SIRAKE 39
39
1Ma na mane i raha i bêna na hagesuringeniani
na ramata iana na Araha God,
ngaia ki tora getea.
Ngaia ki hagesuringenigi na buka na takoha mataha
iata na enoni i nago
ma ka tâtâ igê na aitangihana na tamasinga iata na poropete.
2Ngaia ki nakagi igê na aitangihana
na tamasinga iata na mane i rongo raha na atata
ma ki manisingenia i ramatenigi na tamasinga maramaraveta.
3Ngaia ki hagesuringenigi na girarani na maramarêrava
ma ki aitangisigi na hagahinga.
4Ngaia ki tagara tangara na maneraha
ma ki gâga henira na ani ga nahuni ramoha.
Ngaia ki râhigi na agua getigi,
hanana i hagakitakitagi na marâ i berarogata na enoni
vi na ta ki koro se i era.
5Ngaia ki bani riterite
ma ki nunginungi i mêrihana hagenani
tanga na Araha i hagavora.
Ngaia ki avarasia na Araha God
ki bonotenigi na tasi iana.
6Manga vi na Araha raramohaga hunia ma ki agana,
ngaia ki haganahunia renia na aitangisiha.
Na tamasinga ni takoha mataha ka tehe hura tenia na harana
ma na matena i nunginungi
ngaia ki visia koro na Araha.
7Ngaia ki nahunigi na giraraha ma na hagaotonga koro
ma na aitangisiha renigi na takoha pinihi iana na Araha.
8Ngaia ki hagabângenia na hagesuringa i tavoa
ma ki ageagesigi na ramata na suruheri iana na Araha.
9Rako na enoni ka hagarahasia renigi na takoha mataha iana.
Ki page rongo raha na atana tare ki bê ki arâ,
suria na apaparaha i muri me ki asa vige page bonotenia.
10Na enoni i na agua getigi ka page tamasigi na takoha mataha iana
ma na enoni i ruma ni sukuru ka page hagarahasia.
11Manga i mauri arihu,
na atana ki page rongo raha teha ngavê, matena i meme.
Manga i meme, matena i mamênga vige rongo raha na atana,
ngaia ki togotogo ma na aitangihana.
Na ki ni hagarahasiana God
12Inê be visigi tani nikâ na takoha iaku,
suria inê kê vunu manga na hageha i hagenani.
13Kakare, mu tê viteana God, mu karingê.
Mu takataka mangagi na mahe i na akerena na ve.
14Mu sigini koro renigi na vanuhani koro,
manga na marâ i sigini koro matena ga sungia.
Mu takataka mangagi na mahe siki.
Mu kiki haku kamu hagarahasia na Araha.
Mu visia koro renigi na tagaraha hato iana.
15Mu tarohenia na atana ke rongo raha.
Mu ki henigi na kita kamu hagarahasia vikê:
16Na tagaraha hato iana na Araha ka koro ngavê.
Na bonasiha iana ka vagavaga me mave igê na mateni tange.
17Siana kamu hagate, kamu vivi:
“Na ta ikê? Tanga na ta?”
Na aramiha ka page vagavaga me mave igê na mateni tange.
Ngaia ki haribona ma na ve ki hato vige gogogo
ma ki manga hete ki akê.
Ngaia ki marungigi na roto ni rangi.
18Matena i haribona,
na marâ i obanigi ka vagavaga me mave ototo râ nga.
I asa ta na marâ ge girara
vige hagabarasia na raramohana ni hagatahinga.
19Ngaia ki bâsigi na tauhata hato na enoni.
I mareha rârâ ta na marâ vige girara ge pinihi tenia.
20Ngaia ki bâsigi haku na ara ni marâ hato,
haganega me tenia na haganegahana ma tare ki bê ki arâ
ma ki mareha rârâ ta na marâ vige girara ge hagagasugania.
21Siana kamu hagate, kamu vivi:
“Na ta ikê? Tanga na ta?”
Suria ngaia ki hagavoragi na ara ni marâ hato
tangagi na marâ i takusigi.
22Na korohana ki manga na ve i maganu
ma ki anuia ki ango na mako i beratega.
23Tagenana ma i horoa na ve oto ki marasiga ngavê,
ngaia ki horoa na mangariaganiha iana tangara na enoni
igê na agua ga pe tê viteana.
24Tangara na enoni ga tê viteana
na tara iana na Araha ka manamanaga.
Ma tangara na enoni era ngaigi ka sutasutaga.
25Tenia na haganegahana
na marâ ga koro ka tâ tangara na enoni koro
ma na marâ era ka tâ tangara na enoni era.
26Na marâ na enoni ga obanigi bâraha tanga na mêriha
teharigi na ara ni marâ getigi, kani igê:
na ve, na gi, na aiani, na asi, na ngêra,
na pirui, na tavoni na susu, na vaini,
na gahu ma na oile ni olive.
27Na marâ hato ngegana ka tamanira na enoni koro
ma ka hagarateta na enoni era.
28God ki hagavoragi tani na roga raha
tanga ga hagaitangira na enoni.
Na raramohana ka girara ga hitahita raramohaga ngavê.
Igê na mateni ni hagaitangiha na raramohana ka rarata
ma ka hatungia na mangariaganiha iana na Araha i hagavoregi.
29Na gi, na rangi na hê, na magêha ma na mera
God ki hagavoragi tanga na hagaitangiha.
30Na rivota na marâ vasiga, na rorogahua ma na ma,
na tatapa borahu i nahu hunira na enoni era,
na Araha ki hagavoragi tanga na hagaitangiha.
31Ngaigi hato ka ageagesia na bonasiha iana na Araha
ma ka nanê ka tagara tanga igê na mateni i obanigi.
32Na marâ gê bani girara me i nago vê
ma kê takoha renia ma kê kahu segea so, ki manga ikê:
33Na marâ na Araha i hagavoragi, ngaigi hato ka koro
ma igê na mateni tange ngaia ki votogi na marâ
na enoni ga obanigi.
34Siana kamu vivi: “Na ani ikê ki era teharia na ani ikana.”
Suria na ara ni marâ ka koro igê na mateni tange.
35Hoita, mu hagarahasia na Araha i mêrihami hagenani
ma kamu kasia akê, ki rongo raha na atana.
Currently Selected:
SIRAKE 39: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific