SIRAKE 28
28
1Na Araha ki giraragi na tasi iamu.
Manga go naka na siva tanga ta na enoni,
na Araha ki page naka nogana na siva tangago igo.
2Manga go bonotenia na bagatauhana na enoni tangago,
na Araha ki page bonotenigi na bagatauhamu,
matena go nungia ki bonotenigi na tasi iamu.
3Siana ko hagêguri, vi na Araha ki bonotenigi na tasi iamu,
matena go ama ni mangariaga nga tanga ta na enoni.
4Igo maremu ka na enoni tasi.
Manga go usi vigu bonotenigi na bagatauhana na enoni tangago,
ki pe ararigo vigu nungia na Araha ke bonotenigi na tasi iamu.
5Igo ka na enoni ma.
Manga go ama ni mangariaga nga,
ti ki page bonotenigi na tasi iamu?
6Go takusia, i ta na tangiana igo ko page meme
ma na apemu ki page kakaga.
Vikana go kasia râ nga na mangariaganiha
ma ko marupegi hete na ramata iana na Araha.
7Takusigi na ramata.
Siana ko ama ni mangariaga nga tanga ta na enoni.
Takusia na suruheri iana na Araha God.
Siana ko tako renigi na bagatauhana na enoni tangago.
Na hekorekoreana
8Siana ko hekorekore, hanana go pe tasitasi bâraha,
suria na bagamangamangariaganiha ki na hunana na hekorekoreana.
9Igo ko tasitasi, matena go hagaerasia
na hemanatangeana i berarogata na enoni, ga hekomaniheri bâkoro.
10Rakorako na ario, na gi ki tarê raha ngavê.
Na togeaganiha ki hagaraha na hekorekoreana.
Manga na enoni ma ki ramoramo,
na mangariaganiha iana ki ama ni akê nga.
Manga na enoni ma ki ruruguha, ngaia ki girara i mangamangariaga ngavê.
11Na hetuguriha i hagakakangi me,
ki hihisia na hekorekoreana ki akê me raha.
Na hearihatana i hagagasuga,
ngaia ki girara i voravora re na nahunga ni nuni.
12Igo ko girara go uhihia na kere ririki hanana i mave.
Igo ko girara go musuria hanana i meme.
Na haramu kani katorerua na tarani gi rua ngegana.
Na meana na enoni
13I arari viga arangenira na enoni
ga bagatabotabohara ma ka hagatoraira na enoni,
suria ngaira ka erasira rako na enoni ga haritagi.
14Na tamasinga iata na enoni ngegana
ka erasigi na ogaha iata rako na enoni haritagi,
ka tarigenira hura tenigi i pasita,
ka ruhuruhugi na hinua nganganihaga
ma ka hogegi na ruma iata na enoni ni ramoha.
15Na tamasinga iata na enoni ngegana
ka katora na mane ka kasira kaniata ga toto surira ma
ma ka hanagogi na meni na tagaraha iata.
16Na enoni i botage renia na hagatorainga,
ngaia ki asa vige togo na aitangihana
se vige oga igê na marapeha.
17Na mata ki katoa na baroapaparorogana.
Ma ki manga na meana na enoni ma ki ramusigo,
e, igo ko babaroagani.
18Na tatapa borahu ki hagamesira rako na enoni.
Ma na meana na enoni ki hagamesira rako teha ngavê na enoni.
19-20Igo ko babarisi, manga vi na enoni ma ka pe hagatoraigo,
se manga vi na tamasinga ni mangariaganiha iata ma ka pe takego,
se manga vi na tamasinga iata ma ka pe higego
manga na aiani se mangagi na seni i ugamu.
21Na hagatorainga ki torea me na mera
i teharia vigu me.
22Na hagatorainga ki asa vige teharira na enoni koro.
Na ârârana na hagatorainga ki asa vige ngêra.
23Ngaia ki ngaura hete na ani ga rumakaka renia na Araha.
Manga na gi na hagatorainga ma ki nonoro i pasita,
ngaia ki asa vige page me.
Na hagatorainga ki page hagamamasiagara
manga na laione i ranguira ma ki ngasira.
24Igo ko parapararihia na mu ni vaini iamu.
Igo ko bêbagi maninga na golo ma na siliva iamu.
25Tagenana ma go raburia na haramu.
Go hagakitakitagi maninga na tamasinga iamu.
Go takotako maninga hagenago ma ko kahu tamasi.
26Go hinaru,
i era ma na meamu ki naka tara tangago.
Manga i mareha,
igo ko page tapasu igê na tamasinga iamu maremu
ma ko page votavota so i maana na ani i gamorahigo.
Currently Selected:
SIRAKE 28: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific