SIRAKE 31
31
Na perenga igê na ruruguha
1Na takoha bâraha renigi na ruruguha ki katogo
ko kakasi ma ko pe mauru bâkoro.
2Na anumanumaha renia na ogaha ki manga na maeha raha
ma ki hagabarasigo vigu mauru.
3Na enoni ruruguha ki tagara raha
ma na ruruguha ka ama ni akê me nga.
Rârâ ma ngaira ka gâga haha renigi
ma ka vagevagesigi.
4Na enoni matareha ki tagara raha
ma ki araria so ma vi ngêngê sisite.
Ma na matena i hatohato tenia na tagaraha,
ngaia ki ama ni matareha mênga nga.
5Na enoni i barigigi na ruruguha
hagarako ngaia ki tasitasi.
Na vanasiha ni haga ki hagatasia.
6Na ruruguha ki hagavotarira rako na enoni
ma ki hagagasuga ni hagarateta.
7Na haga ki manga na etu.
Na enoni i barabara i bêta, ngaira ka tutu igê.
Na ara ni enoni ga pe takotako bâkoro ka tutu igê.
8I babarisi na enoni ruruguha i pe tasitasi,
matena i tangasigi na ruruguha.
9Igo ko girara vari na enoni vikana?
Manga vige manga ngekana, e, i ararigia ma vige hagarahasia,
suria i katoa na mena,
i mareha rârâ ta na enoni vige bani katoa me.
10Manga vi ta na enoni ma ke kato vikana,
ngaia ki araria ge akê na ageagena renia.
Ti kani nahunia na teha hanana vige aharê ma ki mareha?
11Na enoni i katokato vikana, ki araria ma vi ruruguha nga
ma na enoni hato ka page hagarahasia renia na korohana.
Na totosuriana igê na magotoha
12Kakare, matena go gâga igê na ngêra raha
ma ko bâsigi rako na ngêra koro,
siana ko unumi na musumu renigi, ko vivi:
“E, na ngêra noga!”
13Siana ko hagabângenia, vi igo ka na enoni ni ngê heparaniha.
Igo ko bani girara vi na tarana ngekana ki erataga ngavê
teharigi na ara ni tarani hato getigi.
Na tarana ngekana ki katogi rako na matoaniha.
14Siana ko ngêngê hepara.
Siana ko sukurira na enoni,
hanana vi go tavotavo na ngêra hagenago tarata.
15Go takusira na enoni getera.
Go katora igê na tarana
go obanira viga katogo nogamu renia.
16Matena go ngêngê,
go ngêngê manga ko hanana nogana na enoni i ngêngê.
Siana ko mamatamu raha se vigo banuhebêmu.
Na enoni ka kitenia na tarana ngekana.
17Na tarana i koro hete kanigo hagenago
ko ngêngê kasigi na ngêra.
Siana ko ama ni banuhebêmu nga renigi,
i era ma ko katora na enoni ka hataera.
18Manga ga rakorako na enoni igê na ngêra,
siana ko hagenago ko tavotavo na ngêra.
19Manga na enoni i tototohesuri, ngaia ki pe hagatage ngêra,
i era ma ki boeboe matena i tâtâ i bea iana.
20Na enoni i masumasu aharêngia,
ki hasigi na obana ki bara vige mauru
ma ki mâmâga na obana.
Ma ki manga go pe masumasu aharêngigo,
igo ko girara go mauru bâkoro igê na bungiana
ma ko riterite apekoro.
21Manga ga tugurigo ko masumasu aharêngigo
ma ki hasigi na obamu,
go arâ ko momoa hanana go kahu korokoro aporo.
22Kakare, go karingê ma ko têtê viteaku
ma i ta na tangiana igo ko page visiê koro
renigi na hagaotonga iaku tangago.
Igê na ara ni marâ siana ko hagateha renigi,
i era ma na maeha ki tarahugo.
23Na enoni ka ageagesia na avanu ni ngêra i mahata
ma ka hagarahasia, suria i araria vikana.
24Ma na enoni hato i hinua ka page hagagege
renia na avanu ni ngêra i migimaongo na ngêra
ma ki ararira nga viga hagagegege.
25Siana ko paroparo renia na tonoha,
suria na vaini ki tanumira ma ki erasira rako na enoni.
26Manga go anumia i ve na aiani i karekare ni sivi,
igo ko hagatanga monari renia vi ngaia ki rate.
Tagenana na tonoha ni vaini ki hagabângenigi
na aitangihata na enoni paroparo,
matena ga totono ma ka hetuguri.
27Na vaini ki katogo ko mamêriga,
manga vi go pe hagateha renia.
I hega, vigo mamêriga vari manga vi marehasigo na vaini?
God ki hagavora na vaini tanga ga mamêriga renia.
28Manga go totono na vaini igê na matena tanga
ma ko pe hagateha renia,
ngaia ki hagakoro obamu ko bâbâ rikitaga.
29Manga go hagateha renia na tonoha ni vaini,
ngaia ki katogo ko mangariaga,
ko tamasi ramo, ko obaera
ma i hemuri igo ko page maki.
30Manga na enoni bekabekaga ma ki ruguhia na tonoha,
ngaia ki bagamangamangariaga,
i marusi na apena ma ki votavota.
Ngaia ki haganega na hearihatana ma ki mamari.
31Manga igo ma ta na enoni ma kamuru totono,
siana ko hagamangaria.
Siana ko memarabe matena i tono ki vagevage.
Siana ko hagagegege renia,
se vigo nungia ki barua aporo na kaune iana tenigo.
Currently Selected:
SIRAKE 31: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific