroga ni mêriha iamu i asa vige page me
ki oga i pasita na ara ni marâ hato.
2Tahema igo ko piringiape henira na ani ga bagatauhata,
matena go hagaitangira.
Igo ko hagatakusira renigi na bagatauhata
ma ko ramonira, hanana viga urisi parongata
ma ka hagêguritogo renigo, Araha.
Na hagaitangiha tangara na ai ni Kanani
3-4Igo ko kitenira na enoni ga ogasia i nago
na agua go atea tangago maremu,
suria ga bagatauhata ngavê.
Ngaira ka hemare ma ka hagarapera na ataro.
5Ngaira ka na enoni ni nahunga ni kere kare
ma ki asa vige takira.
Ngaira ka magoto renigi na angeta, na hasigota
ma na gaputa na enoni.
Ngaira ka na haku na enoni ga rahesia ta na ataro
igê na tarana i erataga ngavê ma ki pinihi tenira na enoni getera.
6Na enani kare ngegana ka nahuira ka me ne kere kare sisite iata.
Tahema igo ko katora na êvarimami ka mutera na enoni ngegana,
7hanana na agua go takuia teharigi na ani getigi na agua
ki na agua i hagagara koro tangara na kariamu, na karemu God.
8Henaka, ma igo ko takira na enoni ngegana,
suria ngaira ka na enoni ma.
Igo ko hagatorangenira na mamanivo pageva
ka nanago tarata na mane ni me iamu,
hanana ga hagamesira haharitagi.
9I arari ma vigu nakara na enoni ga tê viteamu
ke meraheariha, ke mutera na enoni erataga ngegana.
I arari ma vigu hagamagahurura ototo râ nga
renira na marâ vasiga ga garagara,
se renia na bonasiha ramo gi tage ma.
10Ma ki mareha. Igo ko hagaitangira haharitagi hete,
hanana vi ngaira ke nahunia na matena ge urisi parongata igê,
henaka go bani girara, vi ngaira ka râ me
tenia na raraha i bani erataga me,
ma vi ngaira ka bani erataga me matena ga vora me
ma ki asa hagetage vige urisi parongata.
11Henaka vi ngaira ka bani erataga me i nago kerevê noga
ma ke ararigo ma vigu hagaitangira,
igo ko pe hagaitangira meni na bagatauhata,
ma ki mareha vi suria go magutenia ta na enoni.
12Igo ko hagavorara na enoni eratage ngegana
ma ki asa ta na enoni vige girara ge rohe pusira
se vige vi, vi i pe oto tangago vigu mutera.
Ti ki girara i vivi: “Na ta kanigo katoa?
Tanu hega kanigo hagaitangira vikana?”
13Igo gitage ma ko God.
I mareha tani râ nikâ vige marupera na enoni hato,
hanana ge ararigo vigu hagatanga monari tanga,
vi na suriha iamu ki oto
14I mareha rârâ ta na maneraha se vi na ani i nahuni ramoha i maveta
vige girara ge ramonigo,
suria vigo hagaitangira purupuru na enoni ngegana.
15Igo nga kani oto na parongamu
ma ko marungira na ara ni marâ igê na otoha.
Igo ko vi, vi i pe oto tangago,
vigu hagaitangia na enoni i pe araria na hagaitangiha
suria ma vi igo ko nahuni ramoha.
16Na ramoha iamu ka na hunana na otoha.
Igo ko girara go takira na enoni hato,
suria igo nga ka na Araha iata ngaira hato.
17Igo ko hagabângenia na ramoha iamu tangara na enoni
ga pe tongesuria vi na ramoha iamu ki teha,
ma ko hagaitangira na enoni ga girara na ramoha iamu
ma ka pe botage renia.
18Henaka na ramoha iamu ki teha,
ma igo ko hetaki matena go surira na enoni.
Henaka go nahuni ramoha hanana vigu hagaitangigami
ma igê na anima na matena go obania,
ma igê na piringiapeha hete igo ko marungigami.
19Renigi na tauhamu vigana igo ko bani hagesurira na kariamu,
vi na enoni koro ki tuguhia,
vi korokoro nikâ tangara na enoni getera.
Igo ko haganahunira na kariamu renia na hagêguringa togo i raha,
suria go naka na matena tangara, hanana ga urisi parongata.
20Igo ko hagatogo ma ko piringiape
matena go hagaitangira na merongata na kariamu.
Henaka i ararira viga meme,
ma igo ko nakagi na matena ma na matora tangara,
hanana viga kasigi râ igê na bagatauhata.
21Ma tangagami igami na tauhamu vikana ki raha teha ngavê,
matena go surigami igami na kariamu,
suria go naka na suruheri henira na êvarimami,
ma ko tohe vigo haganahunira renigi rako na marâ koro.
22Matena go hagaitangigami hagarari,
igo ko hagaitangira akê nga na merongamami,
hanana mi takusia na korohamu tangagami,
matena mi surira na enoni getera,
ma hanana mi naasia na hetakiha matena ga surigami.
Na hagaitangiha tangara na ai ni Esipito
23Tahema igo ko hagamamasiagara na enoni
ga tako bekabekaga ma ka bagatauhata.
Igo ko hagamamasiagara renira nga na marâ ga rahesira.
24Ngaira ka tarupe ngavê ma ka hagatasia ngavê na monariha,
suria ga rahesira na marâ ga bera ngavê, ga vi vi na ataro iata.
Ngaira ka tasi mangara na kere kare ga pe nahuni takoha koro.
25Vikana igo ko hagaitangira mangara na kare
ga pe nahuni takoha koro renia na hagaitangiha ki hagamakira.
26Ngaia ka na kere hagaitangiha râ ma.
Ma na enoni ga pe botage renigi na haganununga vigana,
ki ararira viga hatamia, i higahiga ngavê tangara na hagaitangiha
i araria God vi vatera renia.
27Matena na marâ bera ngegana ga visira re vi na ataro iata
ka hagamamasiagara ma ka hagaitangira,
ngaira ka pe rarunitogo renira ma ka kahu tahetara,
vi na ani ga bani usitenia me vige girara,
ngaia nga kani God monari.
Tahema na hagaitangiha i tarahura ki higa teha ngavê.
Currently Selected:
AITANGISIHA 12: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific