AITANGISIHA 11
11
1Na takoha mataha ki katora na Isiraelita
ka akê me bâkoro renia na poropete iana God.
2Ngaira ka aharêvoro igê na bagamasusu raha i hihiruga
ma ka tênga surigi na agua
i mareha rârâ vige bani oga me igê na enoni.
3Ngaira ka ura gatagata pusira na merongata
ma ka sugarira bê aporo.
4Matena na kariamu ki mamata na riota,
ngaira ka avarasigo Araha,
ma igo ko hagatunomira renia na ve i gogo me tenia na hêmeo.
Na hagaitangiha tangara na ai ni Esipito
5Na bagabevoani ga hagaitangira na ai ni Esipito
ka hagatahira na kariamu tenigi na mamasiaganiha iata.
6-8Suria na merongata ngegana ka haribona
vige nahuira ka meme na kareta na kariamu,
igo ko katoa na ve oto ki amera renia na gapu mapuaga.
Igê na bagamasusu raha igo ko naka ki mamata na riota na kariamu,
hanana go hagagirarara, vi manga i he ko hagaitangira na merongata.
Hemuri igo ko vatera renigi rako na ve,
matena ngaira ka pe rarunia.
9Matena go uhungira ma ko hagaotora igê na hetakiha iamu,
ngaira ka tahetara renia na mamasiaganiha,
i tarahura na enoni erataga,
matena go surira igê na mangariaganiha iamu.
10Igo ko uhungira na kariamu
manga o vaema ni kare i uhungira ma ki hagaotora.
Ma igo ko surira na merongata ma ko hagaitangira
manga na maneraha i asa vige hetaki.
11Henaka ngaira ka hagatê se hagarangi
ma ngaira ka mamasiaga.
12Na mamasiaganiha iata ki akê me raha ngavê
ma ngaira ka gegege ngavê,
matena ga takusia aporo na tarana i bani akê me i nago.
13Matena ga girara, vi na hagaitangiha tangara
ki tamanira na kariamu,
ngaira ka tahetara, vi ngaia ka na tagaraha iamu, Araha.
14I nago na ai ni Esipito ka usitenia ma ka memarabe
na mane ga kasia i ve, matena i merameraga mênga,
ki rârâ ma ngaira ka konetenia.
Ngaira ki mamata na riota
ma ki tora hegitigi tenia na anita na enoni ga tê viteana God.
15Suria ngaira ka erataga, tahema ngaira ka tako bekabekaga.
Vikê ngaira ka hagarapera na ma ma na ani getera na marâ bera
ga angoango ma ka pe nahuni ramoha ni takoha.
Tahema igo ko hagaitangira renigi na bera na marâ vigana.
16Igê na tarana ngekana igo ko hagesurira,
vi na marâ i hagatasira na enoni
ki hagaitangira nogata nikâ meni na tasi iata.
17Araha, suria go raramohaga hunigo, igo ko hagavora na maveta
renia na marâ i pe tonga nununa.
I arari ma vigu hagaitangira na enoni ngegana
renira rako na o vasiga se na laione garagara ga ngasira.
18I arari ma vigu hagavorara na ani haoru na marâ vasiga,
ga mangaringari ngavê, ka manavasotenia na gi,
se ga ngurunguru, se ga hengohengo mapuaga
se ga bâbâ mamagutaga, suria ga ririki na maata.
19I arari ma vigu hagavorara na marâ vigana,
mareha vige taharira na enoni ngegana ke nahuira ke meme,
ma ke hagabubununugara, ka meme renia ga bâ mamagutaga ngavê.
20Henaka, ma igo ki mareha.
I arari ma vigu hagamesira
renia na kere uhinga gi tage na otoha i tarigenira,
se vi renia na uhinga na raramohamu i hitarira so.
Ma igo ki mareha, suria igo ko hagagaragi na arâ ni marâ
igê na hagevovoani, igê vi gi hita ma igê na higahigani.
God ki raramohaga ma ki piringiape
21Araha, igo ko girara go hagabângenia na raramohamu raha
igê na ani mavê na matena go obania,
ma ki mareha ta na enoni ge girara vige rêrâ pusia.
22Tangago igo, na maveta hagenani ki manga ma na kere momo,
i pe higea vato na marâ ga hagararigi igê na higahigani,
se i manga na êsusu na kârupu i ano igê na mavoraro.
23Henaka, vi suria go raramohaga hunigo,
ma igo ko takira hete na enoni hato.
Igo ko pe takusigi na tasi iata,
suria go obanira viga urisi parongata.
24Igo ko takuira na ara ni marâ ga oga.
Igo ko pe ruhira na marâ go hagavorara.
Manga gu ruhia ta na marâ,
vikê igo ki asa vigu hagavora.
25Manga i he ta na marâ ki girara vi gâga tare,
manga vi igo ma ko pe obania?
Manga i he ta na marâ ki girara vi gâga tare,
manga vi igo ma ko pe hagavora?
26Igo ko nakara na marâ hato ka oga,
suria ka na animu, Araha,
ma ko takuira na ara ni marâ ga mauri.
Currently Selected:
AITANGISIHA 11: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific