SIRAKE 10
10
Renira na enoni raha
1Na maneraha i tako mataha ki hagaotora na enoni i ruguhana
ma na marungiha iana ki arâ manga ko hanana.
2Na gavumane iana ma na enoni i ruguhana ka maratorana ngaia.
3Na maneraha i pe araria vige maneraha
ki aerasira na enoni i ruguhana.
Na ogaha i hinua ki girara i akê me bâkoro
manga vi na enoni raha igê ma ka nahuni takoha mataha.
4Na marungiha ni maveta ki tâ i rimana na Araha.
Ngaia ki naka na ani i araria vi maneraha
igê na matena i araria vi maneraha igê.
5Na tagaraha koro iana ki tâ i rimana na Araha ma na hagahigasiana renia ki râ me tenia na Araha.
Renia na paroparoha
6Siana ko gâga ni mangariaganiha tanga na enoni,
henaka i aharê igê na anima na tarani.
Siana ko paroparo, suria vigo tongesurigo so maremu.
7Na Araha ma na enoni nikâ ka kitenia na paroparoha
ma ka makimakitenigi na tarani ga pe oto.
8Na paroparoha, na tarani ga pe oto ma na ruruguha
ka girara ga hagavotarira na apaneni nuni
ma ka katora na apaneni nuni getera ka urusira.
9Igia ka na momo ma na rahu ma.
Ga paroparo tanga na ta?
Na apeka ka bani kakaga,
henaka ga mauri mêngagia.
10Na maeha i gâga arihu, ki hagatugupunia na mane mangata.
Henaka vi na maneraha, ngaia ki mauri i ngekê
ma i gomaha ngaia ki meme vari.
11Matena na enoni ma ki meme, na ta ki nahunia?
Na mama, na rango ma na marâ vigana ma.
12Na paroparoha ki haganega,
matena na enoni ki murisigea na Araha
ma ki rumakaka renia God i hagavora.
13Na paroparoha ka na hunana na tasi.
Na ani i bara i bêta na paroparoha
na eraha ka page aharêsira.
Ngaira ka manga na maana na ve ni tasi i gogogo me.
Tahema na Araha ki hagagasuganira
renigi na hagaitangiha raha
ma ki hagamagahurura ngavê.
14Na Araha ki hatungira na maneraha ga paroparo
ma ki urusira renira na ani ga haritagi.
15Na Araha ki pirira akê na enoni ga paroparo
ma ki urusira renira na ani ga haritagi.
16Na Araha ki ruhuruhura na agua ga paroparo
ma ki hagamagahurura ngavê tenia na maveta.
17Ngaia ki ruhuruhugi ma ki hagamagahurugi.
Vikana na enoni ka hitenigi ngavê.
18God ki pe hagavorara na enoni
tanga vige paroparo se vige mangariaga ngavê.
Na enoni tanga viga hagahigasira
19Ti ki ararigia viga hagahigasira?
Ngaira ka na enoni ga hagahigasia na Araha.
Ti ki pe ararigia vige hagahigasira?
Ngaira ka na ani ga aharêngigi na ramata iana na Araha.
20Na enoni ka hagahigasira na maneraha iata.
Na Araha ki hagahigasira na enoni ga hagahigasia ngaia.
21Na hagahigasiana na Araha ka na hunana na tavorahana bâkoro.
Na togeaganiha ni paroparoha ka na hunana na votaha.
22Na enoni ruruguha, na enoni i rongo raha na atata
ma na enoni matareha ke ageagesia na hagahigasiana na Araha.
23I pe oto vige ruhia na enoni matareha i toto suria na Araha.
Ma ki pe oto vige hagahigasia na enoni tasi.
24Na enoni ki tuguhira viga hagahigasira na maneraha,
na mane ni hagatamasinga ma na ani ga nahuni ramoha.
Ma na ani i hagahigasia na Araha
ngaia ki teharira ngaira hato.
Ma ki tuguhira na enoni
viga hagahigasia ngavê teharira ngaira.
25Na enoni ga asitatara ka tagara
tanga na kare rakuraku i nahuni takoha mataha.
Manga vi ngaira ma ka takotako bâkoro,
ki asa vige hagagege renia.
26Siana ko meparo na tagaraha iamu.
Siana ko paroparo, matena i pe tongasigo na marâ.
27Go tagara hete hanana ga aharêsigo na marâ go obanigi
teharia go paroparo ma ko magê.
28Kakare, go tongesurigo so maremu
ma siana ko paroparo.
Go hagahigasigo so maremu manga vi marisimu.
29Ti ki girara i hagahigasia na ani i tevotevo ruhia so marena?
I asa vige hagahigasia na ani i tevotevo ruhia so marena purupuru.
30Ga hagahigasia na enoni matareha renia na aitangisiha iana.
Ga hagahigasia na enoni ruruguha renigi na ruruguha iana.
31Manga vi na enoni matareha ngekana ma ki ruruguha,
ngaira ka page hagahigasia ngavê teharia i nago.
Manga na enoni ma ka pe hagahigasia na enoni ruruguha ngekana,
ngaira ki asa vige hagahigasia, matena i matareha.
Currently Selected:
SIRAKE 10: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific