TOBITI 14
14
Garu me na enana o Tobiasi
1-2O Tobiti ki tonga na harisi tangahuru ge ono matarerua iana ma ki guru na maana. I murina garu marava aporo na maana, ngaia ki oga igê na ramana. Nikâ ngaia ki mamahata tangara na enoni matareha ma ki ama ni hagarahasia nga God ma ki ama ni kasia akê nga. O Tobiti ki me bâkoro matena i tonga na 112 na harisi iana ma ka bagia maninga i Nineve. 3Matena o Tobiti ki sugi meme noga, ngaia ki unia me o Tobiasi o karena ma ki vi tanga, ki vi: 4“O kareku, gu merarâ ototo râ nga na karemu tanga i Metia, suria inê kê tongesuria, vi God ki sugi hagaitangia i Nineve, manga i bani visia o Nahumi poropete iana. Na ara ni tarani ga bani visigi na poropete iana God tangara na Isiraelita renirerua i Nineve ma i Asiria ka page akê me. Ngaigi hato ka page vagavaga me mave, na ara ni tamasinga iata, igê nga na mateni tange. Mareha vê vige page mareha. Na ara ni tarani God ki bani visigi ka sugi vagavaga me mave nga. God ki asa hagetage vige hagaparu. Hoi, garigari tanga i Metia, suria i ngekana igo ko page rukuruku maninga igê teharia i Asiria se i Babilone.
“Na tamaka na Siu ga oga i Isiraele ka page henahuraura vê tenia na agua na mako koro iata ma ka page tokorenira igê na agua iata na mahuara. I Isiraele hagenani ki page hihiruga. I Samaria ma i Jerusaleme karu page hihiruga nogaterua. Na ruma ni rotu iana God ki page makaka ma ki page aruhuruhu ngavê râ noga. 5Ma God ki page takira aporo nikâ na kariana ma ki page torera aporo me tanga i Isiraele. Ngaira ka page tagarahia aporo na ruma ni rotu ma ki asa vige page bâkoro manga na bani ani rârâ ma ki mataro me na matena tanga. Igê nga na matena ngekana na Isiraelita hato ka page aporo me tenia na agua ga henahuraura tanga ma ka page tagarahia aporo na hinua i Jerusaleme, ki bâkoro manga i nago. Ngaira ka page tagarahia aporo i Jerusaleme na ruma ni rotu iana God manga ga bani vi na poropete iata na Isiraelita.
6Ma na enoni hato i maveta ka page urusi parongata ma ka page rahesia na Araha God monari i mêrihata hagenani ma ka page kasira râ na ataro ga hagatasira. 7Ngaira ka page hagarahasia God i bani mauri me tare ki bê ki arâ ma ka page marupegi na ramata iana.
Igênga na matena ngekana God ki page hagatahira igê na Isiraelita koro ga toto suria. Ngaia ki page hagahakura me i Jerusaleme ma ki page haganahunira renia na agua iana o Abarahamo, hanana ga gâga mangumanguaga tare igê. Ma na enoni hato ga takuia God i mêrihata hagenani ka page vagevage. Ma na enoni hato ga pe botage renia God ma ka era ka page magahuru tenia na maveta.
8Hoita o kareku, gu karingagi na tamasinga iaku. Go tototo suria maninga God ma ko hagakoro obana igê na ogaha iamu. 9Go hagesurira na karemu, hanana ga tanugi na tarani ga korokoro ma ka ototo, ka mamahata tangara na enoni matareha, ka takusia tare God ma ka hagarahasia i mêrihata hagenani.
10O Tobiasi o kareku, gu râ pania nga i Nineve. Siana ko gâga igê. Matena go bagia hato kaniaku ki tâtâ ngahisiê, gu arâ nga. Siana ki bungisigo so i hinua. Na enoni igê ka erataga ngavê ma ka bagatauhata ma ki asa vige maki. Igo ko bani girara na tarana i katoa o Nataba tanga o Agiakaro o vaemana hagareha. Ngaia ki uhungia vi nahuia ki meme o Agiakaro ma o Agiakaro ki gava ki ahi igê na matahu i roto hono. O Agiakaro ki tahi ma ki hura me tenia na roto hono, ma God ki kasia vato o Nataba igê na roto hono na mera mena na bagatauhana. O Agiakaro ki tahi tenia o Nataba manga i tahi tenia na etu, suria i mamahata tangara na enoni matareha. Ma o Nataba ki hagaratena marena renia na tarana i takusia tanga o Agiakaro. 11Hoi kakare, mu bâsia na marâ i tarahura na ani ga hagamamasiagara na enoni getera, i vi vi na mera. E, gê ngato.”
Ngaira ka hagatâhia o Tobiti igê na bea iana ma ki me. Ngaira ka bagia maninga ma ka hagahigasia.
12Matena i me ka Ana kaniana o Tobiti, o Tobiasi ki bagia ki tâ ngahisia o vaniana. Hemuri o Tobiasi ma kaniana karu aharaga karu râ karu oga i Ekebatana i Metia i pasina o Raguele o hungâna o Tobiasi. 13O Tobiasi ki marupererua ka Etena ma o Raguele matena garu gemêa ma ki hagahigasirerua bâraha. Matena garu me, ngaia ki bagirerua i Ekebatana. O Tobiasi ki nahunigi na nahuninga iana o Raguele manga i bani nahunigi noga na nahuninga iana o Tobiti o vaemana.
14O Tobiasi ki me matena i gemêa ngavê. Ngaia ki tonga na 117 na harisi iana matena i me. 15Hagenago ma ki me ngaia ki rongoa vi o Kuasaresi na maneraha i Metia ki ruhuruhua i Nineve ma ki henahuraura vê na enoni igê. O Tobiasi ki hagarahasia God, suria i hagaitangira na ai ni Nineve me Asiria. Na tarana ngekana ki hagakoro obana ma ki visia raha God renia ma ki kahu me.
Currently Selected:
TOBITI 14: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific