SIRAKE 48
48
O Elia
1Hemuri ki ura kê o Elia.
Ngaia ki na poropete ramo manga na anguruna na gi.
Na tamasinga iana ka manga na taketakena na mangate.
2Ngaia ki katoa na magêha ki tarahura na enoni
ma ka rako na enoni ga me, suria i ama ni ramoramo nga.
3Ngaia ki tamasi urusia na Araha
ma ki mareha rârâ vige rangirangi suria kani ngaia.
Hageoru ngaia ki unia vato na gi.
4O Elia, na mena go katogi ka hagakone teha ngavê.
I mareha rârâ ta na enoni, vige ageagesigi na mena ngegana.
O ti kani maratoramu?
5Igê na raramohana na Araha raramohaga hunia
igo ko hagamêria aporo na mane i me.
6Igo ko hatungira na maneraha,
suria go hagamaehagara ka me igê na banata.
7I Sinai igo ko rongogi na ramoniha iana na Araha
i togeaga ki hagaitangira na merongana.
8Igo ko monera na mane ka maneraha,
hanana ga hagaitangira na merongana.
Igo ko monea ta na mane ki poropete urusigo.
9Igo ko akê i vavearo igê na bagamaguara raha
igê na kati ga okea na hosi na gi.
10Na buka apuna ki visia, vi igo ko nanê,
hanana go aporo me igê na matena tanga,
hanana go hagamauga na mangariaganiha iana God,
i era ma ki raboa manga na anguruna na gi;
hanana go katora o vahemata hegitigi ka hekorokoro aporo
ma na varo ninuni iana o Isiraele ka aporo me manga i nago.
11Ga babarisi na enoni ga mauri togâna na aporoha me iamu.
I tagenana ma tangara na ani ga bani me.
Ma igo ko babarisi teharira, suria go mauri.
O Elisa
12Matena o Elia ki magahuru igê na maguara,
na raramohana ki angaria o Elisa.
Matena i gâga mênga, ngaia ki pe magutenira rârâ
na enoni ga nahuni ramoha,
ma ki bara tangara vige tuguria,
ke katogi na tarani ga obanigi.
13I pe bara rârâ ta na marâ tanga.
Henaka i me, ma na apena ki tamasi poropete mênga.
14Henaka i mauri mênga se i me
ma ngaia ki katogi na mena ni hagakoneha.
15Ma ki henaka vikana,
ma na enoni ka pe kasigi râ na bagatauhata
mataro me ka henahuraura tenia i pasita
ma ka tokorenira suria na maveta hagenani.
Na kere haku sisite ma kani hita so.
Henaka vikana, ma na raraha iana o Tavite
ka marungira mênga na ani ga hita so.
16Tani ka hagakoro obana na Araha
ma tani ka ama ni tasitasi nga.
O Hisikia mo Isaia
17O Hisikia ki hagagatagatania na hinua raha i Jerusaleme.
Ngaia ki taregi me na ve tanga na hinua.
Renigi na vato na aiani ngaia ki karua
na tarâto tanga na ve igê na hêmeo
ma ki tagarahigi na agua ga nonganonga igê na ve.
18Matena o Senageribi ki maneraha,
ngaia ki taharia na hinua.
Ngaia ki hagatorangenia na ruata me tanga tenia i Lakisi.
Na mane ngekana ki hagaramo tanga i Jerusaleme
ma ki tamasi paroparo ki erasia God.
19Na enoni ka bagahagêguri, ka tata ma ka bubununuga.
Ngaira ka mamasiaga manga na gete i harate kare.
20Ngaira ka avarasia na Araha ni hetakiha
ma na Araha apuna ki hatani aganaria na avarasiha iata.
Ngaia ki hagatorangenia o Isaia ki hagatahira.
21Na Araha ki taharia na tênga iata na me ni Asiria
ma na angero iana ki sinora.
22O Hisikia ki hagakoro obana na Araha
ma ki togeaga ki amake suria o Tavite na êvarina.
Nga na tarana na poropete raha o Isaia i bonasia re ngekana,
23Ngaia ki katoa na arito ki guru ki aporo
ma ki hagaborahusia na mêrihana na maneraha.
24Ngaia ki hagamanapura na enoni i Jerusaleme
suria ga angiangi maramara.
Igê na mangatana ramo ngaia ki bani bâsigi râ
na marâ ga page akê me mave i hemuri.
25Ngaia ki bani visigi mataha na marâ
ga page akê me, naka ma i hemuri agana,
na marâ pinihi ga mamênga vige akê me.
Currently Selected:
SIRAKE 48: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific