SIRAKE 43
43
1E, na vavearo i bagora se i tarapa, ki bâkoro ngavê!
Ngaia ki bâ hagavagevage ngavê na bâkorohana!
2Na arito, matena i raboa, ki bâkoro ngavê.
Ngaia ki na tagaraha bâkoro iana na Araha God
ma ki hagakonegia matena i raboa me.
3Igê na ritovagana ngaia ki sinaria na mako.
Ti ki girara i rêra tanga na singihana?
4Na gi ki singia na enoni i hihisia
ma na arito ki singigi ngavê na hungani.
Na arito ki uhia na singihana
ma na togatogana ki guruha re na maaka.
5Na Araha raramohaga hunia ki hagavora na arito
i tê viteana ma ki tangotango suria na tarana.
6Na hageha nikâ ki mave surigi na mateni iana.
Ngaia ki gâga hagahu,
hanana i hagagirarara na enoni renigi na mateni.
7Ngaia ki hagagirarara renigi na mateni ni tangiani raha.
Ngaia ki hagenani ma ki apapa.
8Na hageha ki torea na atana ngaia.
Ngaia ki koro tanga viga bâsia
i rikiriki me mataro me ki hagenani.
Ngaia ki bêngenigi na marâ i vavearo
matena i mave i bevoa.
9Na mavetani na higu ka katoa na vavearo ki bâkoro ngavê.
Ngaigi ka na rêni iana na Araha ga marora i vavearo.
10Ngaigi ki oga igê na atohani
na Araha God ki nakagi tangagi
ma ki asa vige oga siape igê.
11Bâsia na rorovagaro!
Hagarahasia na ani i hagavora.
Na bâkorohana ki mave ma ki bâ hagatage.
12Ngaia ki manga na epage na Araha God i roroa.
Ngaia ki na aroroha na bâkoroha i ura i ngekana.
13Na Araha God ki bonasia na rangi anumaga ki rangirangi.
Ngaia ki bonasia na marangeia ni suriha iana ki sisiki.
14Ngaia ki tangahigi na ruma ni vaha
ma na vaha ka gaha hura manga na manu.
15Igê na raramohana ngaia ki hagavoregi na vaha puru
ga ususu na êsusuni na hê ni rangi.
16-17Na ringena na akuruha raha ki ngingia na ano.
Igê na raramohana God ngaia ki katogi na hungani ka gisigisi.
Matena God ki obania, na târagina ki rêra,
na maguara ka aripo ma na totomanihê ka rêra.
Ngaia ki katogi na hê ni rangi ka hagavato
mangara na manu se na totoha ni pê.
18Igia ka konetenigi na mahuigani ma na bâkorohani.
Igia ka konekone, matena ga bâsigi i votavota.
19Ngaia ki kamusia gahuia na ano renia na korupu i rate
i anumaga ngavê manga na aisi,
ki bâ manga na solo ma ki masi manga na tone.
20Na roga i anumaga ngavê ki rêra
ma ki katoa na ve ki voravora re na aisi.
Na ve ma na rano ka voravora re na aisi.
Na basini ki rate manga na mane ni me i tuguni renia na kapa.
21Na roga mahana ma na arito ru
karu katogi na hungani ma na bena ki avagavaga
ma na go ka marama renia na bababaterua.
22Ma ki page arihu ma na ara ni marâ ka mauri aporo
renigi na vaha ma na korupu, ga hatungia na mahananiha.
23God ki hagamanata na asi suria na katoha iana
ma ki nakagi na marê igê.
24Na mane tagara igê na haka ka tamasigi na perenga i asi
ma igia ka konekone, matena ga rongogi na sihonga iata.
25I asi ka oga igê na marâ ni hagakoneha
igia ka pe bani bâsira:
na ataka mavê na ega ma na bagaega raha hunira.
26Na Araha ki katoa na ara ni hitangita na ani i hagatorangenira
ki akê me bâkoro igê na tagaraha iana
ma na ara ni marâ hato ka tagara suria na tamasinga iana.
27Henaka vi hagehita igia ka tamasi,
igia ki asa vige tamasigi ngaigi hato.
Ma na tarana i rongo mataha hete kani manga ikê:
Na Araha ka na ara ni marâ hato.
28Manga i he kaniga girara ga hagarahasia
manga ko hanana nogana i marisina?
Ngaia ki raha teharira ngavê na ara ni marâ i hagavorara.
29Na Araha ki bâ mamagutaga, suria i raha teha ngavê.
Na raramohana ki hahanetaga ngavê.
30Mu ama ni uhungia nga kamu hagarahasia na Araha,
suria i bara vigamu hagarahasia manga ko hanana nogana i marisina.
Mu ama ni hagahigasia nga i mêrihami hagenani,
suria i bara vigamu hagahigasia manga ko hanana nogana i marisina.
31Ti ki bâsia? Ti ki girara i ramatenia maninga?
Ti ki girara i hagarahasia manga ko hanana nogana i marisina?
32Igia ka girara sisite râ ma.
Rako na tarani raha renia igia ka pe hagaregi.
Igia ka bâsigi tani ma na tagaraha iana.
33Na Araha ki hagavoregi na ara ni marâ hato
ma ki haganahunira na enoni ga toto suria
renia na takoha mataha.
Currently Selected:
SIRAKE 43: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific