SIRAKE 40
40
Na ogaha iana na enoni ka na mamasiaganiha
1Rako na mamasiaganiha ka tâ tangagia na enoni.
Igia ka tora higa
haganega me tenia na matena igia ka hura me tenira kenaka
ki râ ki tariha igê na matena igia ka bêbanu aporo igê kenaka na mako.
2Igia ka anumanuma ma ka bubununuga,
suria igia ka tako bâraha renia na matena i muri,
renia na tangiana ga page meme igê.
3-4Igia hato, henaka na maneraha igê na atohana bâkoro
i tuguni bâkoro ma ki oga na taripuri i bêna,
se na enoni i matareha ngavê ma ki tuguni kakaga
ma ki gâga hurihuri so ma igê na rahu.
5Suria na ogaha hagenani iaka ka tarahugia
na mamasiaganiha ma na hengariha,
na sutaganiha ma na bagabevoani,
na maguteniana na mera, na heparaparaniha ma na hearihatana.
Henaka vi igê na bungiana matena ga tâtâ i bea,
igia ka bagamamêru, ka nahuigia na takoha raha.
6Igia ka mauru sisite ma, se i mareha ngavê.
Manga ga mauru, ki meme ngavê na apeka,
manga vi ga tagara raha igê na tangiana,
suria igia ka bagamamêru.
Manga vi igia ka gavatenira na merongaka.
7Ma na matena ngaira ka sugi taugia,
igia ka gasuga ni riterite ma ka konekone,
suria i mareha ta na marâ vige magutenia.
8Na marâ ga hagamamasiagagia igia hato,
igia na enoni ma na marâ mamauri getera,
ma ka hagamamasiagara teha ngavê na enoni tasi,
9ka na mera, na hearihatana, na heariha, na nahunga ni nuni,
na bagabevoani, na magêha, na maeha ma na ringa.
10Na marâ hato ngegana ka tâ tangara na enoni ga aharê.
Ngaira nga kaniga hagavorea na maganuha raha.
11Na ara ni marâ ga râ me tenia na mako
ka aporo tanga na mako,
mangagi na ara ni rangi ma na ve
ka aporo tanga na asi.
Na eraha ki hagavorea na eraha
12Na marâ, na vatevateha ma na peotoha garu hagavoregi,
ka page magahuru,
ma na marâ, na totohesuringa ki hagavoregi,
ka gâga hagahu.
13Na ruruguha ga nahunigi igê na tarana i pe oto
ka manga na marave
se manga na akurua i raboa râ ma ki hatohato.
14Manga na enoni i mahata, ka mahata bê aporo tanga.
I tagenana ma na enoni tasi i hagaratena marena.
15Na kareta na enoni tasi ka pe tataka,
suria ngaira ka mangagi na rauga
i gaga na vagani igê na hê,
16se ga mangagi na rauga i na akerena na ve
ga maria hagenago tarani ani getigi.
17Na koroha ki hagavorea na koroha hagahu.
Na takiha ni hetamaniha ki asa vige page bonotenia.
Na tarana i teha ki na hagahigasiana God
18Na enoni ki ageagesia na ogaha iana,
manga vi ngaia ma ki gâga haha renigi na nahuninga iana,
se i tagara raha ma ki nahunia na ogaha koro.
Ma na enoni i tarahua na ruruguha raha
hete kani ageagesia ngavê na ogaha iana teharirerua.
19Na enoni i apara kare ma ki haganega na hinua raha
na atana ki page rongo raha hagahu.
Ma na enoni i tarahua na takoha mataha,
ngaia hete kani teharia.
Manga na enoni ma ki nahuni togoha ma na suringa
ngaia ki rongo raha na atana.
Ma na enoni i auragia na gete koro,
ngaia hete kani teharia.
20Na tonoha ma na mâha karu hagakoro obana na enoni.
Ma na êragiha koro hete kani teharirerua.
21Na êhihi ma na kita ka rongo koro
ma na ringe i marava hete kani teharigi.
22Na manâhiaganiha ma na bâkoroha karu bâ hagavagevage
ma na mu haoru i akê bâkoro hete kani teharirerua.
23Na enoni i nahunia na tamana se na ngahisina
ki asa vige tarupe, suria garu hagaotoa bâkoro.
Ma na mane i auragia na gete ni takoha mataha,
ngaia hete kani teharia.
24I koro tanga na enoni,
manga vi tongatonga renira na goana ma na ngahisina,
matena i gâga igê na mamasiaganiha,
ma na takiha ni hetamaniha hete kani teharira.
25Na enoni ki hagêgurirerua na golo ma na siliva
ma na hagaotonga koro hete kani teharirerua.
26Na nahuninga ma na ramoha
karu katoa na enoni ki takotako togo.
Ma na hagahigasiana na Araha hete kani girara
i katoa ki takotako togo ngavê.
Na enoni i hagahigasia na Araha,
ngaia ki asa vige abubu igê ta na marâ
ma ki pe tangasia me vi ta na marâ râ nikâ.
27Na hagahigasiana na Araha ki manga na agua ni koroha hagahu.
I anumasia na enoni teharia na ani i nahuni ramoha raha.
Renia na baganunungiha
28Kakare, siana ko gâga igê na ogaha ni baganunungiha.
Na mera ki koro tangago teharia na baganunungiha.
29Manga go gâga hagêgurira tare na enoni getera,
na mêriha ta kani iamu?
Igo ko hagamakigo maremu, suria go baganunungi ngêra.
Na enoni i nahuni takoha ma ki oto suria marena,
ngaia ki kitenia ngavê na baganunungiha.
30Na enoni i baganunungi ki girara i hagamemesi ringena
ma na makiha ki manga na gi igê na aitangihana.
Currently Selected:
SIRAKE 40: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific