SIRAKE 41
41
Renia na mera
1Mera, na takoha renigo ki mahe tanga na enoni
i gâga igê na ramana, ki vagevagesigi na nahuninga iana,
ki ape haritagi, suria i akê me bâkoro,
ma ki ageagesigi mênga na ngêra.
2Mera, na râha me iamu ki hagakoro obana na enoni
i matareha ngavê, ki ama ni soso nga na ramoha iana,
ki gemêa ngavê ma ka aharêsia na anumanumaha,
i guru na maana ma ki pe takotako togo.
3Siana ko magutenia na mera igê na matena tanga.
Takusira na ani ga hagenago me taramu
ma na ani ga hagemurigo me.
4Na Araha ki bani surira na marâ hato
ga nahuni rogaroga ni mêriha,
hanana ga meme.
Tanu hega ko hagagege renia na Araha i obania vikana?
Henaka go gâga na tangahuri harisi
se na tangarê se na rehagaro,
igê na agua iata na enoni ga bani me
i asa vigu hagagege vi abubu se i arihu na ogaha iamu.
Na meta na enoni era
5Ga kikitenira na kareta na enoni tasi,
suria ga oga i pasita na enoni ga pe botage renia God.
6Ngaira ka page tê tara renigi na nahuninga
ga nahunigi tenira na enata
ma na makiha ki gâga hagahu henira.
7Na kare ka page visira bera na enata
renia na makiha i tarahura,
suria na enata ka pe botage renia God.
8I page era ngavê tangagamu, igamu na mane mu aharê,
suria mu pe râ surigi na ramata iana na Araha God.
9Manga ga rakorako na karemi,
na bagabevoani ka page tarahura.
Manga mu apara kare,
na mamasiaganiha ma kaniga page aharêsigamu.
Manga mu tapasu kamu votavota,
na enoni ka page manavatenigamu ngavê.
Ma na matena mu meme, na enoni ka page ama ni arangenigamu nga.
10Na ara ni marâ ga vora me tenia na mako
ngaigi hato ka page aporo tanga na mako.
Tagenana ma na enoni erataga ki tâ tangara na mera
ma ki magahuru ngavê.
11Na apena na enoni ki manga na kere manavaso ma
ma ki magahuru râ.
Matena na atana na enoni i tê viteana God ki rongo koro
ma na atana i rongo koro ki asa vige page magahuru.
12Go metanu na atamu,
suria ngaia ki gâga arihu teharigo igo,
teharigi rako na ruma ni ruruguha ga vunu renigi na golo.
13Na ogaha koro iamu ki gâga hagarari râ ma
ma na atamu i rongo koro ki gâga hagahu.
Renia na makiha
14Kakare, mu arâ suria na hagesuringa iaku tangagamu,
hanana mu gâga igê na marapeha.
Na takoha mataha i pe vagavaga me mave
ngaia ki manga na ruruguha i pinihi i ano.
Ngairerua tagenaterua karu oga hagâbo ma.
15Na enoni i pipinihia na bekabekaganiha iana
ngaia ki teharia na ani i pinihia na takoha mataha iana.
16Kakare, mu karingê.
Inê be hagesurigamu renigi na mateni
i ararigamu vigamu maki igê,
suria i ta na matena ki pe ararigamu vigamu maki.
17Mu maki i maata na enami renigi na rongoeraniha.
Mu maki i maata na enoni raha ma na ani ga nahuni ramoha
renigi na hagaparunga.
18Mu maki i maata na mane ni suriha
renigi na ogasutaganiha.
Mu maki i maata na enoni ga hekarigi
renigi na aharêngiani na ramata.
Mu maki i maata na tamami se na ngahisimi
renigi na hagahagaparunga.
19Mu maki i maata na enoni i hinua iami
renigi na hanagoha.
Mu maki i maana God,
matena mu pe hagamonarigi na suruha iami tanga.
Mu maki, matena mu gâga nunuhigi na ngêra.
Mu maki, matena mu votovoto ma makuku.
20Mu maki, matena mu pe heari bê aporo.
Mu maki, matena mu boretenia na êrâ.
21Mu maki, matena mu sirabare tenia na enoni.
Mu maki, matena mu pe vatea na enoni na marâ i oto tanga.
Mu maki, matena mu boretenia kaniana na mane getea.
22Mu maki, matena mu rapasia na kere gete vurivuri iami.
Siana kamu arâ i bea iana.
Mu maki, matena mu guharira na tamami.
Mu maki, matena mu tamasi surigi na mahatanga iami.
23Mu maki, matena mu toratora tamasinga,
se mu tarohenigi na marâ ga arari vigamu pinihigi so.
Nga na mateni ga ararigamu vigamu maki renigi ngegana.
Manga ngekana, na enoni ka page hagahigasigamu.
Currently Selected:
SIRAKE 41: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific