SIRAKE 21
21
Na tasi
1Kakare, igo ko tasi?
Siana ko katoa akê nikâ.
Nungia na bonoteniha ni bani tasi iamu.
2Go hariri tenia na tasi manga vi ngaia ka na ma.
Manga go karikari hagarangia, ngaia ki page garego.
Na rivona ka mangagi na rivona na laione
ma ka ngasingasi hunigo.
3Na ara ni aharêngiani na ramata
ki manga na tatapa borahu i masi heri.
Na maara i katogi ki asa vige page mavo.
4Na têtê paroparoana ma na pe totohesuriana
karu hagamagahurugi na ruruguha
ma ki kahu baguru na ruma iana na enoni paroparo.
5Matena na enoni matareha ka avarasia God,
ngaia ki hatani rongora ma ki aganarigi na avarasiha iata.
6Manga go usisitenigi na hagaotonga
igo ko râ surigi na tauhana na enoni tasi.
Ma ki manga go magutenia na Araha
igo ki urisi parongamu maninga.
7Vari ta na enoni ki rongo raha na atana
suria vi ngaia ki na enoni ni tamasinga
ma na ani i nahuni takoha ki hagakitagi na tamasinga iana.
8Manga go tagarahia na ruma renigi na haga iana ta na enoni,
igo ko rurugi na hê tanga na ririhêana na anonanomu maremu.
9Na enoni ga aharê igê na ramata
ka manga na page na go maria.
Ngaigi ki page makaka igê na gi.
10Na tara ga arâ igê na enoni tasi
ki manamanaga ma ki mave
ma ki râ tanga na agua iata na enoni ga me.
Na enoni ni takoha mataha ma na enoni ni bekabekaniha
11Go aitangisigi na ramata
ma ko kahu girara go marupegi.
Manga go hagahigasia maninga na Araha,
hoi, igo ko nahunia na takoha mataha monari.
12Na enoni i pe nahuni takoha
ngaia ki pe girara vi ge hagesuringenia ta na marâ.
Ma tani na enoni ga nahuni takoha
ka hagaera obata ma na enoni.
13Na aitangisiha iana na enoni ni takoha mataha
ki manga na ve oto i asa vige page mamata,
se manga na ve banga ni hagaotonga koro.
14Na aitangihana na enoni bekabekaga
ki manga na apira i makuru.
Na giraraha ki bara vige oga tonge so igê.
15Manga na enoni i nahuni takoha
ma ki rongoa na tamasinga ni takoha mataha,
ngaia ki ageagesia ma ki hagatongania akê nikâ.
Ma ki manga na enoni i pe nahuni takoha
ma ki rongoa na tamasinga ni takoha mataha,
ngaia ki usisitenia ma ki kasia râ.
16Na tamasinga iana na enoni bekabekaga
ki manga na toraha higa i gaparamu, matena go arâ.
Ma na tamasinga iana na enoni i nahuni takoha
ki hagakoro obamu hete.
17Matena na enoni ka hekarigi,
ngaira ka karinga hahutugia na tamasinga iana na enoni ni takoha
ma ka aganarigi na takoha iana.
18Na takoha iana na enoni bekabekaga
ki manga na ruma i aruhuruhu.
Na giraraha iana kani tamasi takutaku.
19Tanga na enoni bekabekaga
na hagesuringa ki manga na tugihênga
se i manga na rakuha ni rima.
20Na enoni i bekabekaga ki akenakena
ma na enoni ni takoha ki mamanamui.
21Tanga na enoni i nahuni takoha
na hagesuringa ki manga na mahe na golo
se i manga na rabu i otona.
22Na enoni bekabekaga ki arâ tararu banu i ruma.
Ma na enoni i tototohesuri
ngaia ki rêra ma noga i metara.
23Na enoni bekabekaga ki kikirihi banu i ruma
ma na enoni i tototohesuri
ngaia ki rêra ma noga i metara.
24Na enoni i pe tototohesuri
ngaia ki kakaringa banu igê na maani ruma i purupuru.
Ma tanga na enoni ni takoha
ngaia ki na tarana ni makiha.
25Na enoni ga tabotabohara
ka tamasigi na ani mavê na marâ,
henaka na marâ ga pe ararira vige tamasigi.
Ma na enoni ni takoha ki tamasi takotako.
26Na enoni bekabekaga ki matanga na meana
ma na enoni ni takoha ki tamasi takotako.
27Manga na enoni era ma ki arangenia na merongana
ngaia ki arangenia so marena.
28Na enoni ni hagatorainga ki erasia so marena
ma na enoni i pasina ka kikitenia.
Currently Selected:
SIRAKE 21: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific