SIRAKE 8
8
Na hagatogosuriha
1Siana ko mehetuguri na mane i nahuni ramoha,
i era ma ko vota i rimana.
2Siana ko hekorekore henia na mane ruruguha,
i era ma ki vatevatera na enoni ka merongasigo.
Na golo ki hagavotarira rako na enoni
ma ki hagatasira na maneraha.
3Siana ko mehetuguri na enoni i nahunahu tamasinga tare.
Vikana igo ko ama ni raria nga na gi.
4Siana ko memarabe na ani i atani ataka mavê,
i era ma ki tamasi erasia na êvarimu.
5Siana ko ama ni ramunia nga na ani
i murisigea noga na tasi iana.
Go girara na hagaitangiha ki ararigia igia hato.
6Siana ko ruhia na ani i gemêa,
suria tani na hitangika ka page gemêa nogaka.
7Siana ko manavatenia na enoni, suria vi ngaia ki me.
Go girara, vi igia hato ka page me.
8Go botage renigi na tamasinga iata na enoni ni takoha mataha.
Go hagesuringenigi na tamasinga ni takoha mataha iata.
Igo ko girara go totora tenira na aitangisiha,
hanana go tagara tangara na ani ga oga igê na tagaraha raha.
9Go karingara maninga na enoni ga gemêa,
suria ga tora giraraha tenira na êvarita.
Igo ko girara go hagesuri tenira,
hanana go nahuni aramiha igê na matena tange.
10Na teniha iana na enoni tasi ki manga na gi.
Siana ko raria, i era ma ko tihu igê.
11Siana ko bekabeka suria na ani
i pe maki vige megomarabe.
Go piringiape ma, i era ma ki ririgi na tamasinga iamu
ma ki hagaratemu renigi.
12Siana ko naka na ani i nahuni ramoha tenigo
ki torea noga tenigo ta na marâ.
Go girara, manga go katoa vikana,
ngaia ki arâ su tenigo.
13Siana ko surusuru, vigo barua na hagaba iana ta na enoni,
manga vi bara tangago vigu barua.
Go girara ototo nga vi tuguhigo go barua.
14Siana ko torea igê na tamasinga na mane ni suriha,
suria ngaia ki page teharigo,
suria ma i mane ni hagatamasinga.
15Siana ko takua na ani i pe hinahinaru,
i era ma ki tarahugo na perenga raha.
Ngaia ki râ suri barisuna, henaka i arâ bekabekaga,
ma igo ko meme henia.
16Siana ko mehetuguri na ani i bagamangamangariaga
se go takua igê na agua i hihiruga,
suria na nahuta ni nuni ka na marâ purua ma tanga.
Ngaia ki nahuigo ko meme i ngekana,
suria i mareha rârâ igê na enoni hanana vige tamanigo.
17Siana ko hagate taramu i pasina na enoni i bonobonoga,
suria i asa vige pinihigi so na tamasinga iamu tanga.
18Siana ko katoa mave i maata na mahuara
na marâ i araria vi pinihi, suria igo ko pe girara na ta ki page akê me.
19Siana ko tamasigi mave na marâ ga pinihi igê na aitangihamu, hanana ga korokoro tangago, i era ma ko hagaratemu maremu.
Currently Selected:
SIRAKE 8: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific