SIRAKE 24
24
Na ageageha iana na takoha mataha
1Na takoha mataha ki ageagesia so marena.
Ngaia ki tamasi ageagesia so marena
i berarogata na kariana marena.
2I maata na kariana na Araha God
ma i maata na angero iana
ngaia ki tamasi ageagesia so marena, ki vi:
3“Inênga ka na tamasinga gê hura me
tenia na harana na Araha God raramohaga hunia.
Inê kê gahuia na maveta manga na vaha i susu.
4I pasiku kani avorana na vavearo
ma na atohaku ki oga igê na u na vaha.
5Inê geteê ma kê rihia na vavearo i rihu
ma kê arârâ surigi na rutuni na maveta.
6Inê kê marungira na maveta hagenani ma na navo i avoa
ma na ara ni marê ma na enoni hato igê.
7Inê kê bâbâ i na ara ni agua
renia na agua vigê gâga igê i tagua i maveta,
hanana vi gê gâga hagahu igê.
8Hemuri God, i hagavorê ma ki hagavorara na arâ ni marâ hato,
ngaia ki hagatorê vi i he kanigê gâga igê.
Ngaia ki vi: ‘I pasimu kani i Isiraele.
Na raraha iana o Jakobo ka na kariamu.’
9Ngaia ki bani hagavorê me i nago tarana na maveta,
i nago tarana i nago noga kerevê noga
ma inê kê page gâga hagahu tare ki bê ki arâ.
10Inê kê tagara tanga igê na ruma na gahu apuna iana
ma hemuri i pasiku kani igê na hungana i Sione.
11Ngaia ki kasiê kê gâga tare i hinua raha manimani iana
ma kê marungia i Jerusaleme.
12Inê kê vagavagaraga i berarogana na hagosi ninuni
i rongo raha na atata.
Na Araha ki bani atera ka vora re na kariana marena.
13Inê kê raharaha manga na apinige oto i Libanone,
manga na apinige bâkoro igê na hungani i Heremone,
14manga na ni i Engeti,
manga na mahe bâkoro i Jeriko,
manga na apinige ni olive igê na bena,
manga na apinige i akê bâkoro hagarangia na ve.
15Na vanuhaku ki sigini koro manga na ago,
se manga na tavona na gatoga,
se manga na oile i sigini koro ngavê,
se manga na marâ i sigini koro
ga sungia i ruma na gahu apuna.
16Na araku ka arubebe, ka bâkoro
ma ka bâhagavagevage.
17Inê kê hisihisi manga na varona na vaini.
Inê kê takataka ma kê rasirasi renigi na guaku koro ngavê.
18Inê kê hagavoregi na morani na hetakuiha,
na hagahigasiana, na aitangisiha ma na naasiha,
suria inê kê bani oga me
i nago tarana i nago kerevê noga.
Na ani i hagavorê ki haganahunira na kareku hato reniê inê.
19Mu râ me igamu hato mu barigiê
ma kamu ngê masu renigi na guaku.
20Na takusiha aporo reniê inê ki mamaki teharia na pirui.
Na nahuniana reniê inê ki mamaki teharia na pirui taranina.
21Mu ngauê ma kamu page magêsiê tare.
Mu tunumiê ma kamu page pasi tonomiê tare.
22Mu têtê viteaku ma igamu ki asa vigamu page maki.
Mu rongoê ma igamu ki asa vigamu page tasitasi.
Na takoha mataha ki vi na ramata
23Na takoha mataha ka na ramata,
o Moise i bonasigia hanana viga marupegi.
Na takoha mataha ka na Suruheri iana na Araha God,
i naka henigia, hanana i gâga henigia tare.
24Mu tototo suria tare nga na Araha.
Mu taua gatagata, hanana i hagaramonigamu.
Na Araha raramohaga hunia ngaia getea ma ki God.
I mareha vi tani râ nikâ.
25Na ramata ka vunu ahaharê renia na takoha mataha
mangarerua na ve i Pisone me Tigirisi,
matena garu tata berabera igê na matena ni hunguta.
26Na ramata ka vunu ahaharê renia na aitangisiha
mangarerua na ve i Uparatesi ma i Jotano
igê na matena ni opaha.
27Na ramata ka marora renigi na hagesuringa koro
mangarerua na ve i Nile ma i Gihone
garu marora igê na matena ni husinga ni vaini.
28I mareha rârâ ta na enoni,
henaka i nago se i hemuri me,
vige aitangisia maninga na takoha mataha hagenani,
29suria na takotako iana ka raha teharia na asi
ma ka kokoro ngavê teharigi na rutuni i asi.
30Inê, inê kê manga na âpavoro i gogo igê
na ve tenia na ve oto tanga na mu.
31Inê kê tako, kê vi: Inê be torea na ve
tanga na pariki ni apinige ni ngauha iaku
ma tangagi na ukumako ni mahe.
Ma ke bâ, na âpavoro iaku ki vora re na ve oto
ma na ve oto ki vora re na asi.
32Inê kê obania vi na hagesuringa iaku
ke mave manga na arito i raboa
ma ke râ hagatê ngavê na taketakena.
33Inê be nganga renia na hagesuringa iaku
manga vigê tamasi poropete,
hanana gê haganahunira na enoni i hemuri me renia.
34Hoita, mu tahetara nga,
vi inê kê pe tagara raha tangê so mareku
ma tangara hete na ani ga gunahia na takoha mataha.
Currently Selected:
SIRAKE 24: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific