SIRAKE 22
22
Na babaganiha ma na bekabekaganiha
1Na enoni babaga ki manga na hê ga hehega igê.
Na enoni ka vonovono erasia renia na makiha iana.
2Na enoni babaga ki manga na ae igê na maniae.
Manga na enoni ma ki hataria, ngaia ki gatage renia.
3Manga na mane ma ki nahunia o karena,
na mane ngekana ki maki, manga vi o karena ma ki gâga sutaga.
Manga vi ka karena ma ki manga ngekana,
ngaia ka hagamakaka tanga.
4Manga ka karena ma ki nahuni takoha,
ngaia ki page auragia na mane i araria.
Ma ki manga ka karena ma ki bagapuruga
ngaia ki hagarugu obana o vaemana.
5Na kere gete i pe tototohesuri,
ngaia ki hagamakirerua o vaniana ma o vaemana
ma ki asa na hitangiterua vige hagahigasia.
6Manga go ramonia na karemu igê na matena i pe arari
ngaia ki manga na kiha barebare igê na matena ni akêkuha.
Ma na ramusiha ni hagaotonga ki hagabângenia tare na takoha mataha.
7Na enoni i hagesuria na ani i bekabekaga,
ngaia ki manga i puruigi haku aporo
na ameameagani na apira na hê,
se i manga i hagaritea na enoni i mêru bore.
8Na ramateniana ta na marâ tanga na ani i bekabekaga
ki manga na ramateniana ta na marâ
tanga na ani i mauruagâga.
Matena go ramatenia hato, ngaia ki vivi:
“Na ta nga go visia ea?”
9Na kare ga tototohesuri
ma ka akê me bâkoro igê na ara ni marâ,
ngaira ka pe hagabângenia vi na enata ka na enoni purua ma.
10Na kare ga pe tototohesuri, ka paroparo
ma ka ruhira na enoni getera.
Ngaira ka hagamakira na apaparaha iata na enoni raha.
11Go angisira nga na ani ga me
suria ga oga igê na mengo.
Go angisira nga na ani ga bekabekaga,
suria na aitangisiha ki pe mavesira rârâ.
Go angisira sisite râ ma na ani ga me, suria ga mamaro,
ma ko angisira bâraha hete na ani ga bekabekaga,
suria na ogaha iata ki erataga ngavê teharia na mera.
12Na angisiana iamu tanga na ani i meme
ki surigi ma na tangiani gi pi.
Ma na angisiana iamu tanga na ani i bekabekaga
se tanga na enoni i pe botage renia God,
ki goga suria na mêrihamu hagenani.
13Siana ko meratamasi bâraha na enoni ga bekabekaga.
Siana ko vatugira ma ko hinarura hete,
i era ma ka hagatarêngenia na bekabekaganiha tangago
ma ki tarahugo nogamu na eraha.
Siana ko hakunira, ma hanana go gâga igê na marapeha.
14Na ta ki higa teharia na poro ni hagakokoro?
Na ta ka na atana na marâ i higa bâraha ngekana?
Ngaia ka na enoni bekabekaga.
15Na one, na solo ma na aiani ka mahaha ni toraha
teharia na ogaha iana na enoni i bekabekaga.
16Na nunu ki asa vige ngingia ke atasi na taketarê na ruma
ga karu tarana ki nganganihaga.
I tagenana ma na enoni i gatagata ngavê na takoha iana
ma ki tâtâ nga igê, henaka vi na ta ki akê me tanga.
17Na enoni i bâbâ maninga hagenago
igê na manitarani igê renigi ta na marâ
ma hemuri ki kahu akê me igê na marâ i takusia,
ngaia ki manga na apê nganganihaga ga hagamahea bâkoro.
18Na kere guani sisite na hê ga oga haku igê ta na marâ
ki asa vige oga gatagata igê, matena i ramoramo na roga.
I tagenana ma na enoni i mamagura
ma ki hagêguritogo renia na takoha bekabekaga.
Ngaia ki asa vige hagagatagata apena so marena pusia na maguha.
Na hemanatangeana
19Manga go husugia na maamu renia ta na marâ,
na maamu ki variangiga.
Manga go erasia ngavê na aitangihana na enoni,
na aitangihana monari ki page vagavaga ma mave.
20Manga go arihatenigi na hê tangara na manu,
igo ko tarigenira vê.
Manga go guharia maharamu,
igo ko erasia na hemanatangeana.
21Manga go amuria akê na tatapa tanga maharamu,
siana ko bagahagêguri,
suria i matora mênga tanga muru hekorokoro aporo.
22Manga go tamasi ramo raha tanga maharamu,
siana ko takotako bâraha,
suria muru girara muru hekorokoro aporo.
Ma ki manga go guharia, se go ruhia,
se manga go tarohenigi na tarani iana
ga ararigo vigu unumigi so,
se manga go ruguhia re ta na marâ,
vikana maharamu ki hatohato ngavê tenigo.
23Go katoa na enoni matareha ki hagêguritogo renigo,
hanana go page vagevagesia na ramana iana.
Go tamania igê na mamasiaganiaha iana,
hanana i page megotongani na ruruguha i page nahunigi.
24Na asêsuna ma na robona na gi
karu arâ me hagenago tarana na vavatana.
Na guhata ka arâ me hagenago tarana na hearihatana.
25Inê ki asa vi ve magu, hanana ve anumasia baharaku.
Inê ki asa vi ve usi ni tamania baharaku,
matena i avarasiê.
26Manga gê mamasiaga suria ngaia,
na ani ga rongoa ka page hinarua.
Na avarasiha ni urapusiana na eraha
27Ti kani page hagaotoa na haraku?
Ti kani page puruirerua na gaviharaku,
hanana vi siana ki aharê na tamasinga iaku
ma na meaku ki asa vige hagarateku?
Currently Selected:
SIRAKE 22: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific