SIRAKE 9
9
Na tauhamu tangara na gete
1Siana ko ngaria na gete iamu go takuia.
Siana ko hagesuria ki aera tangago.
2Siana ko nakago maremu ngavê i rimana na gete,
i era ma ki raha tangago.
3Siana ko karihira na êrâ,
i era ma ko tu igê na etu iata.
4Siana ko hakunira na gete ni kiha,
i era ma ka uhungigo ko vota.
5Siana ko boretenia bâraha na kare viru,
i era ma ka hagaturigo renia.
6Siana na êrâ ka bêbanu igê na aitangihamu,
i era ma ko tê tara renigi na nahuninga hato iamu.
7Siana ko bâbâ rârâ i hinua
se go arârâ ma igê na agua i hinua
na enoni ka magu vige arâ igê.
8Matena go bâsia na gete i bâkoro,
siana ko boretenia.
Siana ki tâtâ i na aitangihamu
na bâkorohana na gete iana na mane getea.
Na bâkorohana na gete ki hagatasira rako na mane.
Ngaia ki raria na teniha manga na gi.
9Siana ko gâga ngahisia na gete êragi
se go mebêrihu se go metono,
i era ma ki banu i na aitangihamu
ma ko hagaratemu maremu.
Na tauhamu tangara na mane
10Siana ko kasikasi renia mabaniharamu
suria i asa vigu tarahua na urusina
vige koro manga ngaia.
Maharamu haoru ki manga na vaini haoru.
Na vaini ki koro teha ngavê, matena i êvariga.
11Siana ko hengaria na enoni tasi,
suria vi akê me bâkoro igê na ogaha iana.
Igo ko pe girara vi na ani ta na bagabevoana ki oga tanga.
12Siana ko ageagesigi na marâ na enoni tasi ga ageagesigi,
suria ngaira ka erataga ma na hagaitangiha ki page tarahura,
henaka matena ga meme.
13Go sususu pane tenia na mane i nahuni ramoha,
hanana vi nahuigo ko meme.
Vikana igo ki asa vigu meanumanuma na mêrihamu.
Ma ki manga go karikari hagarangia, go girara,
i era ma ki nahuigo ko me.
Go girara, vi igo ko arârâ i berarogani na etu ga tâ pinihi
ma ko mataku tange na mage.
14Go girarara bâkoro nga na enoni i pasimu
ma ko hagate taramu tenira ma na mane ni aitangisiha.
15Go meratamasi na mane ni takoha mataha
ma kamu tamasi renigi nga na ramata iana God,
na Araha raramohaga hunia.
16Go merabêrihu na mane ga koro ma ka oto i maana God
ma ko ageagesia ngavê na hagahigasiana na Araha.
17Na enoni ka konetenigi na marâ
i tagarahigi na mane i manisingenigi ngavê vi tagarahigi.
Na tamasinga iana na maneraha ka hagabângenia
vi ngaia ka na enoni ni takoha mataha.
18Na enoni ni hinua ka magutenia na ani i toratora tamasinga
ma ka usitenia na ani i tamasi tararu.
Currently Selected:
SIRAKE 9: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific