SIRAKE 4
4
Na hetamaniha tangara na enoni matareha
1Kakare, siana ko usisi vigu vatera na enoni matareha
na marâ ga obanigi viga mauri re.
Siana ko hagababera, matena i barabara tangara.
2Siana ko hagamamasiaga na ani i magê.
Siana ko katoa ki mangariaga tangago se i obaera.
3Siana ko hagepurigi akê na mamasiaganiha iana na ani
i bani oga igê na mamasiaganiha raha.
Siana ko hagababea na ani i barabara tanga.
4Siana ko usisi vigu tamania na ani
i avarasigo igê na mamasiaganiha iana.
Siana ko murisigea.
5Siana ko sirabare tenia na ani i avarasigo,
i era ma ko katoa ki arangenigo.
6Manga i obaera ngavê ma ki arangenigo,
hoi, God na Hagavoraha ki page aganaria.
7Go katora na enoni ga megosukuru ka takuigo.
Go tubê so tangara na enoni raha.
8Go karingara na enoni ga matareha
ma ko aramira haritagi.
9Go hagatahira na enoni ga mamasiaga
tenira na ani ga hagamamasiagara
ma ko gatagata ko surira na enoni igê na otoha.
10Go bâbâsurira na kare banogo manga vi igo ka no vaemata
ma ko tamania kenata i nâ renia o vaniana.
Vikana igo ko page manga o karena God raramohaga hunia
ma ngaia ki page takuigo ngavê teharia kenamu i takuigo.
Na takoha mataha ka na enoni ni hagesuringa
11Na takoha mataha ki marupera bâkoro o karena
ma ki hagaotora bâkoro na ani ga garia.
12Na ani i takuia, ki takuia ngaia nga na mêriha.
Na ani i riteritehia ki garia
ngaia ki page vagevage ngavê.
13Na ani i nahunia na takoha mataha
ka page hagahigasia ngavê,
ma na agua mavê i arâ igê
na Araha ki korokoro tanga igê.
14Na ani ga toto suria na takoha mataha
ka toto suria God apuna ngavê.
Na Araha ki takuira na ani
ga takuia na takoha mataha.
15Na ani i tê viteana na takoha mataha
ki page surira oto na enoni i maveta.
Na ani i toto suria ki page asitatara i pasina.
16Manga go hagêguritogo renia
igo ko page nahunia
ma ko page hagatarêngenia tangara na apaparaha iamu.
17Hagenago na takoha mataha ki page bêngenigo
surigi na tara ga ahiohio.
Ngaia ki page hagamagusigo
ma igo ko haga ni rumakaka.
Ngaia ki page uhungigo
renigi na hagaotonga ma na ramata iana,
mataro me ki tahetara
ki girara i hagêguritogo renigo ngavê.
18Ma hemuri ngaia ki page hatani arâ me tangago
ki hagagirarago renigi na tauhana pinihi
ma ki page hagavagevagesigo.
19Manga go aharê, ngaia ki page rumakaka renigo
ma ki page nakago vê, ko hagaratemu maremu.
Na morana na makiha
20Go naasia na matena koro ma ko hinarugi na eraha.
Siana ko hagamakigo maremu se vigo ruhigo maremu.
21Na makiha karu vora gi rua: na ani i hagatasigo
ma na ani i korokoro tangago
ma ki ararira na enoni viga hagahigasigo renia.
22Siana ko tangatanganigo, i era ma ko maki.
Siana ko katoa na makiha ki hagavotarigo.
23Siana ko munimuni ma igê na matena iamu vigo tamasi.
Siana ko pinihia na takoha mataha iamu.
24Na takoha mataha ma na giraraha iamu
karu huhura me mave matena go tamasi.
25Siana ko rêra pusia na monariha.
Siana ko takusia vi igo ko giraragi na ara ni marâ.
26Siana ko maki vigu ranganigi na tasi iamu.
Siana ko uhungia vigo pepea na ve i ogogo.
27Siana ko têtê ringeta na enoni bonobonoga.
Siana ko panepane henira na enoni
suria ma vi ngaira ka nahuni ramoha.
28Go gâga nga igê na monariha, henaka go meme.
Vikana na Araha God ki page roherohe pusigo.
29Siana ko gasuga ni tamasi.
Siana ko marusi vigu tagara se vigu tagara hagahe.
30Siana ko manga na laione i pasimu
suria ma vigo pe hagêguritogo renia na ruma iamu.
31Siana ko gasigi na rimamu tanga ma vige vatego.
Siana ko rumigi na rimamu matena i tuguhigo vigo barubaru aporo.
Currently Selected:
SIRAKE 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific