SIRAKE 46
46
O Josua mo Kalebe
1O Josua karena o Nune ki na mane ni me ramo
ma ki poropete urusia o Moise.
Na girarana na atana ki vi: ‘Na Araha ni tahinga’.
Ngaia ki hagamonaria na girarana na atana,
suria i hagatahira na enoni God i atera.
Tahema ki rongo raha na atana.
Ngaia ki teharira na merongata na Isiraelita.
Vikana ngaira ka girara ga ogasia na apanena iata.
2Ngaia ki hahanetaga, matena i tagarenigi akê na rimana
ma ki bêngenira na mane ni me iana ka taharigi na hinua raha.
3I bara tani vige ura pusia, suria i râ igê na hearihatani
igê na raramohana na Araha.
4Takusia aporo na matena i katoa na arito ki oga tonge
ma na tangiana gi tage ki borahu manga vi na tangiani gi rua.
5Matena na merongana ka ogarihia ma ka taharia,
ngaia ki avarasia na Araha raramohaga hunia.
Na Araha raha hunia ki aganaria na avarasiha iana
ma ki kasigi na hêni na rangi hurira.
6Na Araha ki hagarangisira renigi na hêni na rangi
ma ki mutera igê na teha i Bete Gorone,
hanana na apaneni nuni hato getigi ka tahetara,
vi o Josua ki ramo teha ngavê,
suria i mane ni me i toto suria na Araha.
7Matena o Moise ki tahitahi mênga,
o Josua ki toto suria na Araha tare nogana.
Ngaia mo Kalebe karena o Jepune
karu ura pusia na haku hagenani iata na Isiraelita,
karu hagamunira, vi siana ka bagahagagege,
ma karu hagabarasira hanana siana ka tasitasi.
8Ngairerua getererua ma i berarogata na 600.000 na Isiraelita
ga aharêvoro igê na bagamasusu raha
kani garu tahitahi ma karu banu igê na agua na mako ango
na Araha i bani surua vi haganahunira renia.
9Na Araha ki haganahunia o Kalebe renia na apekoroha ki ramo.
Ma na matena i gemêa, ngaia ki ramoramo mênga,
hanana i tagere igê na agua i huhunganiga
ma ki henahuraua tangara ngaia ma na raraha iana.
10Vikana na Isiraelita hato ka girara ga tahetara,
vi na tarana koro kaniga amake suria na Araha.
Na mane ni hagaotonga
11Hoi, ga oga nikâ na mane ni hagaotonga.
Na ara ni hitangita ki rongo raha na atana
igê na anina marena na tarana.
Ngaira ka pe vogasira rârâ na ataro
ma ka pe haritohea rârâ na Araha.
12Ge takusira ma ke hagahigasira tare.
Ge mêri aporo tanga na mêriha haoru
igê na ogaha iata na raraha iata ga hagahigasira.
O Samuele
13Na Araha ki takuia o Samuele.
Ngaia ka na poropete iana na Araha.
Ngaia kani monea na ani hagenago na maneraha
renira na maneraha hato ga marungira na enoni.
14Ngaia ki surira na Isiraelita surigi na ramata iana na Araha
ma na Araha ki anumasira.
15Suria o Samuele ki tamasi monari tare,
tahema na enoni ka aganaria, vi ngaia ka na poropete monari.
Na enoni ka tako togo renia,
suria na tamasinga iana ka hagabângenia,
vi ngaia ka na poropete monari.
16Matena na merongana ka ogarihia ka taharia,
ngaia ki avarasia na Araha raramohaga hunia
ma ki vogasia renia na karena sipi.
17Na Araha ki aganaria na avarasiha iana
ma na gugusuhia raha tenia na vavearo ka mutera hato
18na merongana ngaira ma na maneraha ni Pilisitia.
19Matena o Samuele ki sugia ma vige meme,
ngaia ki tamasi igê na monariha i materua na Araha ma na maneraha,
ki vi, vi ngaia ki pe hanagoa rârâ ta na nahuninga iana ta na enoni,
naka ma vi na santele iana ta na enoni.
Ma ki mareha rârâ ta na enoni, vige visia, vi ngaia ki hagaparu.
20I murina i me, ngaia ki tamasi poropete
renia na tarana i page meme igê o Saulo na maneraha.
Tenia na anoanona ngaia ki tamasi poropete,
hanana i taruhigi râ na bagatauhata na enoni.
Currently Selected:
SIRAKE 46: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific