SIRAKE 34
34
Renigi na maruteha
1Na naasiha baguru ka hagaparura na enoni bekabekaga
ma na maruteha ka hagabekasira.
2Na enoni i tongesurigi na maruteha,
ngaia ki manga na ani i uhungia vi taua na mamarugana ta na marâ,
se i uhungia vi ranguia na roga.
3Na maruteha ki manga na kilasi ni surasura bê.
Na nunumu igê ki taketake me tenia na maamu monari.
4I hega, na marâ i pe matarotaro ki girara
i hagavorea vari na marâ i matarotaro?
I hega, na hagaparunga ki girara i hagavorea vari na monariha?
5Na maruteha, na girarasiha ma na matuha
ngaigi ka na hagaparuana ma.
Na aitangihamu kani katogo kê ma ko bâsigi
na marâ go obania vigo bâsigi.
6Manga vi na Araha God ma ki pe hagamarutego,
siana ko tongesuria na maruteha iamu.
7Na maruteha ka hagaharora rako na enoni.
Ngaira ka tongesurigi râ
ma hemuri ka raruni era renigi.
8Ngaigi mareni na ramata ka uhu
ma ka pe obanigi na hagaparuani ngegana.
Na takoha mataha i râ me tenia na enoni ni monariha
ngaia nikâ ki uhu.
Renia na râha rârâ
9Na enoni i râha rârâ hagarako
ngaia ki giraragi na manimarâ.
Ngaia ki nahuni giraraha
ma ki tamasi igê na aitangisiha.
10Na enoni i tahetara renigi na manimarâ
ngaia ki aitangisigi na manimarâ.
Manga go râha rârâ hagarako,
igo ko page manisingenigi rako na marâ.
11Igê na râha rârâ iaku mareku
inê kê bâsigi rako na marâ.
I asa vi ve visigi hato.
12Hagarako inê kê haga ni meme nga
ma God ki hagatahiê.
13Na enoni ga hagahigasia na Araha,
ngaira ka page tahitahi,
suria ngaira ka hagêguritogo renia na Araha
i girara i hagatahira.
14Go hagahigasia na Araha
hanana i asa ta na marâ vige hagamagusigo.
Manga go hagêguritogo renia na Araha,
igo ki asa vigu mamaguraga.
15Ga babarisi na enoni ga hagahigasia na Araha,
suria ngaira ka girara, vi i he
kaniga page tarahua igê na hetamaniha.
16Na Araha ki bâbâsurira na ani ga takuia.
Ngaia ki manga na bêata nganganihaga tangara
ma ki hagaramonira.
Ngaia ki hagarukuhira tenigi na roga mahana
ma ki hagamamarusira tenia na bababana na ritovagana
ma ki tamanira, hanana siana ka tapasu ma ka votavota.
17Ngaia ki katora ka mamêriga ma ka bâbâ rikiriki.
Ngaia ki katora ka apekoro ma ka mauri bâkoro.
Renigi na vogasiha
18Manga go vogasia na Araha
renia na marâ i mareha vi igê na otoha,
na vogasiha iamu ki era ma na Araha ki usitenia.
19Na Araha God ki pe vagevagesigi
na vogasiha iata na enoni ga pe tê viteana.
Henaka vi hagehita ka vogasi,
ma na Araha ki asa vige bonotenigi na tasi iata.
20Na enoni i hanagoa na ganiana tenia na enoni matareha
hanana vi vogasi renia,
ngaia ki manga na ani i nahuhunia na kere mane i maana o vaemana.
21Na enoni matareha ka magê tare,
suria i asa vige ngê masu.
Na ngêra ki na mêrihata.
Manga go hanagoa na ngêra tenira, igo ko nahuhunira.
22Manga go hanagoa tenia ta na enoni
na marâ i obania vi mauri renia,
igo ko nahu hunia.
Manga go pe vuria na enoni tagara iamu,
hanana vige mauri renia, igo ko nahu hunia.
23Manga ta na enoni ma ki tagarahia na ruma
ma ta na enoni getea ki hogea,
na ta ka na mena na tagaraha iaterua?
Na eraha ma!
24Tani ki nungia God tanga i korokoro tanga ta na enoni
ma tani ki arangenia na tamana.
Ti na hitangiterua na Araha ki aganaria?
25Manga go hataria na gahuana na enoni
ma hemuri ko mamanu, hanana go matarotaro aporo
ma hemuri ko hataria aporo nikâ,
na mamanuha tanga na ta?
26Manga go hari ma ko kasi meni na tasi iamu
ma hemuri ko arâ ko katogi akê nikâ,
na hariharinga tanga na ta?
Ti ki obania vi aganaria na nungi ni bonoteniha ni tasi iamu?
Currently Selected:
SIRAKE 34: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific