SIRAKE 32
32
1Manga viga atego ko bâbâsuria na magotoha,
siana ko parunigo renia.
Go tagenamu ma henira na enoni getera.
Go hagagarara hagenago na enoni getera igê na magotoha
ma ko kahu gâga so nogamu.
2Matena i hatohato na tagaraha iamu,
igo ko girara go kahu gâga so ma ko vagevagesira.
Ngaira ka page hagarahasigo renia na tagaraha koro iamu.
3Manga go gemêa, ki ararigo go tamasi
ma ko tamasi igê nga na matena tanga.
Go tamasigi ma na marâ ga arari vigo tamasigi,
i era ma ko hagabarasigi na kiha ma na mâha.
4Igê na matena ni kiha, siana ko tamasi bâraha.
Siana ko parunigo renigi na tamasinga iamu
igê na matena i mareha vi na matena tanga.
5Na kiha igê na magotoha ni vaini
ki manga na hê memera i raha teha na mena
igê na mahe na golo,
6se i manga na hê maravarava i raha na mena.
7Manga go karekare, siana ko tamasi,
nga noga ma i tuguhigo.
Go tamasi hagetage se hagerua togo ma,
ma ki manga ga hagatorago vigo tamasi.
8Go tamasi ma na marâ ga arari vigo tamasigi.
Go atata barobaro râ ma.
Go hagabângenia, vi igo ko nahuni aitangisiha
ma ko obania vigo munimuni so ma.
9Manga vigo goga henira na enoni raha,
siana ko katokato manga vi igo ko maratorata.
Matena go tamasi, siana ko totora voro re tamasinga.
10Na tarohana koro na enoni i haritagi ki hagenago tarana
manga na marangeia i hagenago tarana na akuruha.
11Go arâ tenia na magotoha igê nga na matena
i tuguhira na enoni viga herâhi.
Siana ko nganingani mataro me ko hagemuri.
Siana ko ahorohoro rârâ.
Go ototo râ nga hete i pasimu.
12I ngekana igo ko girara go vagevage suri parongamu
ma siana ko tasitasi renigi na tamasinga ni paroparoha.
13Go visia raha hete God i hagavorago
ma ki hagavagevagesigo renigi na manimarâ koro.
Na hagahigasiana na Araha henigi na ramata iana
14Manga go hagahigasia na Araha,
igo ko aganarigi na hagaotonga iana tangago.
Ngaia ki korokoro tangara na enoni
ga riteritehia na nunginungiha.
15Gu hagesuringenigi na ramata iana
ma ko kahu aitangisigi ma ko katogi.
Manga go usisitenigi, igo ko page vota.
16Manga go hagahigasia na Araha,
igo ko page aitangisigi na ramata iana
ma ko page hagahurasigi mave na morani na girarani.
17Na enoni tasi ki pe botage renigi na hagaotonga
ma ki horogi na ramata ka bagagirarani tanga so marena.
18Na enoni ni takoha ka aganarigi na hagaotonga
ma na enoni paroparo ma na ani ga pe botage renia God
ngaira ka pe mamakuku vige aharê.
19Go takotako hagenago ma ko kahu katoa ta na marâ,
i era ma ko hagahunigo maremu.
20Siana ko arâ suria na tara i sutasutaga,
i era ma ko tapasu igê na hê igê.
21Siana ko arâ suria na tara iata na enoni tasi,
22i era ma ko hagahunigo maremu.
23Go hinahinaru igê na ara ni marâ go katogi.
Vikana igo ko marupegi na ramata iana na Araha.
24Na enoni i tongesurigi na ramata, ngaia ki marupegi.
Na enoni i hagêguritogo renia na Araha,
ngaia ki asa vige raruni baguru renia.
Currently Selected:
SIRAKE 32: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific