TOBITI 11
11
I marava aporo na maana o Tobiti
1Matena ga hagarangia noga na hinua i Kaserini i na apanena hura i Nineve, 2o Rapaele ki vi: “Tobiasi, igo ko bani girara na mamasiaganiha i bani tarahua o vaemamu ma karu kahu pania. 3Garu nanago tarana kaniamu karu hagarêa na ruma ma hemuri ka kahu atata me ngaira. 4Siana ko bonotenia vigo torea henigo na osuna na siare.” Vikê ngairerua karu nanago ma na o iana o Tobiasi ki râ henirerua.
5Matena ngekana ka Ana ki oga i na akerena na tara ki bâbâ bênitara renia o karena. 6Ngaia ki bâ vê mo Tobiasi ki arâ me. Ka Ana ki ngere tanga o Tobiti, ki vi: “Bâ, o karekerua ki arâ me i ngekana henia na tamana!”
7Hagenago ma karu kahu râ i pasina o Tobiti, o Rapaele ki vi tanga o Tobiasi, ki vi: “I page marava aporo na maana o vaemamu. 8Gu puruigi na maana o vaemamu renia na osuna na siare ma ki katoa na reo ki ahagogara tenigi na maana. Vikana ki page marava aporo na maana o vaemamu.”
9Ka Ana ki gaha râ tanga o karena, ki ruia ma ki tamasi raha, ki vi: “E, gê bâsigo aporo nikâ o kareku. I koro ma gê kahu meme!” Ma ngaia ki angi, suria i vagevage bâraha.
10O Tobiti ki aharaga ma ki râ tatagara ki hura i maani ruma. 11O Tobiasi ki têa na osuna na siare ma ki râ tanga. Ngaia ki uhigi na maana o vaemana, ka têa ki ura tonge so ma ki vi: “Gu ramo vaemaku.” 12-13Ngaia ki abagi na maana renia na osuna na siare. Matena garu mamasiaga na maana o Tobiti, o Tobiasi ki haganega i na akereni na maana ma ki gaia râ na reo. 14O Tobiti ki ruia o Tobiasi ma ki angi, suria i vagevage bâraha. Hemuri ngaia ki tamasi raha, ki vi: “E, inê kê bâsigo o kareku. Igo ka na ageageha iaku! “Ngaia ki hagarahasia God, ki vi:
“Ge hagarahasia God.
Ge hagahigasia na atana.
Ge hagarahasira na angero hato iana.
Ge hagahigasia God tare ki bê ki arâ.
15Ngaia ki nakê kê guru
ma ngaia ki takiê.
Tahema i ngekê inê kê bâsia
o kareku o Tobiasi!”
Hemuri o Tobiasi ki banu i ruma, ki vagevage ma ki hagarahasia God i mêrihana hagenani. Ngaia ki hagarongoa o vaemana renia na râha bâkoro iana, renigi na haga i migiaporo me, ma renia na êragiha iana henia ka Sara ka karena o Raguele. Ngaia ki hagarongoa, vi ka Sara ki arâ me mênga i tara ma ki sugi atata me.
16O Tobiti ki vagevage ngavê ma ki hagarahasia God, matena i hura tenia na ruma tanga na maani para ni hinua i Nineve, hanana i mehetarahu kaniana o karena. Matena na enoni i Nineve ka bâsia i kahu arârâ marena, mareha vige kahu urua, ngaira ka kone ngavê. 17O Tobiti ki hagarahasia God ma ki hagarongora na enoni hato, vi God ki takia ma ki hagamaravagi aporo na maana.
Matena o Tobiti ki mehetarahu ka Sara, ngaia ki mêri renia, ki vi: “Ka kareku, i koro era go râ me! Ge visia raha God i kasigo me tangagami. God ke koro tangagamu, o vaemamu, igo ma o Tobiasi o kareku. Banu me! Igo ko pane ruma. Na Araha ke haganahunigo renigi na apekoroha ma na vagevageha. Banu me ka kareku!”
18Na Siu hato i Nineve ka vagevage henia o Tobiti. 19O Agiagaro mo Nataba na goana tonge o Tobiti karu râ me karu vagevage henia nogaterua.
Currently Selected:
TOBITI 11: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific