SIRAKE 38
38
Na maeha ma na hagakomaganiha
1I ararigo go hagahigasira na enoni ni hagakomaganiha,
suria na Araha ki hagavorara tanga na tagaraha iata.
2Na giraraha iata renia na hagakomaganiha
ki râ me tenia na Araha God
ma na maneraha ka vurira renigi na tagaraha iata.
3Na manisingeniha iata ki kasira akê
ma na enoni ni ramoha ka hagahigasira ngavê.
4Na Araha ki katogi na rauga ni hagakomaganiha
ka akê i maveta
ma na enoni ni takoha ka pe usitenigi.
5I hega, na apinige ki pe hagamamakia vari na ve i mahe,
hanana i hagabângenia na raramohana na Araha?
6Na Araha nga kani haganahunira na enoni
renia na giraraha renigi na rauga ni hagakomaganiha,
hanana igia ka hagarahasia renigi na mena iana.
7-8Na ani ga aitangisigi na rauga ngegana
ngaira ka tagarahigi tanga na hagakomaganiha
ma ka hatungigi na haraniha ma na maeha renigi.
Na tagaraha iana na Araha ka ama ni arâ nga,
suria i haganahunira na enoni i maveta renia na apekoroha.
9Kakare, matena go maeha, siana ko hetora huri
ma ko avarasia hete na Araha
ma ngaia ki page hagakomagago aporo.
10Go murisigegi na bagatauhamu
ma ko kasigi râ na eraha tenia na aitangihamu
ma ko togeaga ko hagakoro obana God igê na ogaha iamu.
11Go sungigi na marâ i sigini koro tanga na Araha.
Ma ko tagarenia na votovoto na ngêra mora tanga.
Go mahata ngavê manga i ararigo.
12Hemuri ko unia na enoni ni hagakomaganiha,
suria na Araha kani hagavora.
Go têtê ngania, suria go obania nogana.
13I ta na mateni na apekoroha aporo iamu
ki hagêguria ngaia,
14suria na enoni ni hagakomaganiha
ngaia ki avarasia nikâ na Araha,
hanana i girara i hatungia na haraniha
ma ki hagakomagara aporo na enoni ka mauri arihu.
15Tanga na enoni i haritohea God i hagavora,
ki araria i maeha,
hanana i bâsia na enoni ni hagakomaganiha.
Na angiha maramara
16Kakare, go angisia na enoni i meme.
Go angiangi maramara, suria i rugu na obamu.
Go bagia maninga ma ko hagahigasia na anoanona.
17Go angiangi raha, ke hura mave na hetakiha iamu.
Go arâ suria na matena na hagahunu bungi
ma ko angiangi maramara suria na tangiana gi tage se gi rua,
hanana siana na enoni ka tamasigo.
Hemuri ko nakara na enoni ka haganaku parongamu
ma ki manava na obamu.
18Manga i mareha, igo ko page maeha renia
ma ki pe bara vigu me nogamu.
19Matena i meme na ani go takuia bâraha
na hetakiha iamu ki asa vige hato rêrê.
Na ogaha igê na hetakiha ki manga na ogaha igê na matarehana,
suria na matarehana ki hagavoregi rako na mamasiaganiha.
20Siana ki aharêsigo bâraha na hetakiha.
Go naka vê, i era ma ki hagamesigo.
21Go girara, na enoni i meme, ki asa iana vige page aporo me.
Na hetakiha iamu ki asa vige tamania ngaia
ma ki hagaratemu igo hete.
22Go girara, igo ko page me nogamu.
Ngaia i nanora ma igo i gomaha.
23Matena na enoni i meme ki mamaro,
na takoha iamu renia ki mamaro nga nogana.
Matena i bani magahuru, go bonotenia vê.
Na hagesuringeniha
24Manga na enoni ma ki hagesuringenia na buka ni ramata
ma ki obania vi aitangisia,
ngaia ki araria vi nahunia na matena tanga i hagesuringenia igê.
Manga vi ngaia ma ki obania na takoha mataha,
siana ki aruma surigi na ani getegi na tagaraha.
25Manga i he na mane i tagara i mu
ki girara i voravora re na mane ni takoha mataha?
Ngaia ki ageagesia ma vi sukusukurira na puruka ni tagaraniha,
hanana viga tagara i mu.
Na tagaraha ngekana ma kani raha i bêna.
Na togoha ma kani tamasira.
26Matena i hagatagarahira na puruka ka horoa na mako,
na takoha iana ki tâtâ nga igê viga ototo na vutuvutu.
Ngaia ki tagara bungisi ni hagangêra na togoha iana.
27I tagenana ma henira na enoni tagara
se na ani ga manisingenigi na tagaraha iata.
Ngaira ka aruma surigi na tangiani ma na bungiani.
Takusira na ani ga taritarigi na hê bâkoro i raha na meni.
Ngaira ki pe meme na apeta vige taritarigi igê na nununi haoru na marâ.
Ngaira ki tâtâ nga i bêta viga taritarigi na nununi
na nununi ga bâbâ manga hanana.
Ngaira ka tagara bungisi,
hanana viga hatungigi ka bâbâ manga ngaigi.
28I tagenana ma tanga na mane
i putagia na aiani igê na bea ni putaha.
Ngaia ki takusia vi na marâ ta kani tagarahia renia na aiani.
Na bababana na gi ki singia na gavona na apena.
Ngaia ki mavamava, suria na gi ki bangia.
Na putaha ki hagabono karingana.
Na maana karu hahutugia na nununa na marâ i tagarahia.
Ngaia ki uhungia nga, hanana vi tagarahia bâkoro.
Ngaia ki tagara bungisi hanana vi hatungia bâkoro.
29I tagenana ma tanga na mane
i tagarahia na marâ renia na mako.
Ngaia ki gâga ngahisia na bea ahorohoro iana.
Ngaia ki horoa renigi na êgana.
Ngaia ki hahutugia na tagaraha iana.
Na ara ni tarani na rimana karu katogi
ngaia ki bani takusigi ki oga.
30Ngaia ki pupuria na mako i marumu.
Hemuri na rimana karu tagarahia manga hanana i obania.
Ngaia ki hahutugia ki taruhia maninga ki togatoga.
Ngaia ki tagara bungisi
ki hagamatarotaroa na rarona na agua i hagabangia.
31Na enoni hato ngegana ka hagêgurigi na rimata
ma ka manisingenigi hehegitigi na tagaraha iata.
32Manga ge mareha, na hinua ke baguru.
Vikana ki asa ta na enoni vige oga i ngekana
se vige vatugia.
33Na enoni ngegana ki asa iata
vige tagara igê na gavumane se vige tê tagaraha raha.
Ngaira ki asa vige enoni ni suriha,
suria ga hitenigi na ramata
ma vi manga i he kani arâ na kotiha.
Ngaira ka pe hagesuri
ma ki pe rongo raha na atata renigi na takoha mataha iata.
Ngaira ka pe tamasigi na maramarêrava.
34Ma na tagaraha iata ka katoa na maveta ki tavoraha bâkoro.
Na marâ ma ga obania ka na tagaraha iata.
Currently Selected:
SIRAKE 38: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific