SIRAKE 45
45
O Moise
1Tenira na raraha iana o Jakobo na Araha ki katoa
ki ura akê ta na mane koro i hagakoro obana God.
Na mane ngekê ka no Moise.
Na enoni hato ka hagahigasia.
God ma na enoni hato ka ageagesia.
Na takusiana aporo o Moise ngaia ki hagavorea na koroha.
2Na Araha ki katoa ki hahaneaga mangara na angero,
hanana na merongana ka magutenia.
3I ngekana i Esipito renigi na tamasinga iana o Moise
na Araha ki katogi râ nga na mena.
Na Araha ki katora na maneraha ka hagahigasia o Moise.
Na Araha ki vatea o Moise renigi na ramata tangara na kariana
ma ki hagabângenia tanga na togatogana na bâbâhana raha hunia.
4Na Araha ki atea o Moise i berarogata na enoni hato
ma ki hagapunaria tanga ngaia marena,
suria o Moise ki toto suria ma ki haritagi.
5Na Araha ki metamasi ma ki unia banu igê na vaha puru
ma i ngekana ngaia ki memato hetanga
ma ki vatea renigi na ramata ni mêriha ma ni aitangisiha,
hanana o Moise ki girara i hagesurira na Isiraelita
renia na suruhuri henigi na ramata.
O Arone
6Na Araha ki katoa o Arone ki ura akê.
Ngaia kani tenia na varo ninuni iana o Levi
ma ki hagakoro obana God manga o Moise o vesina.
7Ngaia ki naka na suruheri hagahu henia
ma ki atea ki mane ni vogasiha iata na kariana na Araha.
Ngaia ki hagarahasia, suria i hagatugunia renigi na tuguni bâkoro
henigi na girarana vi ngaia ka na mane ni vogasiha.
8Na Araha ki katoa ki bâ hahanetaga ngavê.
Ngaia ki hagatarêngenigi tanga na girarani ni ramoha.
Ngaigi ka na gahu siki abubu, na tuguni siki borahu
ma na aruha i oga igê na anga ni girarasiha.
Igê na taretarena so na tuguni borahu
ka kuku harahara rihu igê na marâ kukuruta
9henigi na kere belo na golo,
hanana matena i arâ, na enoni i ruma ni rotu
ka rongogi na belo ga hetagitagi:
na girarana vi na Araha ki takusira na kariana.
10Na Araha ki vatea o Arone renia na tuguni apuna, ga hagamahea
renigi na marâ ga hereherega, ka maravarava ma ka rotorotoaga memera.
Ngaia ki vatea na anga ni matona garu oga
na hê ni girarasiha gi rua i rarona: na Urimi ma na Tumimi.
11Na Araha ki vatea renia na hogotekâ memera
i tagarahia na enoni ni manisingeniha,
renigi na hê tangahuru matarerua ga raha na meni
ma ka hanga igê na golo.
Ta na mane ni manisingeniha kani tagarahigi vikana.
Na hê ngegana ka oga i metara na anga ni girarasiha
ma ka tarigi igê na atata na varo ninuni tangahuru matarerua iana o Isiraele,
hanana na Araha ki takusira.
12Ngaia ki vatea renia na bubuhibê
ga tura igê na sigani na golo na tamasinga ga vi:
“Hagapunaria tanga na Araha.”
Na enoni ni manisingeniha kani tagarahia ki bâkoro ngavê.
Na ani i naka i bêna ki mebâ hahanetaga.
13I nago tarana na matena iana o Arone
ka pe bâsigi noga na marâ ga bâkoro ma hahanetaga vigana.
Mareha rârâ ta na enoni, nga noga ma o Arone ma na raraha iana
kaniga tuguni renigi nga ki bê ki arâ.
14I tuguhira viga vogasia na Araha
renigi na vogasiha ni palaua hagerua i na ara ni tangiani
ma ka susu hagamakakagi.
15O Moise ki ringia na oile ni moneha i bêna o Arone
ma ki hagapunaria ki mane ni vogasiha.
Vikana na Araha ki naka na suruheri henira o Arona ma na raraha iana,
hanana vi ngaira ka tagara tanga na Araha mangara na mane ni vogasiha
ma ka nungia na Araha, ki korokoro tangara na enoni.
16Na Araha ki atea o Arone i berarogata na enoni hato,
hanana i vogasia ma ki susu tanga renigi na marâ ga sigini koro,
hanana na Araha ki takusira na kariana
ma ki bonotenigi na tasi iata.
17Na Araha ki hagatarêngenigi na ramata tanga o Arone
ma ki haganahunia renia na ramoha,
hanana i hagaotogi na berarogata na Isiraelita
ma ki hagesurira renigi na ramata.
18Ta na tangiana, matena na Isiraelita ka oga igê na bagamasusu raha,
tani na enoni purua ka mangariaga tanga o Moise
ma ka harikato renia.
Ngaira ka no Tatane, o Abirama mo Koraga henira na kariata.
19Na Araha ki bâsigi na bagatauhata
ma ki mangariaga teha ngavê tangara.
Tahema ngaia ki katoa na mena ma ki mutera igê na mangariaganiha iana
renia na anguruna na bagagi raha.
20Hemuri na Araha ki kasia akê o Arone teharia i nago.
Ngaia ki vatea renigi na nagoni na mu,
hanana na mane ni vogasiha ka nahunigi rako na ngêra.
21Na ngêra iata ka na ngêra na enoni ga vogasia na Araha renigi,
suria i vatera o Arone ma na raraha iana renigi.
22O Arone marena ki pe tonga renia na mako mangara hete na enoni getera,
suria ma apanena iana ngaia, ngaia nga ka na Araha.
O Pinegasi
23O Pinegasi karena o Eleasare ki rongo raha na atana,
suria i toto suria na Araha,
ma ki pe rongo raha na atana mangarerua o Moise mo Arone.
Matena na Isiraelita hato ka murisigea na Araha,
o Pinegasi ki pe magu vige pane henia na Araha.
Tahema na Araha ki bonotenigi na bagatauhata na Isiraelita.
24Vikana na Araha ki naka na suruheri hagahu henia
ma ki kasia ki bâsuria na agua apuna i ruma ni rotu
ma ki raha tangara na kariana, hanana vi ngaia ma na raraha iana
ka mane ni vogasiha teha tare ki bê ki arâ.
25Suria na suruheri henia o Tavite karena o Isai
tenia na varo ninuni iana o Juta,
na kare mane gi tage togo ma ki urusia o vaemana ki maneraha,
ma suria na suruheri henia o Arone
ngaira hato na raraha iana ka mane ni vogasiha.
26Gu hagarahasia na Araha,
suria ngaia ki koro ma ki kasigo akê ngavê.
Ngaia ki haganahunigo renia na takoha mataha,
hanana go surira na kariana igê na otoha,
hanana ngaira ka akê me maninga tare igê na ramana
ma ke rongo raha na atata tare ki bê ki arâ.
Currently Selected:
SIRAKE 45: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific