SIRAKE 30
30
Na hagaotonga ni kare
1Na mane i takuia o karena, ngaia ki ramusia hagarako,
hanana i ageagesia i muri me.
2Na mane i hagaotoa maninga o karena,
ngaia ki page bâsia na mena na hagaotonga iana tanga,
ma ki page tamasi ageage renia tangara o vaema ni kare getera.
3Na mane i hagesuria maninga o karena,
ngaia ki ageagesia i berarogata na mane na tamana
ma ki katora na mane ga merongasia ka hengaria.
4Matena o vaema ni kare ki meme,
ngaia ki pe me monari,
suria na nununa o karena kani urusia o vaemana.
5Matena i tahitahi mênga, ngaia ki vagevage renia
ma na matena i meme,
ngaia ki asa vige rugu na obana renia o karena,
6suria o karena ki urusia ki naka na siva tangara na merongana o vaemana
ma ki korokoro bê aporo tangara na tamana o vaemana.
7Na enoni i apeape suria o karena,
ngaia ki page baraigi na maara iana marena
ma na bunaniana ki page hepehepe
i na ara ni mateni i rongoa na ngereha.
8Manga go pe hagamanata na hosi,
igo ki asa vigu katoa bâ hega.
O karemu go apeape suria ki tagenana ma.
9Manga go apeape suria na karemu,
igo ko page raruni baguru.
Manga go mebare, ngaia ki page hagamamasiagago.
10Manga go mêru, ngaia ki page katogo ko angiangi
ma ko page hagahunu ma ko page kurukuru rivo.
11Matena i sisite, siana ko naka ma vê suri parongana.
Siana ko ata ni bâbâ mavê renia matena i aharê.
12Go ramusia ma ko hitabaria matena i sisite mênga.
Manga i mareha, igo ki asa vigu page katoa bâ hega
ma ngaia ki page guguruga ngavê tangago.
13Go hagaotoa maninga o karemu ma ko hagatagarahia,
i era ma ki page hagamakigo.
Na apekoroha ma na obakoroha
14Manga go matareha ma igo ko ramoramo ma ko apekoro,
i koro ma.
Ma ki manga go ruruguha ma ki mareha vigu apekoro,
e, i era ngavê.
15Na apekoroha ma na bârikitaganiha karu koro teharia na golo.
Na obakoroha ki koro teharigi na hê bâkoro i raha na meni.
16Na apekoroha ki raha teharigi na ara ni ruruguha.
I asa ta na marâ vige katogo ku vagevage manga na obakoroha.
17Na mera ki koro teharia na obamaha maheaga.
Na mamaroha i na anoano ki koro teharia na maeha hagahu.
18Henaka vi na ngêra mora,
ma na matena go maeha igo ko usisitenigi.
Ngaigi ki manga na ngêra go vogasia na nununa na ataro renigi.
19Na vogasiha ni ngêra tanga na ataro
ki tanga na ta?
Ngaia ki asa vige ngêgi se vige siginigi.
I tagenana ma tanga na enoni na Araha i hagamamasiaga.
20Ngaia ki bâsigi na ngêra
ma ki manava so raha ki hagamarusi.
Ngaia ki manga na voemavo i ruia na kere gete i bâkoro.
21Siana ko tagarenigo maremu tanga na obaruguana.
Siana ko hagamamasiagago maremu renigi na anumanumaha.
22Na obakoroha ki katogo ko mauri arihu
ma ko vagevagesia na ogaha iamu.
23Go vagevage ma ko obâbakoro.
Siana ko anumanuma tare. I pe koro tangago.
Go nakagi râ na anumanumaha,
i era ma ko hagaratemu maremu renigi mangara rako na enoni.
24I era ma ko me bumu.
Na hengariha ma na mangariaganiha karu hagabubua na ogaha iamu.
25Na enoni i obakoro ma ki togotogo na aitangihana,
ngaia ki marotanigi na ngêra ma ki vagevagesigi.
Currently Selected:
SIRAKE 30: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific