SIRAKE 47
47
O Natane mo Tavite
1I murina i me o Samuele,
o Natane ki poropete igê na matena iana o Tavite.
2I tagenana ma manga ga nakagi vê na êbeni na vogasiha ni ngêhaku
tanga na Araha,
ka atea nikâ o Tavite i berarogata na Isiraelita.
3Ngaia ki merabare na laione ma na o vasiga
manga vi ngaira ka na kareta na sipi se na kere goti.
4Matena i karekare mênga, ngaia ki nahuia ki me
na mane ni me i borahu ma ki ramo ngavê.
Ngaia ki hêsigogoa,
ma ki hatungia na paroparoha iana o Goliate.
5Ngaia ki avarasia na Araha raramohaga hunia
ma na Araha ki haganahunia renia na ramoha,
hanana i nahuia ki me na mane ni me ramo ngekana,
hanana na apaneni nuni hato getigi ka magutenigi
na raramohata na kariana na Araha.
6Na enoni ka hagarahasia,
suria i nahuira ka me na mani bera na mane ni me
ma na matena ga kasia ki maneraha,
ngaira ka hagarahasia, suria na Araha kani atea.
7Ngaia ki sinora na merongana hato henira na Pilisitina,
hanana ngaira hato ki hato vige page hagamakukura nikâ.
8O Tavite ki visia koro ma ki hagarahasia
na Araha raramohaga hunia i apuna ngavê
igê na ara ni tarani hato i katogi.
Ngaia ki takuia na Araha i hagavora
ma ki kiki hagarahasia i mêrihana hagenani.
9Ngaia ki nakara na mane ni kiha hagarangia na bea ni vogasiha,
hanana na hagarahenga ki akê me bâkoro ngavê.
10Ngaia ki nakagi na mateni
tangagi na tangiani raha ni rotu i rarona na harisi
ma ki katogi ka bâ hihigaga.
Na ruma ni rotu ki tagitagi surigi na ara ni tangiani hagenani,
suria na enoni ka hagarahasia igê na Araha.
11Na Araha ki bonotenia na tasi iana o Tavite
ma ki katoa na arahanga iana o Tavite ki oga hagahu.
Ngaia ki naka na suruheri henia,
hanana ngaia ma na raraha iana ka hahanetaga
ka marungira na Isiraelita.
O Solomo ma ngaira na urusina
12O Tavite ki hagarêgi maninga na ara ni marâ
tanga o Solomo o karena.
O Solomo ki maneraha urusia ma ki tako mataha ngavê.
13Na hearihatana ki mareha rârâ igê na matena
i maneraha suria o Solomo. God ki haganahunia renia na marapeha
suria na agua hagenani i marungia.
Vikana ngaia ki girara i tagarahia tanga na Araha
na ruma ni rotu i gâga hagahu.
14O Solomo, matena go karekare mênga, igo ko takotako mataha ngavê.
Na aitangisiha iamu ki manga na ve i Nile i maganu.
15Na aitangisiha iamu ki anuia na maveta hagenani.
Na maramarêrava ma na hagahinga iamu
ka râhigi na ara ni agua hato.
16Na tarohamu ki râhigi nogana.
Na enoni ka takuigo, suria go hagavorea na marapeha.
17Na apaneni nuni hato getigi i maveta ka konetenigi
na vivita, na maramarêrava ma na maramaraveta iamu
ma na ramateniha iamu ga rongo mataha.
18Igê na raramohana na Araha God iata na Isiraelita
igo ko rurugi haku na siliva ma na golo
tanu manga vi ngaigi ka na kapa ma na poro ma.
19Henaka, ma igo ko vota, suria go meramêru na gete.
20Igo ko hagaerasigi na atami igo ma na raraha iamu.
Tahema na hagaitangiha ki tarahura
renia na bekabekaniha iamu i hagamamasiagara ngavê.
21Na tarana ngekana ki voasia na agua go marungia,
suria ta na maneraha i ura akê me i na apanena iana o Eparaimi.
Vikana i Juta ma i Isiraele karu hepara tare.
22Henaka, ma na Araha ki hetaki tare
ma ki hagamonarigi tare na ara ni suruha hato iana.
Ngaia ki asa vige mutera na raraha iana o Tavite,
suria ngaia ki atea ma ki takuia.
Hanana i hagatahia na varo ninuni iana o Isiraele,
tahema ngaia ki pe nakara na raraha iana o Tavite ke anu râ.
23O Solomo ki me ma ta na hitangita o karena ki maneraha urusia.
Ngaia ka no Regabeama.
Na aitangisiha iana ki kere hagarari
ma na bekabekaniha iana ki raha ngavê.
Na tarana na marungiha iana ki voasira na enoni.
I na apanena iana o Eparaimi ki ura akê igê o Jerobeama.
Ngaia ka no karena o Nebata.
Ngaia ki hagatasira na enoni i na apanena i Eparaimi.
24Na kariana ka bagatauhata ngavê.
Tahema ga tarigenira hura tenia na apanena iata.
25Ngaira ka katogi na ani mavê na eraha.
Rârâ ma na Araha ki hagaitangira renigi.
Currently Selected:
SIRAKE 47: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific