SIRAKE 23
23
1Araha, Vaemaku, na mêrihaku ki oga i na ababani i rimamu.
Siana ko tagareniê tangarerua na gaviharaku,
suria ngairerua karu atani ataka mavê.
Siana ko nakarerua karu hagavotariê.
2Ti kani page ramusiê meni na takoha iaku,
hanana vi na takoha mataha ke hagaotoa na aitangihaku?
Vikana inê ki asa be hita râ matena gê tasitasi
ma kê totongo hete renigi na tasi iaterua na gaviharaku.
3Vikana inê ki asa vive ama ni tasitasi nga
se vive ama ni hagarakonigi kê nga na tasi iaku.
Vikana inê ki asa vive votavota i maata na merongaku,
hanana siana ke manavateniê.
4Araha God, Vaemaku, igo ko haganahuniê renia na mêrihaku.
Gu hagatahiê tenia na paroparoha.
5Gu anumasiê tenigi na teniha era.
6Siana na hagatageha ma na vanasiha era karu aharêsiê.
Siana ko tagareniê tangagi na vanasiha era ngegana.
Na tohenga
7Kakare, mu karinga na hagesuringa iaku
renia na tarana koro hanana ga tamasi.
Manga mu arâ suria vikana,
igamu ki asa vigamu tutu igê na tamasinga iami maremi.
8Na gaviharata na enoni tasi ka tura so ngaira mareta.
Na ani ga guhaguha ma ka paroparo ka hagarateta mareta.
9Siana kamu tohetohe tare.
Siana kamu mebare na atana apuna God.
10Na kare vurivuri ga ramusia tare
ki barobaro apaparoroga na apena.
Na enoni i tohetohe tare renia na atana apuna God,
ngaia ki tasi.
11Na enoni i tohetohe tare ki erataga ngavê
ma na hagaitangiha ki oga ma me tanga na ruma iana.
Manga i pe hagamonaria na tohenga iana,
ngaia ki tasi.
Manga i hagamamahasia na tohenga iana,
ngaia ki tasi bâraha.
Manga i tohe vero, na hagaitangiha ki page tarahua
ma na bagabevoani ka page tarahua na ruma iana.
Na tamasinga era
12Ta na tarana igê na tamasinga matena ga tamasi ki manga na mera.
Siana hagetage ki gâga i berarogata na Isiraelita.
Na enoni ga toto suria God
siana hagetage ka bagatauhata vikana.
Siana ka hurihuri igê na tasi ngekana.
13Siana kamu tamasi bera se mu hagatara bera.
Na tarani ngegana ka na tasi.
14Takusirerua na enamu, matena go gâga henira na enoni ni ramoha,
i era ma ka hagatarego ko bekabekaga renigi na tamasinga bera.
Vikana igo ko page hagahunu, vi siana ku vora me
ma ku arangenigo so maremu tanga na mera.
15Manga na tauhana na enoni kani tamasi ki rongo era,
ngaia ki asa hagetage vige page naka vê i keta.
Na rongoeraniha
16Tani na enoni ka ama ni tasitasi nga bâraha
ma ka hagamangaria ngavê na Araha.
Na teniha era ramo ki manga na bagagi raha.
I asa vige hunuia ma ngaia ki makaka marena.
Na enoni i oga tanga ma na rongoeraniha
ngaia ki asa vige kasia vê na tauhana
mataro me na gi ngekana ki ngaua hagamakaka.
17Tanga na mane i oga era vikana
na gete ka na gete.
Ngaia ki asa vige usisi na apena mataro me ki meme.
18Na mane i gamogamo, ngaia ki takotako, ki vivi:
“Ti kani girarê? I roto ikê!
Na apê ka pinihiê. Ngaira ki asa vige bâsiê!
Magu tanga na ta?
Na Araha God ki pe tako renigi na tasi iaku.”
19Ngaia ki magutenigi ma na maata na enoni
ma ki pe takusia hete vi na maana na Araha
karu bâsigi na ara ni tauhata hato na enoni,
henaka viga oga pinihi ngavê.
20Ngaia ki bani giraragi na ara ni marâ hato
hagenago tarana i hagavora na maveta
ma nikâ i murina i hagavora ngaia ki giraragi mênga.
21Na mane ngekana ka page gasuga ni ranguia
ma ka page hagaitangia igê na mahera i maata na enoni.
22I tagenana ma tanga na gete i gamogamo
ma ki apara na karena na mane getea tanga o vaniana.
23Ngaia ki tasi bâraha.
Hagenago ngaia ki aharêngia na ramata iana na Araha God.
Na ruata me: ngaia ki oga erasia o vaniana.
Na oruta me: ngaia ki katoa marena ki êrâ,
suria i gamogamo ma ki apara na karena na mane
i mareha vi o vaniana.
24Na gete vikana ka page hagatamasia
ma na karena ka page mamasiaga renia na bagatauhana.
25Ngaira ka manga na apinige i pe kanu na vagana
ma ka pe hungu na arani.
26Na gete ngekana ki page rongo era tare na atana,
henaka i murina i meme.
Na makiha iana ki asa vige page taruhi kasia.
27I murina i bani magahuru, na enoni ka page tahetara,
vi i mareha rârâ ta na marâ vige teharia na hagahigasiana na Araha,
se ta na marâ vige mamaki ngavê
teharia na marupeani na ramata iana na Araha.
Currently Selected:
SIRAKE 23: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific