TOBITI 13
13
Na ki ni hagarahasiha iana o Tobiti
1O Tobiti ki hagarahasia God vikê:
“Ge hagarahasia God i gâga hagahu.
Na arahanga iana ki asa vige page hato.
2Ngaia ki hagaitangigia ma ki takigia.
Ngaia ki kasira so na enoni igê na anoano
ma ki ragera akê aporo tenigi.
I asa ta na enoni vige tahi tenia na raramohana.
3Isiraelita, mu visia koro i maata na enoni
igê na agua i tokorenigia surigi.
4I ngegana nikâ ngaia ki hagabângenia igê na raramohana.
Ge hagarahasia i maata na marâ hato ga mauri,
suria ngaia ka na Araha God iaka,
na vaemaka nga tare ma tarema.
5Henaka i hagaitangigia renigi na bagatauhaka
ma ngaia ki page takigia,
hanana igia ka aporo i pasika
tenigi na agua ga oga totoko surigi.
6Manga mu aharia igê na mêrihami hagenani
ma kamu têtê viteana ma kamu tototo suria,
ngaia ki page aharigamu, hanana i tamanigamu
ma ki hato vige rumakaka renigamu.
Takusigi na korohana tangagamu
ma kamu visia koro igê na ringemi raha.
Hagarahasia na Araha ni otoha.
Hagarahasia na Araha i araha hagahu.
Henaka inê kê oga i pasita na mahuara
igê na agua ga henahurauê tanga,
inê be visia koro na Araha
ma be tamasia na raramohana raha
tangara na enoni ga pe tê viteana.
Igamu enoni tasi, mu urusi parongami
ma kamu katogi na tarani ga hagakoro obana God.
Vari ngaia ki page korokoro tangagamu
ma ki page takigamu.
7Inê be hagarahasia God iaku
ma be ageagesia na Araha God
ma be hagahigasia i mêrihaku hagenani.
8Na enoni hato ke kasia akê renia na raramohana
ma ke ki ke hagarahasia i Jerusaleme.
9Jerusaleme, hinua apuna iana God iaka,
God ki hagaitangigo meni na tasi iata na kariamu
ma ki page takira na enoni hato ga hagakoro obana.
10Vikê go visia koro maninga na Araha,
suria ngaia ki koro ngavê.
Hagarahasia God i araha tare,
haganega me kerevê noga, i rikini ki bê ki arâ,
hanana go page tagarahia aporo na ruma ni rotu iamu
ma na kariamu ka page vagevage aporo.
Na Araha ke hagakoro obata i pasimu
na kariamu hato ga bani henahuraura vê,
ma ke marupera tare ki bê ki arâ
na kariamu ga mamasiaga i pasimu.
11Jerusaleme, igo ko page mavesira
na enoni hato suria na maveta hagenani.
Na enoni tenigi rako na agua hagatê ka page hakurigo
hanana ga hagahigasia na Araha God iamu
ma ka tagarenigi na mahatanga iata tanga na Araha God.
Igê na tara ma na mahera i pasimu
na apaparaha ma na apaparaha
ka page kiki vagevage ka hagarahasigo
ma igo ko page gâga hagahu,
suria God ki atego vi igo ka na hinua iana.
12Na arangeniha ke tangara na ani hato ga merongasigo
ma tangara ngaira hato ga ruhuruhugi
ma ka hogegi na para ni hinua iamu ma na bebetehe
ma ka hagamakakagi na ruma iamu.
Ma na ani hato ga hagahigasigo
God ki page korokoro tangara hagahu.
13Jerusaleme, gu vagevage
ma ku ageagesira na kariamu i oto na parongata.
Ngaira ka page hakuhaku me i pasimu
tenigi na agua ga bani henahuraura tange,
hanana ga hagarahasia na Araha
i bani mauri me tare ki bê ki arâ.
14Ga babarisi na enoni hato ga takuigo
ma ka obakoro, suria ga oga igê na ramana.
Na ani i rugu na obata renigo i ngekê,
suria na hagitangiha ka tarahugo,
ngaira ka page vagevage i pasimu,
suria na vagevageha iamu ki page hagavagevagesira
tare ki bê ki arâ.
15Inê kê hagarahasia na Araha God raramohaga hunia,
16suria ga page tagarahigo aporo
ma ngaia ki page gâga hagahu i pasimu.
Jerusaleme, inê be vagevage,
manga vi na hitangita na raraha iaku
ma ki tahitahi mênga ki bâsia na bâbâhamu raha
ma ki visia koro na Araha God.
Na maani para na hinua iamu ka page tagarahigi
renigi na hê maravarava ma na hê maravarava rotorotoaga
ma na para ni hinua iamu
renigi na hê bâkoro i akê na meni.
Na bebetehe iamu ka page tagarahigi re na golo
ma na ruma nganganihaga iamu re na golo taranini.
17Na tara iamu ka page ririhêgi
renigi na hê ahe ma na hê getigi
ga bâkoro ma ka raha na meni.
18Na maani para ni hinua iamu ka page rararo
renigi ma na ki ni vagevageha
ma i ruma hato i pasimu
na enoni ka page ngerengere igê ka vivi:
Hagarahasia na Araha!
Hagarahasia God iata na Isiraelita!
Jerusaleme, God ki page korokoro tangara na kariamu
ma ngaira ka page hagahigasia tare na atana.”
Ikê nga na hatongina na ki iana o Tobiti i hagarahasia igê na Araha God.
Currently Selected:
TOBITI 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific