SIRAKE 33
33
1I asa na eraha vige tarahua na enoni
i hagahigasia na Araha.
I na ara ni mateni na eraha ki hagarangi me tanga,
na Araha ki hagatahia tenia.
2Na enoni i usisitenigi na ramata,
ngaia ki pe takotako maninga.
Na enoni i pe botage renigi na ramata
ngaia ki manga na haka na asi ramo i arihatenia rârâ.
3Manga go nahuni takoha mataha,
igo ko hagêguritogo renigi na ramata.
Igo ko hagêguritogo renigi na ramata
manga go hagêguritogo renia God
manga vi tamasi ototo me tangago.
4Go hagarêa hagenago na tamasinga iamu,
hanana na enoni ka agana ka karingago.
Go hakugi na giraraha iamu ma ko kahu tamasi.
5Na takoha iana na enoni i pe nahuni takoha
ki arigurigu manga na marâ i arige.
6Na enoni i memarabe na tamana
ngaia ki manga na hosi mane i siginia na ani i borogogo
ma ki angiangi, henaka vi ta na enoni ki tagiria.
Na enoni ka pe tagenata
7Na mavetana na arito ki mave
i na ara ni tangiani igê na harisi.
Tanu hega ta na tangiana ki koro teharia ta na tangiana?
8Ngaigi ki hehegitigi,
suria na Araha ki katogi vigana suria na katoha iana.
Tani ka na tangiani ni mamaroha
ma tani ka na tangiani raha.
9Tani ngaia ki nakagi ka tangiani raha ni rotu
ma tani ka na tangiani purua ma.
10Na ara ni enoni hato ka vora me tenia na mako
manga o Atama.
11Ma na Araha i tako mataha ngavê ki katora ka pe tagenata
ma ka nahunigi na tagaraha ga tora hegitigi.
12Tani ngaia ki koro tangara ma ki kasira akê.
Tani ngaia ki katora ka tê viteana ma ka ngahisia.
Tani ngaia ki arangenira ma ki kasira so
ka hato tenigi na tagaraha iata.
13Na mako ki oga i ruguhana na raramohana na mane
i tagarahia manga hanana i obania.
Igia ki tagenana ma nikâ.
Igia ka oga i rimana God i hagavoragia,
hanana i haganahunia na ara ni hitangika
renia na ta ki takusia.
14Na koroha ki tora getea ngavê tenia na eraha.
Na mêriha ki tora getea ngavê tenia na mera.
Na tê vitana na Araha ki tora getea ngavê tenia na tasi.
15Bâsia, na Araha God ki katogi na ara ni marâ ka tonga
ma tani ki tora getea ngavê tenia tani.
16Tangê, inê, henaka gê akê hemuri me,
inê kê pe makumakusiga igê na tagaraha iaku.
Inê kê manga na mane i husigi na vaini
ga hagahitagi so na enoni ni husinga ni vaini.
Ma na Araha ki koro tangê
ma inê kê huhu rako teharira ngaira.
Inê kê manga na mane ni husinga ni vaini
i vunuvunu na agua i rusirusi igê.
17Ma kamu girara nga,
vi inê ki mareha vive tagara bâraha tangê so inê mareku ma
ma tangara hete na enoni hato, ga gunahia na hagesuringa.
18Mu karingê, igamu mu nahuni ramoha i pasita na enoni
ma igamu nikâ mu hagesurira na kariami i ruma ni sukuru.
Na hagaotonga tangara na bêni na ruma
19Matena go tahitahi mêngago, siana hagetage ko naka
o karemu, se kaniamu, se o goamu, se na tamamu ke raharaha tangago.
Siana ko haganahunia ta na enoni renigi na nahuninga iamu,
i era ma ko hagahunu renia ma ko gunahigi aporo.
20Matena go manavaso mêngago,
siana hagetage ko naka ta na enoni
vige raharaha tanga na ogaha iamu.
21I koro hete vi na karemu ka goga hagêgurigo igo
teharia vi igo ko goga hagêgurira ngaira.
22Go raharaha tangagi na ara ni marâ,
i era ma ki rongo era na atamu.
23Igê nga na tangiana i arâ tanga vigo meme igê,
ma siana vi hagenago tarana,
igo ko votogi na nahuninga iamu tonganira
na ani i oto tangara viga nahunigi hegitigi.
24Na ngêra, na mata ma na toraha ka tanga na tonki.
Na ngêra, na tagaraha ma na ramoniha ka tanga na kare rakuraku.
25Manga go hagatagarahia na kare rakuraku iamu
igo ko apeape haritagi.
Ma ki manga go pe hagatagarahia,
ngaia ki obania vi arâ suri parongana marena.
26Na toraha ma na baroha karu hagamanata na puruka ni tagaraha.
Na ramusiha ma na hagatavatavaniha
karu tanga na kare rakuraku i guguruga.
27Go hagatagarahia nga ma siana ko hagabare suria,
i era ma ki gâga sutaga.
28Na tagaraha kani araria.
Ma ki manga i guguruga tangago,
go hagahunagi na êgana.
29Siana ko hagatutunguhia.
Siana ko katoa igê na tarana i pe oto.
30Manga go nahunia na ani gi tage na kare vurivuri,
go katoa igê na tarani
go obanira na enoni viga katogi tangago igo,
suria igo ko vuria renigi na haga go mava renigi
31Go katoa manga vi ngaia ka na goamu,
suria go obania tanga na mêrihamu maremu.
Manga go katoa bera ma ki gavagava,
i he kanigo page tavoa igê? I bara!
Currently Selected:
SIRAKE 33: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific