SIRAKE 7
7
Tani na hagaotonga getigi
1Siana ko katogi na eraha
ma na eraha ki asa vige page tarahugo.
2Go susu pane tenia na eraha
ma na eraha ki susu pane tenigo.
3Siana ko hasihasi na eraha
i era ma na harisi ni eraha ke aharêsigo.
4Siana ko nungia na Araha renia vigu nahuni ramoha.
Siana ko nungia na maneraha renia vigu gâga igê na tagaraha raha.
5Siana ko kasigo akê maremu i maana na Araha,
vi igo ka na enoni koro,
se go kasigo akê maremu i maana na maneraha,
vi igo ka na enoni ni aitangisiha.
6Siana ko gunahia vigu enoni ni hagatamasinga,
suria vari igo ko magu vigu hagaotoa na eraha.
Vari igo ko magutenia na enoni i nahuni ramoha,
tahema go panepane henia.
Vikana igo ko votavota igê na tagaraha iamu.
7Siana ko katoa na eraha ki tarêhira na enoni hato.
Siana ko hagamakigo maremu i maata.
8Na tasi gi tage siana ko katoa hagerua,
suria na hagaitangiha i bani tarahugo i nago,
ki araria ma vige uhu.
9Siana ko vi: ‘God raramohaga hunia
ki takusigi na votovoto rako iaku tanga.
Vikana ki tuguhia vi aganaria na vogasiha iaku.’
10Go nunginungi tare
ma ko mahata tare tangara na enoni matareha.
11Siana ko rurusia na ani i aperuruhi,
suria na Araha ki kasia so na enoni
ma ki kasia akê nikâ.
12Siana ko hagaparu renira na goamu se na tamamu.
13Siana hagetage ko hagaparu.
I asa ngavê ta na marâ koro vige vora me tenia.
14Matena na enoni raha ka hekarigi,
siana ko atani tamasi mavê.
Matena go nunginungi,
siana ko baua akê na agua gi tage.
15Siana ko makumakusiga renigi na tagaraha raha
se na tagaraha i mu,
suria God raramohaga hunia ki hagatagarahigia renigi.
16Siana ko tare surira na enoni tasi,
suria na hagaitangiha tenia na Araha ki pe kakaviaga.
17Go haritagi nga,
suria na gi ma na mama ka tangara na enoni tasi.
Ge oto na tauhamu tangara na enoni getera
18Siana ko rumakaka renia na tamamu,
suria ma go nahuni haga i apena.
Siana ko rumakaka renia maharamu,
henaka viga vatego renigi rako na golo taranini.
19Go auragia nga na gete kari i nahuni takoha mataha,
suria na tauhana ki bâkoro teharia na golo.
20Siana ko katoa bera na kariamu i tagara bâkoro,
se na enoni tagara i tagara raha tangago.
21Go takuia na kare rakuraku iamu i mêrihamu hagenani
ma ko naka vê ki asitatara.
22Manga go nahunira na togoha, go bâbâsurira maninga.
Manga ga hagavaraha haga tangago, go mengira nga.
23Manga go nahunira o karemu, go hagesurira.
Go hagaotora matena ga karekare.
24Manga go nahunira ka karemu, go anumasira ka voravora re na gete koro
ma siana ko tenira so go apeape surira hete.
25Matena go hagauragingenia ka karemu,
igo ko bani tagara bâkoro me ngavê.
Go hagauragingenia henia na mane i nahuni takoha maninga.
26Manga go nahunia na gete i râ igê na aitangihamu,
siana ko kasia.
Ma ki manga go pe takuia na gete, siana ko hagêguria.
27Go hagahigasia o vaemamu i mêrihamu hagenani
ma ko takusia tare na mamasiaganiha iana kenamu
matena i hara renigo ki aparago.
28Takusia vi ngairerua kani garu vatego renia na mêriha.
Manga i he kanigo girara vigo barugi aporo
na tagaraha hato iaterua tangago?
29Go hagahigasia na Araha i mêrihamu hagenani
ma ko hanetasira na mane ni hagarahenga iana.
30Go takuia i mêrihamu hagenani God i hagavorago
ma ko tamanira na ani ga tagara tanga.
31Go magutenia na Araha
ma ko hagahigasira na mane ni vogasiha iana.
Go vatera renigi na marâ i bonasigo na ramata renigi:
na nagoni na mu ma na togoha iamu,
na vogasiha ni bonoteniha ni tasi,
na gaparata na ganiani go vogasi re
ma na ani getigi hato na vogasiha
ma na votovoto tanga na Araha.
32Go mahata tangara na enoni matareha
ma na korohana na Araha ki page aharêsigo igo.
33Go mahata tangara na enoni hato ga mauri
ma ko korokoro nikâ tangara na ani ga bani me.
34Go obâbarugu henira na ani ga oga igê na memeta.
Go angiangi henira na akêkuha.
35Siana ko makumakusiga vigu bâsira na ani ga maeha.
Vikana na enoni ka page takuigo.
36Henaka na ani mavê na tarani go katogi,
go takusia tare, vi igo ko page meme i ta na tangiana.
Vikana igo ki asa vigu tasi.
Currently Selected:
SIRAKE 7: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific