SIRAKE 27
27
1Na enoni rako ka tasi, matena ga hagavarahagi haga.
Na enoni ga vanasigi na ruruguha, ngaira ka maongo.
2Tagenana manga na rapurapu i hanga i berarogaterua na hê,
na tasi nikâ ki hangahanga i berarogaterua na hagavuringa ma na vuriha.
3Manga go pe nganganihaga igê na hagahigasiana na Araha
igo ko hatani hagaratena na ruma iamu.
4Manga go gogoa na ve, na momo ka gâga so.
I tagenana ma na tamasinga iana na enoni.
5Na bababana na gi ki uhungia vi hagakoroa na apira na hê
i hahia na mane i bani tagarahia manga hanana i bâ,
manga vi ngaia ki koro se i mareha.
Tagenana ma na takoha ki hagabângenia
vi na ani ta na enoni ngekana.
6Na guana na apinige ka hagabângenia
vi na avanuna ki bâsuria bâkoro se i mareha.
Tagenana ma na tamasinga ka hagabângenia na aitangihana na enoni.
7Siana ko hagarahasia na enoni, matena i mamênga vige tamasi,
suria na uhungiha kani igê na tamasinga iana.
8Manga go gunahia na tarana i oto,
igo ko girara go tarahua.
Manga go katokato vikana igo ko manga go hagesuru bâkoro.
9Na manu haku ka oga haku.
Tagenana ma na monariha.
Ngaia ki gâga henira na enoni ga gunahia na monariha.
10Na laione ki gamorahia na ganiana.
Tagenana ma na tasi ki gamorahia na enoni tasi.
Na tauhamu tangara na enoni
11Na tamasinga iata na enoni ga tê viteana God
ka hagabângenia tare na takoha mataha.
Ma na enoni bekabekaga ka riariaga manga na hageha.
12Manga go tahetara vi igo ko oga i berarogata na enoni ga bekabekaga
go gâga hagagara ma.
Ma ki manga go gâga henira na enoni ni takoha
siana ko hagatata vigu arâ.
13Na tamasinga iata na enoni bekabekaga ka rongo era
ma ngaira ka hagatara bera renigi na tarani ga era ngavê.
14Matena na enoni ngegana ka hearange,
na varehumu ka ririhuruga.
Matena ga hetuguri so mareta,
e, go hereherepusigi na karingamu.
15Igo ko hataera, matena go rongora ga heguhaguha.
Na paraparangasiha ki girara i hagavorea na nahunga ni nuni.
16Manga ta na enoni ma ki hagapêpugo renia ta na marâ
ma igo ko tarohenia,
i asa ta na enoni, vige hagêguritogo renigo nikâ
se vige manatangenigo.
17Go takuira na tamamu ma ko tototo surira.
Ma ki manga go tarohenia na marâ
na tamamu i hagapêpugo renia,
igo ko girara nga, vi ngaia ki hato vige manatangenigo.
18Igo ko bani hagamesia na hemanatangeana.
I manga go nahu enoni.
19Tagenana manga na manu i gaha tenia na rimamu
ma ki asa vige aporo me i rimamu,
na tamamu ngekana nogana ki arâ ngavê tenigo.
20Siana ko uhungia vigu torea aporo.
I bani teha na matena.
Ngaia ki bani râ manga na goti i tahi tenia na etu.
21Na mara ga girara ga baraigi.
Na guhata ga girara ga bonotenigi.
Ma ki manga go hagaerasia
na hagêguritogoana iana na tamamu renigo,
na berarogamurua ki asa vige page koro aporo.
22Na enoni i rengasi maa,
ngaia ki bani varoa na tarana i era
ma ki asa ta na enoni vige urapusia tenia.
23Matena i gâga henigo,
na tamasinga iana ka mamaki ngavê.
Ngaia ki vivi, vi na ara ni tamasinga iamu ka rongo koro era
ma hemuri ngaia ki tamasi erasigo
ma ki paririgi na tamasinga iamu maremu ka takego.
24I mareha rârâ ta na marâ i maveta
vi ve kitenia ngavê manga na enoni ngekana.
Ma na Araha ki kitenia nogana.
25Manga go arihatenia hagaoto na hê,
ngaia ki page so me ki hitahita i bêmu.
Manga go hagatakea na enoni i pe bani hinarugo,
igo ko takego so maremu nogamu.
26Na ani ga tagarahia na kiru na suta tanga ta na enoni,
ngaira mareta ka votavota igê.
Na ani ga nakanaka na etu tanga ta na enoni,
ngaira mareta ka tutu igê.
27Na enoni i katoa na eraha,
na eraha ki tarahua bê aporo
ma ngaia ki pe girara vi tanu hega ngekana.
28Na enoni ga paroparo,
ka guharira ma ka meramarabe na enoni getera
ma na siva ki gamorahira manga na laione.
29Na ani ga manavatenira na enoni ga tê viteana God,
suria ga vota,
ngaira ka tutu igê na etu.
Na mamasiaganiha ki page ngêngê hunira
ma ka kahu meme.
Na mangariaganiha
30Na mangariaganiha ma na bagamangariaganiha
karu erataga ngavê ma karu angarira na enoni tasi.
Currently Selected:
SIRAKE 27: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific