SIRAKE 25
25
Na takoha mataha ma na mane
1Na tarani gi oru gê obakoro ngavê renigi,
na tarani ga hagakoro obata God ma na enoni:
o vahegoata ga hekomaniheri maninga,
na enoni i hinua ga hemanatange,
ma na arua garu gâga igê na vagevageha.
2Na enoni gê usitenira, suria ga hagamangariê renigi na ogaha iata:
na mane i baganunungi ma ki paroparo,
na mane i ruruguha ma ki hagahagaparu,
na meraha i bekabekaga ma ki gamogamo.
3I hega, na marâ go pe hagesuringenigi, matena go karekare,
igo ko page giraragi, matena go gemêa?
4I koro ngavê, manga vi na mane ga gohogohoraga,
ka surira na enoni igê na otoha
ma ka haganahunira renigi na hagaotonga koro.
5I koro ngavê, manga vi na meraha ma ka nahuni takoha mataha
ma na enoni raha ka nahuni aitangisiha ma na hagaotonga koro.
6Na tahetarana iata na gemêa ki manga na tarepuri i bêta.
Na ageagesiha iata ka na hagahigasiana na Araha.
7Inê kê giraragi na tarani tangahuru gi tage
gê ageagesigi ngavê, ma ngaia nga ka na tangahuruta:
na enoni i ageagesira na karena,
na enoni i tahitahi mênga ki bâsira na merongana ga votavota,
8na mane i êragia na gete i nahuni aitangisiha,
na arua garu hearari bâkoro,
na enoni i pe rongo era rârâ na harana,
na enoni i pe tagara tanga na ani i pe girara manga ngaia,
9na enoni i nahunia na morana na aitangisiha,
na ani na enoni ga pasi rongoa,
10na ani i nahuni takoha mataha, ngaia ki teharira.
Ma na ani i teharira ngaira hato
ka na enoni i hagahigasia na Araha.
11I mareha rârâ tani vige maratorana,
suria na hagahigasiana na Araha
ki na tarana i raha teha ngavê i maveta.
12Manga go hagahigasia na Araha
igo ko kahu takuia.
Manga go tongesuria, igo ko kahu tototo suria.
Na takoha mataha ma na gete
13Henaka na ani mavê na mamasiaganiha ki koro ma,
nga noga ma na mamasiaganiha igê na aitangihamu
renia na hetakuiha.
Henaka na ani mavê na eraha ki koro ma,
nga noga ma na eraha na ani na gete ga hagavoregi.
14Henaka ma na ani mavê na bagabevoani ki koro ma,
nga noga ma na bagabevoani na ani na merongamu ga hagavoregi.
Henaka ma na ani mavê na siva ki koro ma,
nga noga ma na siva na merongamu ka katoa.
15I mareha rârâ ta na marâ ge meme renia
vige maratorana na ma ni garahunu.
I mareha rârâ ta na mangariaganiha
vige maratorana na mangariaganiha iana na gete.
16Manga ve oga i ruma gi tage henia na laione se na hua
ngaia ki koro teharia vi ve oga henia na gete i hehehe.
17Manga na gete i bagamangamangariaga,
na maana ki haganega ki arisuga
mataro me ki bâbâ manga na o vasiga i mangariaga.
18Henaka o vaniana ki huhura ki arâ ki ngêngê
henira na ani i ruma i mebasigu hetanga,
ma ngaia ki mamavaso mênga, suria i obaera.
19Manga gu hagakitakitagi na eraha
ngaigi hato ki kere sisite me,
nga noga ma na eraha na ani na gete i hagavoregi.
Na hagaitangiha tanga na enoni tasi
ke tarahua nga na gete ngekana!
20Na mane haritagi ki gâga henia na gete i hehehe,
ngaia ki manga na meraha i tagere igê na hungana na one.
21Siana ki tasitasi na bêmu suria na bâkorohana na gete.
Siana ko gunahia vigo torea na gete suria ma vi ngaia ki ruruguha.
22Manga na mane ma ki oga hagêguria kaniana,
na mangariaganiha, na guhaguha ma na makiha ka akê me nga.
23Na gete i hehehe tare ki katoa o vaniana,
ki bâbâ ruruhi, ki babau ma ki mamasiaga na aitangihana.
Manga na gete ma ki pe hagakoro obana o vaniana,
ngaia ki hagatavigi na rimana ma na êgana o vaniana.
24Na tasi ki haganega i pasina na gete.
Tahema igia hato ka meme suria ngaia.
25Siana ko naka mavê na ve
ki gogo hura tenia na marâ ni ve iamu.
Siana ko naka mavê nikâ na gete i hehehe ki manitavaragi.
26Manga i guguruga ngavê tangago, hoi, go kasia.
Currently Selected:
SIRAKE 25: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific