SIRAKE 49
49
O Josia mo Jeremia
1Na takoha aporo renia o Josia ki mamaki
manga na marâ ni sungiha i sigini koro
i toraria na ani i manisingenia;
ki mamaki manga na pirui i harana na enoni
se ki manga na kiha henigi na vaini igê na magotoha.
2Ngaia ki katogi na tarani koro,
suria i hagakorogi aporo na tauhata na enoni
ma ki hatungia na vogasiha ni ataro.
3Ngaia ki toto suria ngavê na Araha
ma ki hagagatagatania na rotu monari
igê na mateni ni aeraha ngegana.
4Na ara ni maneraha hato ka bagatauhata ngavê,
suria ga aharêngigi na ramata iana na Araha raramohaga hunia
mataro me na muritagana na maneraha,
nga noga ma o Tavite, o Hisikia mo Josia.
5Na mamahuara ka nahunigi tenira
na ramoha ma na bâhahanetaganiha iata
6ma ka sungia na hinua apuna,
ma na tara i hinua ka bagubaguruga,
manga o Jeremia i bani visia.
7Na ai ni Jerusaleme ka katoa bera o Jeremia,
henaka vi God ki bani atea ki poropete
i nago tarana i vora me,
‘hanana i pirigi akê ma ki okegi vato,
hanana i hogegi ma ki horogi,
hanana i hagêrasigi aporo ma ki hasihasi.’
O Esekiele ma na poropete tangahuru matarerua
8Na Araha ki hagamarutea o Esekiele renia na bâbâhana raha
igê na kati iata na angero.
9O Esekiele ki hagatakusira na enoni renia na poropete o Jobe,
i katogi tare na tarani ga oto i maana God.
10Na surita na poropete tangahuru matarerua ke mêri aporo,
suria na mane ngegana ka nganganihaga igê na tongesuriha,
ka kanukanura na Isiraelita ma ka hagatahira.
O Serubabele, o Josua mo Nehemia
11Manga i he kaniga girara viga hagarahasia o Serubabele?
Ngaia ki manga na ringi na ata igê na otona rimana na Araha.
12O Josua karena o Josataka ki manga ngekana nogana.
Ngairerua karu tagarahia aporo na ruma ni rotu apuna iana na Araha,
hanana na ruma ni rotu ki rongo raha hagahu na atana.
13Na takusiha aporo renia o Nehemia ki tagenana vikana nikâ.
Ngaia ki tagarahigi aporo na para ni hinua i Jerusaleme ga ahogehoge
henigi na maani para henigi na raburini
ma henigi na ruma iata na enoni.
Na êvarita hagenago na enoni
14I mareha rârâ ta na enoni i maveta vige maratorana o Enoke,
suria God ki torea akê tenia na maveta.
15I mareha rârâ ta na enoni i vora me i maveta
vige maratorana o Josepo.
Ngaia ki raha tangara o veogana
ma ki tamanira na kariana ga hagahigasigi na surina.
Na enoni ka hagahigasira ngavê o Seme, o Seti mo Enosi.
16Ma na ani ga hagahigasia teha ngavê ngaia ka no Atama.
Currently Selected:
SIRAKE 49: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific