SIRAKE 3
3
Hagahigasira na enami
1Kakare, mu karingê, suri inê ka na vaemami.
Mu têtê viteaku hanana mu page tahi,
2suria na Araha ki haganahunira o vaema ni kare
renia na ramoha hanana ga hagaotora na kareta
ma na kare ki tuguhira ga têtê viteata kenata.
3Manga mu hagahigasia o vaemami,
igamu kamu tarahua na bonoteniha ni tasi.
4Manga mu hagahigasia kenami
igamu kamu manga na ani i rurugi na ruruguha.
5Manga mu hagahigasia o vaemami
igamu kamu page ageagesira nogami na karemi
ma na Araha ki page aganarigi na nunginungiha iami.
6Manga mu hagahigasia o vaemami
igamu kamu page mauri arihu.
Manga mu têtê viteana na Araha,
igamu kamu page hagahigasia kenami.
7Manga mu hagahigasia na Araha
igamu kamu page hagahigasia o vaemami
ma kamu page têtê viteaterua na enami
manga vi igamu ka na kare rakuraku iaterua.
8Mu hagahigasia o vaemami
igê na tauhami ma na tamasinga iami
hanana ngaia ki korokoro tangagamu.
9Na korohana na vaema ni kare
ki hagagatagatanigi na ruma iata na karena
ma na arangeniha iana kenata ki ruhuruhugi.
10Siana ki akê na ageagemi,
suria vigamu hagamakia o vaemami,
suria na makiha iana ki kasigamu so.
11Na enoni ka kasigamu akê
suria ma mu hagahigasia o vaemami,
ma ka hagamakigamu, manga mu pe hagahigasia kenami.
12Kakare, go marupea o vaemamu matena i gemêa.
Siana ko hagabono obana matena i tahitahi mênga.
13Henaka i bonobonoga,
go haritagi ma ko korokoro tanga ma.
Siana ko makimakitenia,
suria ma vi igo ko ramo ma ko apekoro.
14Na Araha ki asa vige bonotenigi na korohamu tanga o vaemamu.
Vikana igo ko hagakorogi aporo na marâ
na tasi iamu ga erasigi.
15Matena i tarahugo na bagabevoana,
na Araha ki takusigi aporo na korohamu
ma ki page tamanigo.
Na tasi iamu ka page magahuru
mangagi na kârupu i sinarigi na arito.
16Na anima na enoni i rumakaka renia o vaemana,
ngaia ki manga na enoni i tamasi erasia na Araha,
ma na ani i hagamamasiaga kenana,
na hagaitangiha tenia na Araha ki bani oga tanga.
Na haritagiana
17Kakare, gu haritagi igê na ogaha iamu
ma hanana na enoni ka page takuigo
teharia na ani i mahata tangara.
18Go ama ni akê nga, ko ama ni haritagi nga
ma na Araha ki page obakoro renigo.
19Rako na enoni ka oga igê na tagaraha raha
ma ki rongo raha na atata,
ma na Araha ki hagagirarara na ani ga haritagi
renigi na katoha pinihi iana.
20Na ramoha ma na takiha iana na Araha karu raha teha
ma ngaia ki hagagirarara na ani ga haritagi
renigi na katoha pinihi iana.
21Siana ko uhungia vigu aitangisigi
na marâ ga bara bâraha tangago
se na marâ go arisigi vigu aitangisigi.
22Go tâtâ nga igê na ramata tangago.
Siana ko takoha bâraha renigi na marâ
na Araha ki pe ranganigi tangara na enoni.
23Siana ko aruma renigi na marâ go arisigi,
suria na marâ ga bani hagesurigo igo renigi
na enoni getera ka arisigi vige aitangisigi.
24Rako na enoni ga râ tasi surigi na takotako iata mareta.
Suria ngaira ka nahunigi na takoha bekabekaga,
tahema ki bara ngavê tangara vige tako mataha.
25Manga gu pe tonga re maamu, ki asa ma vigu bâbâ.
Manga go pe girara, siana ko vivi, vi igo ko girara.
26Manga go togeaga, igo ko page hagaratemu maremu.
Manga na ogaha iamu ma ki perengaga
igo ko page meme renia.
27Na enoni i togeaga,
ngaia ki page hagamamasiaga so marena.
Na enoni i togeaga ki tasitasi,
ngaia ki pagegi na tasi.
28I bara vige hagaotora na enoni ga paroparo,
suria na vagani na eraha ka so ngavê igê na aitangihata.
29Na enoni ni aitangisiha ka hagesuringenigi
na maramarêrava ma na maramaraveta.
Ngaira ka karinga maninga suria ga obania viga girara.
30Na ve ki hunuia na bagagi raha.
Na mahatangana na enoni ki ahunigi vê na tasi.
31Na enoni i barua na tauhana na enoni getea
renigi na korohana tanga,
ngaia ki takusia na matena i muri me,
suria matena i votavota
ngaia ki page tarahua na hetamaniha.
Currently Selected:
SIRAKE 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific