SIRAKE 29
29
Na kaune
1Manga go mane ni takiha,
go naka na tamamu ki kaune tenigo.
Manga go tamania,
igo ko marupegi na ramata iana na Araha.
2Matena i barabara tanga na tamamu,
go naka ki kaune tenigo.
Matena i gâga i pasimu na kaune,
go hatani barua aporo rêrê.
3Go hagamonaria na tamasinga iamu,
hanana na enoni ka hagêguritogo renigo.
Vikana igo ko girara go kaune nikâ,
matena i barabara tangago.
4Na enoni rako ka takusia,
vi na kaune ki manga na marâ ga tarahua i tagua ma ka nahunia.
Vikana ngaira ka hagamarâ apeta na ani ga tamanira.
5Ta na enoni ki mamaki na tamasinga iana
ma ki nakanaka bêna, hanana vi kaune tenigo.
Ma na matena i araria vi barua aporo,
ngaia ki hagababe ma ki tamasi bêrahaga,
ma ki vi: “I pe arariê vi ve barua nga i ngekê.”
6Henaka i girara ma vi barua aporo na kaune hagenani iana,
ma ngaia ki barua aporo ma vari ta apanena,
manga vi go tuguria.
Manga go pe tuguria, ngaia ki asa vige barua aporo.
Ngaia ki hanago ma tenigo.
Ngaia ki katogo ko merongasia.
Ngaia ki asa vige visigo koro.
Ngaia ki arangenigo, ki guharigo ma ki pe hagahigasigo hete.
7Na enoni rako ka usi ngavê vige hagamarumungenia na kaune,
mareha vi suria ngaira ka maongo
ma suria hete ga pe obania na enoni i kaune
vige hagaparura.
8Henaka vikana, go takira na ani ga matareha.
Go hatani nakanaka tangara.
Siana ko hagababera.
9Na Araha ki bonasigia, viga tamanira na ani ga matareha.
Go tamanira, matena i barabara tangara.
10Go tamania na goamu se na tamamu renia na haga iamu,
henaka i arâ su,
i era ma ki kakaga igê na vaba i bemu.
11Go hasigi na ruruguha iamu
manga i bonasigia na Araha God renigi.
Vikana ngaigi ki tamanigo
teharia vigu nakagi râ tangago maremu.
12Go takusia vi na mahatanga iamu tangara na enoni matareha
ki na tarana i raha i berarogani na ruruguha iamu
13ma ki roherohe pusigo tenira na merongamu
teharia na bêata nganganihaga se na ora na bagora.
14Na mane koro ki hagamonaria na suruha iana,
vi barua aporo na kaune iana na tamana,
manga vi ngaia ma ki pe barua ngaia marena.
Ma na mane i pe girara vige maki, ki mareha.
15Manga ta na enoni ma ki tamanigo vikana,
siana ko bonotenia na korohana tangago,
suria ngaia ki kasi manavana renigo.
16Manga go pe maki vigu kasigi purua ma
na nahuninga iana na ani i vuripusigo
ma ko pe obakoro tanga,
igo ko tasi,
suria go pe botage renia na ani i ura i murimu.
17Rako na enoni ruruguha ka vora re na enoni matareha,
suria ga vurivuri pusigi na kaune iata na ani getera.
Ngaira ka tarahugi na bagabevoani
ga ahegenira rârâ mangagi na navo igê na asi ramo.
18Henaka vi na mane ni ramoha,
ngaira ka tarigenira hura tenigi na ruma iata.
Tahema ngaira ka ataka mavê re ogaha i pasita na mahuara.
19Na mane erataga i hatani surusuru
vi vurivuri pusigi na kaune iata na enoni getera,
suria i vanasigi ma na haga,
ngaia ki hatani katogi ka arigurigu rako na tamasinga.
20Hoi, go tamania na tamamu manga go girara vi go tamania
ma ko hinarugi na bagabevoani ngegana.
Go nahuni ruma getego
21Na tarani ga raha ngavê tanga na ogaha
ka na ve, na ngêra, na gahu,
ma na ruma go gâga purunguni igê.
22Henaka go matareha ma ko gâga igê na ruma i pe koro bâkoro,
ngaia ki koro teharigi na magotoha ni ngêra mora
i ruma iata na enoni getera.
23Henaka go nahuni rako se mareha,
i togotogo na aitangihamu renigi,
i era ma na enoni ka visigo vigo oga hagêgurira.
24Na hotonga suri ruma ki na tarana i pe koro,
suria ngaigi ka mareha vi na ruma iamu.
Tahema i bara tangago vigu tamasi purunguni.
25Suria igo ko hotohoto tare,
tahema na enoni ka tamasi erasigo.
Henaka go hagangêra se go hagatonomira,
ma ngaira ki asa vige visigo koro.
26Ngaira ka vivi: “Sihoto, râ me!
Hagarêgi na ngêra! Me na ngêra!
Mi pasi ngê!”
27Se ngaira ka vivi: “Sihoto, gu hura tarata na enoni raha.
Veogaku ki arâ me i pasiku, gu hura tarana.”
28Manga go takotako bâkoro, e,
na tarana vikana ki hagamakigo ngavê,
suria ga pe nakago ku oga ma
ma ka hagamakigo manga vi igo ko ravarava haga.
Currently Selected:
SIRAKE 29: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific