SIRAKE 2
2
Hagêguritogo renia na Araha, henaka vi na ta
1Kakare, manga go obania vigo tototo suria na Araha,
go nanê hanana go teharigi na bagabevoani ga page uhungigo.
2Go tâtâ nga i na agua gi tage ma ko togeaga.
Go apeape haritagi, matena ga tarahugo na bagabevoani.
3Go tarisuria nga na Araha ma siana ko rumakaka renia.
Vikana igo ko page tehateha matena go meme.
4Go aganarigi na ani mavê na tarani ga tarahugo.
Go piringiape, henaka na hagamakiha hanana i tarahugo.
5Na golo ka uhungia igê na gi ki taranina.
Na enoni i tototo suria God
ka uhungia igê na gi ni hagamakiha.
6Go hagêguritogo renia na Araha
ma ngaia ki page tamanigo.
Go arâ nga surigi na tara oto iana
ma ko hagêguritogo renia.
7Igamu hato mu hagahigasia na Araha
mu naasia na takiha iana.
Siana kamu murisigea, i era ma kamu vota.
8Igamu hato mu hagahigasia na Araha
mu hagêguritogo renia
ma kamu page nahunigi na meni.
9Igamu hato mu hagahigasia na Araha
mu naasigi na mahatanga iana ni takiha
ma ni vagevageha hagahu.
10Mu takusira na enoni ga oga i nago noga.
I hega, ta na enoni i hagêguritogo renia na Araha,
ki hagêguri baguru vari?
I hega, ta na enoni i ama ni hagahigasia nga na Araha
na Araha ki rumakaka renia vari?
I hega, ta na enoni i avarasia na Araha
na Araha ki pe aganaria vari?
11Na Araha ki takigia ma ki koro tangagia.
Ngaia ki bonotenigi na tasi iaka
ma ki hagatahigia matena ga tarahugia na bagabevoani.
12Ma ki era ngavê tangara na ani ga makumakusiga ma ka mameaga
ma tangara na enoni tasi ga obania
viga arâ surirerua na tara gi rua,
henaka na tara monari ki gi tage togo ma.
13I era ngavê tangara na ani ga rumakaka,
suria ga pe hagêguritogo renia na Araha.
Tahema na Araha ki pe anumasira.
14I era ngavê tangara na ani ga mameaga
vige hagêguritogo renia na Araha.
Na ta ka page katoa,
matena i arâ me na Araha ki surira?
15Na enoni ga hagahigasia na Araha
ngaira ka marupegi na ramata iana.
Na ani ga takuia ngaira ka mauri surigi na obaniha iana tangara.
16Na ani ga hagahigasia na Araha ngaira ka uhungia
viga hagakoro obana.
Na ani ga takuia ngaira ka ageagesigi na ramata.
17Na ani ga hagahigasia na Araha
ngaira ka nananê tare ka têtê viteana.
Ngaira ka nakara so mareta i maana ma ka vivi:
18“Igami kami nakagami maremami i na ababani rimana na Araha,
mareha vi i na ababani rimata na enoni,
suria na takiha iana ki raha teha ngavê manga na hahanetagana.”
Currently Selected:
SIRAKE 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific