SIRAKE 5
5
Siana ko raruni marabênêhi
1Siana ko hagêgurigi na nahuninga iamu.
Siana ko vi: ‘O, i uhu tangê.’
2Siana ko takusia vi i tuguhigo,
vigu nahunigi na ara ni marâ go tenigi,
ko rapasigi vigu nahunigi.
3Siana ko vi: ‘Inê kê raha tangê mareku.’
Manga ngekana, na Araha ki page hagaitangigo nga.
4Siana ko vi: ‘Inê kê tasi!
Ma na hagaitangiha kani i he?’
Hoi, na Araha ki piringiape ma vige hagaitangigo.
5Siana ko tako bare,
vi na Araha ki bonotenigi na tasi iamu.
Tahema igo ko ama ni tasitasi nga.
6Siana ko vi: ‘E, na takiha iana ki raha teha.
Ngaia ki page bonotenigi na tasi rako iaku!’
I monari, ngaia ki takira na enoni tasi
ma nikâ ngaia ki mangariaga tangara.
Na mangariaganiha iana ki tâ tangara na enoni tasi.
7Siana ko hagarihu vigu aharia aporo na Araha.
Siana ko surusurua akê,
suria na mangariaganiha iana ki girara i hagagasuganigo
ma igo ko page meme, suria i hagaitangigo.
8Siana ko hagêgurigi na ruruguha
go rurugi igê na tarani ga pe oto,
surigi ngaigi ki asa vige hagatahigo
igê na tangiana ni hagaitangiha.
Hagaotoa na meamu
9Na ara ni rogaroga ka pe araria tagenata na hatanga.
Na ara ni tara ka pe ararigo vigu arâ surigi tagenani.
Bâ, na enoni tasi i matanga na meana, ki katokato vikana.
10Go tâtâ nga igê na takoha iamu.
Go tâtâ nga igê na tamasinga iamu.
11Go hatani karinga.
Go takotako nga hagenago ma ko kahu tamasi.
12Manga go girara vigo arami, go arami.
Manga i mareha, go munimuni.
13Na tamasinga iamu ki girara
i hagarahasigo se i hagamakigo.
Na meamu ki girara i hagaratemu.
14Siana na enoni ka visigo vigo bagatabotabohara.
Siana ko tamasi erasira na enoni.
Tagenana manga na makiha ki nanêa na mane hanago,
na hagaitangiha raha ki page tarahura na enoni
i matanga na meata.
15Siana ko arâ tasi, henaka i raha se i sisite.
Currently Selected:
SIRAKE 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific