SIRAKE 6
6
1Siana ko voravora re na merongana na tamamu koro.
Na enoni tasi i matanga na meana
ki rongo era na atana
ki hagamakia marena ki apeaperuruhi.
2Siana ka angarigo na teniha iamu,
suria ngaigi ka girara ga heoke tenia na aitangihamu
manga na puruka mane.
3Igo ko page manga na apinige i maria,
i mareha na ahani ma na guani.
4Na teniha era ki page hagaratemu
ma ki page nakara na merongamu ka megomarabe.
Na hemanatangeanaheri
5Manga go tamasi haritagi ma ko pe tamasi bêrahaga,
na enoni ka agana, hanana ga manatangenigo
ma igo ko page ageagesira.
6Go nakara rako na enoni ka manatangenigo
ma ko atea na veretage togo i berarogata na rehagaro
hanana i hagaotogo.
7Manga go obania vigo hemanatange,
ki tuguhigo vigo uhungia hagenago.
Siana ko hatani hagêguritogo renia.
8Tani na enoni ka manatangenigo,
suria ma ga obania ta na marâ tenigo,
ma na matena i tarahugo na mamasiaganiha,
hoi, ngaira ki asa vige tamanigo igo.
9Ma tani nikâ na tamamu koro ka voravora re ne merongamu
renia ta na hetuguriha,
ma ka hagamakigo, suria ga tarohenia mave.
10Tani ka manatangenigo ma ka megobêrihu
ma na matena i tarahugo na mamasiaganiha,
ngaira ka kasikasi renigo.
11Matena ga arâ bâkoro na ara ni marâ tangago,
ngaira ka ngahisigo manga na nunumu
ma ka bonasira na kariamu.
12Ma na matena i tarahugo na mamasiaganiha,
ngaira ka kasikasi renigo,
ka masesi tenigo ma ka merongasigo.
13Go masesi tenira na merongamu
ma ko hinarura na ani ga manatangenigo.
14Na enoni i manatangenigo monari,
ki manga na bêata nganganihaga tangago.
Manga go nahunia tani,
e, igo ko nahunia na ruruguha monari.
15I mareha rârâ ta na marâ vige maratorana.
Na mena ki bara vige hagararingenia.
16Na enoni i manatangenigo monari ki na marâ
i haganahunigo renigi na apekoroha ma na mêriha mora.
Na enoni ga hagahigasia na Araha
ngaira ma kaniga page tarahua.
17Na enoni i hagahigasia na Araha
ki girara i manatangenia monari na tamana, suria na tamana ki maratorana ngaia.
Na takoha mataha ka na hagaotonga koro
18Kakare, haganega tenia na matena go sisite mênga
go aganaria na takoha mataha.
Vikana igo ko ama ni tarahua nga matena go gohogohoraga.
19Go maratorana nga na enoni i hikiru ma ki hasihasi
hanana i page nahunigi na ngêra.
Vikana go tagara raha nga,
hanana go tarahua na takoha mataha.
Igo nogamu ko tagara hagenago
ma hemuri ko kahu ageagesigi na guani na takoha mataha.
20Na enoni ga usitenigi na hagaotonga,
na takoha mataha ki bara tangara,
suria ga marusi vige râ surigi na ramata iana.
21Ngaigi ki higera manga na hê i higa.
Ki page arihu ma na enoni bonobonoga ngegana
ka kasigi râ, suria ga usitenigi.
22Na takoha mataha ka na takoha mataha
ma ki hagatêrira rako na enoni,
suria ga usi vige hagaotora so mareta.
23Kakare, go karingê
ma ko aganarigi na hagaotonga iaku tangago.
Siana ko usitenigi na aitangisiha iaku.
24Go barorerua na êgamu renigi na varo ni takoha mataha.
Go tarasia na riomu igê na varo iana.
25Go totora gapararenia.
Siana ko usisi tenigi na varo iana.
26Go gunahia na takoha mataha i mêrihamu hagenani
ma ko togeaga ko arâ surigi nga na tauhana.
27Go garia ma ko page tarahua.
Go ranguia gatagata ma siana ko herehere kasia.
28Vikana ki page togotogo na aitangihamu i pasina
ma ngaia ki page hagakoro obamu.
29Vikana na varo iana igê na êgamu
ka voravora re na engahi nganganihaga iamu
ma na varo iana i riomu
ka voravora re na mahemu bâkoro.
30Na totora i riomu ki manga na mahe na golo.
Na varo iana ka mangagi na mahe rotorotoaga memera tangago.
31Na takoha mataha ki manga na tuguni bâkoro iamu,
manga na tarepuri na vegevageha i bêmu.
32Kakare, manga go obania, igo ko girara go hagesuri.
Manga go gunahia, igo ko page vora re na enoni ni takoha mataha.
33Manga go agana ko karinga, igo ko hagesuri
ma ko page nahuni aitangisiha.
34Go hakunira na bani nuni.
Manga go tarahua i berarogata na ani i tako mataha monari,
go gâga nga henia.
35Go karingagi maninga na tamasinga renia na rotu.
Siana ko tihigi na tamasinga ni aitangisiha.
36Manga go tarahua na enoni ni aitangisiha,
go riteritehia ko vatugia.
Go maoa na maani ruma iana.
37Go takotako renigi tare na ramata iana na Araha
ma ko barisurigi.
Ngaia ki page mavesia na aitangihamu
renigi na aitangisiha ma na takoha mataha go gunahigi.
Currently Selected:
SIRAKE 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific