SIRAKE 44
44
God ki hagabângenia na hahanetagana igê na ogaha iata na Isiraelita
1Hoita, ge hagarahasira na mane i rongo raha na atata,
suria ga toto suria God.
Ngaira ka na êvarika i nago ki râ me.
2Na Araha ki katoa ki rongo raha na atata,
suria ngaira ka hagabângenia me na raramohana i nago ki râ me.
3Tani na hitangita ka maneraha ga marungigi na agua.
Tani ka rongo raha na atata renigi na raramohata.
Tani ka mane ni hagaotonga koro.
Tani ka tamasi poropete.
4Tani ka bêngenira na enoni
renigi na hagaotonga koro ma na aitangisiha iata
ma ka hagamataha obata na enoni renigi na hagesuringa iata.
5Tani ka katogi na vivita ma ka barobaro ki.
6Tani ka ruruguha ma ka raramohaga
ma ka katora na enoni ka oga igê na marapeha i pasita.
7Ngaira hato ki rongo raha na atata igê na mateni iata
ma na enoni ka hagahigasira.
8Tani na hitangita ki rongo raha maninga na atata
ma na enoni ka ama ni hagarahasira nga mataro me i ngekê.
9Ma tani ki ahuni na atata
manga vi ngaira ka pe bani vora me.
Ngaira ka me ma ka ahuni na atata.
Ma ki tagenana ma tangara na raraha iata.
10Ge hagarahasira na mane ngegana ga toto suria God.
Igia ka takusigi mêngagi na tauhata koro.
11Na atata i rongo koro ki tarêhira na raraha iata.
Ngaigi ka na nahuninga iata.
12Na raraha iata ka ama ni tototo suria nga na suruheri,
suria na êvarita ka bani kato me vikana.
13Na raraha iata ki asa vige page hato
ma na atata i rongo raha ki asa vige page ahuni.
14Na gahuata ka bani bagigi
ma na atata ki rongo raha tare ki bê ki arâ.
15Na enoni mahuara ka tarohenigi tare
na takoha mataha iata na mane ngegana
ma na kariana God ka hagarahasira tare.
O Enoke mo Noa
16O Enoke ki hagakoro obana na Araha
ma na Araha ki torea akê i pasina.
Ngaia o Enoke ki na hagararinga renia na takoha mataha
tangara na ara ni apaparaha hato i muri me.
17Na ogaha iana o Noa ki oto igê na ara ni tarani i maana God.
I murina na maganuha raha
ngaia ki vora re na êvarita haoru hagenago na enoni.
Suria ngaia kaniga tahi tani na enoni i maveta
i murina na maganuha raha.
18Na Araha ki naka na suruheri hagahu henia
ma ki surua tanga, vi na maganuha ki asa
vige page hagamagahurua nikâ na mêriha.
O Abarahamo mo Jakobo
19O Abarahamo ka na êvarita na apaneni nuni rako.
Ngaia ki rongo raha na atana, suria i pe tasitasi rârâ.
20Ngaia ki marupegi na ramata iana na Araha raramohaga hunia.
God ki naka na suruheri henia.
Ngaia ki tonga renia na girarana na suruheri igê na apena.
Henaka viga tarahua na heuhungiha,
ngaia ki tototo suria tare God.
21Tahema na Araha ki tohe,
vi ngaia ki page korokoro tangara na enoni hato i maveta
renira na raraha iana o Abarahamo
ma vi na raraha iana ka page rako makira ngavê
mangagi na momo i maveta, ki bara vige tomanigi.
Na Araha ki tohe nikâ, vi page kasira akê
teharira na enoni getera hato i maveta,
ma ki page haganahunira renia na mako
i haganega i ta apanena na asi tanga i ta apanena,
tenia i Uparatesi tariha igê na agua, i hato igê na maveta.
22Na Araha ki suru vikana nikâ tanga o Isako,
suria o Abarahamo ka no vaemana, ma nikâ tanga o Jakobo,
vi renira na raraha iana
na koroha ki page tarahura na enoni hato i maveta.
23Na Araha ki hagagirara bâkoro o Jakobo,
vi ngaia ki page korokoro tanga.
Ngaia ki haganahunia renia na mako
ma ki voasia tonganira na varo ninuni tangahuru matarerua.
Currently Selected:
SIRAKE 44: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific