SIRAKE 42
42
1Ikê na tarani ga pe ararigamu, vigamu maki rinigi.
Siana kamu gahesurira na enoni i era ma kamu tasi.
2Siana kamu migimaki na ramata ma na suruheri iana God.
Siana kamu maki, matena ga surira na enoni era igê na otoha.
3Siana kamu maki, matena mu tamanira na tamami renigi na haga
igê na râha iami se igê na tagaraha ni haga iami.
Siana kamu maki, matena mu tonganigi na nahuninga ga meme tenigi.
4Siana kamu maki, matena mu pe ravarava haga
ma kamu hagararingenigi maninga ma na higahigani.
5Siana kamu maki, matena mu hagavarahagi na haga,
henaka ga sisite se ga raharaha.
Siana kamu maki, matena mu mehekarigi na enoni i hagavuri,
hanana vi gurua so na mena na marâ.
Siana kamu maki, matena mu hagaotora ramo na karemi.
Siana kamu maki, matena mu ramusia ki mamari
na kare rakuraku iamu i pe koro.
6Manga go pe girara vi gu hagêguritogo renia kaniamu
se renia vi ga rako na enoni,
siana ko maki vigu nakanaka bâkoro na marâ,
hanana siana ka hanagogi.
7Siana ko maki vigu tomanigi na marâ ga hagavuringenigi
se vigu hagararingenigi na hagahigani.
Siana ko maki, vigu segegi so na marâ
ga bêbanu me se ga huhura.
8Siana ko maki, vigu ramonia na ani i têtê bekabekaga
se na meraha i rongo era henira na kere gete.
Manga go katokato vigana,
igo ko hagatogo surigo maremu maninga
ma na enoni hato ka page hagahigasigo.
Na mane ki anumasia ka karena
9Tanga na mane ka karena ki manga na ruruguha raha,
i katoa o vaemana ki pe mauru bore renia,
suria ngaia ki anumasia.
Matena ka karena ki kare viru mênga,
o vaemana ki takoha bâraha renia vi ngaia vari ki auragi.
Ma na matena ka karena ki auragi hato,
o vaemana ki takoha bâraha, vi i era ma o vaniana ki kitenia.
10Matena ka karena ki kere gete tatara mênga,
o vaemana ki takoha bâraha vi i era ma
ta na mane ki hagaerasia ka karena ki obara,
matena i gâga so mênga i ruma iana.
Matena ka karena i auragi hato,
o vaemana ki takoha bâraha renia vi i era ma
ki oga erasia o vaniana,
se i era ma ki gomara.
11Manga ka karemu ma ki togeaga ki arâ suri parongana marena,
hoi, go hahutugia maninga,
i era ma na merongamu ka megomarabe renia, ma ki era ma na enoni i pasimu ka rurusigo,
ka tamasi erasigo ma ka hagamakigo.
Go girara, siana ka karemu ki kikirihi hura
igê na mabaha se vi i maani ruma.
12Siana ki rêra haha i maata na mane
se i barisuri tamasinga ma henira na gete.
13Na hasikoko ki arâ me tenia na gahu.
I tagenana ma na eraha iana ta na gete
ki arâ me tenia na gete getea.
14Na mane i suraga ki koro teharia na gete i haritagi,
suria na gete ka hagavoregi ma na makiha
ma na tamasinga ni hataerana.
Na marâ ka hagabângenia na hanetagana God
15Hoi, inê be hagatakusigamu renigi na tagaraha iana na Araha
ma be tamasigi na marâ gê bani bâsigi.
Na Araha ki tamasi ma, ma na tagaraha ka vora me
ma na marâ hato i hagavorara ka tê viteana.
16Na arito ki mavesira so na marâ hato
ma ngaigi ka hagabângenia na hanetagana na Araha.
17Na Araha ki pe haganahunira na angero iana
renia na giraraha, hanana vige tamasigi na tagaraha rako hato iana,
na tagaraha God raramohaga hunia i nakagi
ka tâtâ hagahu renia na raramohana raha.
18Ngaia ki aitangisigi na rutuni na asi
ma na aitangihata na enoni
ma ki giraragi na marâ ga pinihi igê,
suria na Araha God ki giraragi na ara ni marâ hato
ma nikâ na marâ hato ga page akê me i muri me,
henaka vi i na keta.
19Ngaia ki giraragi na marâ ga bani vora me
ma na marâ ga page voravora i hemuri me.
Ngaia ki hagahurasigi na marâ ga pinihi ngavê.
20Ngaia ki giraragi na ara ni takotakoha hato iaka
ma ki rongogi na ara ni tamasinga iaka.
21Igê na takoha mataha iana
ngaia ki maningaigi na ara ni tagaraha hato iana.
Ngaia ki bani oga me tare ma ki page gâga tare ki bê ki arâ.
Ngaia ki asa vige riariaga.
I asa iaka vige naka akê nikâ henia ta na marâ
se vige tavoa râ tenia ngaia.
Ngaia ki girara erasigi ngavê na ara ni marâ hato.
Tahema ngaia ki pe obania na hagaotonga.
22Na tagaraha hato iana ka bâkoro ngavê
ma igia ka bâbâ marangani râ ma.
23Ngaigi hato ka mauri ma ka gâga hagahu
ma ka têtê viteana tare suria na katoha iana.
24Na ara ni marâ ki oga na tongana i tora getea tenia
ma ngairerua karu hearari.
Henaka vikana, ma na ara ni marâ hato
na Araha ki hagavoragi ka hagenani.
25Na ara ni marâ ki hagabângenia na girarana na tongana.
Ti ki bâsia makira na hanetagana God?
Currently Selected:
SIRAKE 42: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific