SIRAKE 26
26
1Ki babarisi na mane i nahunia na gete koro.
Ngaia ki page mauri arihu ngavê.
2Na gete koro ki hagakoro obana o vaniana
ma ki katoa na ogaha hagenani iana o vaniana
ki gâga igê na marapeha.
3Na gete koro ka na mahatanga koro ngavê iana na Araha
tangara na ani ga hagahigasia.
4Henaka vi ngaira ka ruruguha se ga matareha,
ma ngaira ka vagevage ma ka obakoro tare suria ngaia.
5Na tarani ge he ga hagamagusiê,
suria ga erataga ngavê teharia na mera:
na hagatorainga iata na enoni i hinua,
na hakuta ninuni ga oga sutaga,
na tuguriana hagaparu,
6ma na gete i ngaria na gete getea,
suria vi hagavoregi na mamasiaganiha raha
igê na aitangihata na enoni,
suria na tamasinga iana ki hagamamasiagara na enoni hato.
7Na gete era ki manga na totora i baturia na gaparamu.
Manga go uhungia vigo hagaotoa,
igo ko manga go têa na garagara pinihi.
8Na gete i ruguhia na tonoha
ki girara i hagamangarigo.
Ngaia ki asa vige pinihia na bagatauhana.
9Na gete i rongo era igo ko bâbâ hagagara re na maana,
suria na maana ki pe bâbâ ni makiha hete
ma ki hagamura ma na mane.
10Manga ka karemu ma ki haritohego,
go bâbâ renia tare.
Manga i mareha,
ngaia ki page hagasirasirego ki amane.
11Manga i bagapuruga, go hahutugia nga.
Siana ko konekone, matena na bagatauhana ki hagamakigo.
12Ngaia ki manga na enoni i mamata na riona igê na râha iana
ma ki manganga ki totono na ani mavê na ve i tarahua.
Ngaia ki page gâga akaka tanga na ani mavê na mane.
Ngaia ki page gâga so i maana na ara ni ruma na gahu
ma ki page venasia tanga na mage.
13Na gete koro ki hagakoro obana o vaniana.
Ngaia ki girara i hagangêa o vaniana ki bâkoro na apena.
14Na gete i pe tamasi bâraha,
ngaia ki na mahatanga tenia na Araha.
Na totosuriha vikana ki manga na marâ i akê era na mena.
15Na gete i haritagi ka obania bâraha.
I mareha rârâ ta na marâ vige maratorana na totosuriha iana.
16Na bâkorohana na gete koro
i ruma iana i maningaia maninga,
ngaia ki manga na arito i mave igê na ritovagana
igê na vavearo iana na Araha.
17Na maana bâkoro igê na apena bâkoro
ki manga na laiti mave igê na atohana i ruma ni rotu.
18Na apenêgana bâkoro igê na êgana nganganihaga
karu manga na gatana na golo igê na hunana na siliva.
19Kakare, go gâga igê na apekoroha, matena go karekare.
Siana ko tagara tangara na mahuara.
20Go bâbâ i na agua renia na agua i ango.
Go hasia renigi na ngêra iamu maremu.
Go hagêgurigi na ani ni hasinga iamu maremu.
21Vikana na karemu ka page mauri, ka page raharaha
ma ka page hagêguritogo renia na ahemata iata.
22Na êrâ ki manga na marâ i araria vi ga pusuria.
Na gete êragi i gamogamo
ki hagarateta na mane i merarongo era.
23Na mane i pe botage renigi na ramata
ngaia ki page nahunia na gete ni tasi
ma ki araria vikana.
Ma na mane i hagahigasia na Araha,
ngaia ki page nahunia na gete koro.
24Na gete i bagapuruga,
ngaia ki ageagesigi na tarani ni makiha.
Ma na gete i haritagi ki haritagi na tauhana,
henaka vi ngairerua getererua o vaniana ma ngaia.
25Na gete i bagapuruga ki manga na o i borogogo
ma na gete i totohesuri ki hagahigasia na Araha.
26Na gete i hagahigasia o vaniana, na enoni ka visia
vi na gete i nahuni takoha mataha.
Ma na gete i paroparo ma ki ruhia o vaniana
na enoni ka visia vi erataga.
I babarisi na mane i nahunia na gete koro,
suria i girara i mauri arihu.
27Na enoni i raharaha na harana ma ki bagatabotabohara
ngaia ki manga na ahuri tanga na hearihatana.
Ma na mane i nahunia na gete vikana,
ngaia ki gâga tare igê na hearihatana mataro me ki meme.
Na vanasiha
28Na tarani gi rua garu hagaera obaku:
na mane ruruguha i arârâ ma ki matareha
ma na mane ni aitangisiha na enoni getera ka pe hagahigasira.
Na oruta na tarana i katoê kê mangariaga:
ngaia ka na enoni koro i voravora re na enoni era.
Na Araha ki page hagaitangia ki meme na enoni ngekana.
29I bara tanga na enoni ni hagavaraha haga
vige pe tasi,
henaka i hagavuringenigi tani ma na marâ.
Currently Selected:
SIRAKE 26: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific