TOBITI 12
12
Na angero ki hagarongo vi o ti kani ngaia
1Matena i hato na ngêra na hagataku, o Tobiti ki unia o Tobiasi o karena ma ki vi tanga, ki vi: “O kareku, siana ko bonotenia vigo vatea na tamamu renia na mena, i râ henigo igê na râha iamu. Ma siana ko bonotenia vigo vatea akê ta na haga nikâ.”
2O Tobiasi ki hagatea o vaemana, ki vi: “Vaemaku, gi hita na haga kanigo takusia vigê vatea? Inê kê takusia vi arari ma gê vatea na apaneni na ara ni marâ mi migiaporo me henigami. 3Ngaia ki meêata aporo me bâkoro ma. Ngaia ki râ ki tora aporo na haga tangê tenia o Gabaele. Ngaia ki paia na ataro tenia kaniaku ma ki hagamaravagi na maamu. Na haga gi hita kanigê vatea akê nikâ?”
4O Tobiti ki arami, ki vi: “I oto tanga vi nahunigi na apaneni na marâ muru tage migiaporo me.”
5Hoi, o Tobiasi ki unia o Rapaele ma ki vi tanga, ki vi: “Gu tavogi na apaneni na marâ garu migiaporo me agê. I oto tangago vigo nahunigi. Go arâ purupurungiaga i pasimu.”
6Ma o Rapaele ki unirerua me getererua o Tobiti mo Tobiasi ma ki vi tangarerua, ki vi: “Muru hagarahasia God ma kamuru visia koro i maata na enoni hato renigi na korohana tangagamurua, hanana ngaira nogata ka hagahigasia ma ka hagarahasia. Hagarongora na enoni hato renigi na tauhana God. Siana ki meme na apemurua vigamuru visia koro. 7Na marâ na maneraha ki obania vi gâga pinihi, siana kamu tarohenia, ma na tauhana God ki tuguhigamu vigamu tarohenigi tangara na enoni hato, hanana ngaira ka hagarahasia ma ka hagahigasia. Muru katogi na tarani ga koro, ma vikana na eraha ki asa vige tarahugamurua.
8Manga mu nunginungi ma kamu harihari ma kamu mahata tangara na enoni matareha ma kamu ototo, ki teharia vigamu ruruguha ma kamu pe ototo. Manga mu mahata tangara na enoni matareha, ki koro teharia vigamu hakugi na golo tangagamu maremi ma. 9Na mahatanga ngekana ki hagatahigamu tenia na mera ma ki tananigi râ na tasi hato iami. Na enoni ga mahata tangara na enoni matareha ka page nahunia na mauriha mora. 10Ma na enoni ga bagaparongata ma ka bagatauhata ngaira ka hagarateta mareta.
11Inê kê bani vi tangagamu, vi siana kamu tarohenia na marâ na maneraha i obania vi gâga pinihi, ma na tauhana God ki tuguhigamu, vigamu tarohenigi tangara na enoni hato. Hoi, be hagarongamurua renia na monariha hagenani, mareha vive pinihia ta na marâ. 12Tobiti, matena igo ma ka Sara kamuru avarasia igê na Araha, inênga kanigê tagarenigi na avarasiha iamurua tanga na Araha God. Inê kê katokato vikana nikâ i na ara ni mateni go bagira igê na gahuata na enoni. 13Igê nga na tangiana go aharaga tenia na bea ni ngêra ma ko pe ngê, hanana go râ ko bagia na gahua ngekana, God ki kasiê kê uhungigo. 14Ma ngaia ki hagatorangeniê nikâ kê hagamaravagi na maamu ma kê hagatahia ka Sara ka hungâmu tenigi na mamasiaganiha ga tarahua. 15O Rapaele kani inê. Inê ka na hitangita na angero gi pi. Mi ura i maana na Araha God ma kami nanê, hanana mi tagara tanga.”
16Vikana o Tobiti mo Tobiasi karu magu ngavê, karu aba so i ano ma karu tata. 17Ma o Rapaele ki vi tangarerua, ki vi: “Siana kamuru magu. Muru haritagi ma. Muru hagarahasia tare God. 18Ngaia ki kasiê kê râ me kê tamanigamurua. Na korohana God tangagamurua kani inê gê râ me. Tahema muru hagarahasia igê na ogaha iamurua hagenani. 19Matena muru bâsiê me gê ngêngê, inê kê pe ngêngê monari. I bâ vikana ma. 20Matena muru gâga i maveta ikê, muru hagarahasia nga na Araha God ma kamuru visia koro nga. Hoi, inê kê aporo nga i pasina na ani i hagatorangeniê. Hoita, muru segegi so na ara ni marâ ga bani akê me tangagamurua.”
21Hemuri o Rapaele ki magahuru râ. O Tobiti mo Tobiasi karu ura aharaga ma karu bâ mareha renia. 22Ngairerua karu ki hagarahasia God ma karu visia koro renigi na tagaraha raha hato iana i katogi, matena na angero Rapaele ki oga henirerua.
Currently Selected:
TOBITI 12: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific