SIRAKE 20
20
Na matena ta ki ararigo vigo tamasi igê se go munimuni igê
1Go ramonia ma na enoni igê na matena i araria.
Manga i mareha, go munimuni so ma.
Vikana igo ko hagabângenia na aitangisiha.
2Go hagaotoa ma na enoni.
Siana ko mangariaga ngavê tanga.
3Manga go aharê, siana ko hagaiga pusigo,
i era ma ko hagaratemu maremu.
4Manga go rekoa ta na enoni
igo ko manga na mane na vâmavo
i tuguria vi merongo era na kare viru.
5Tani na enoni ka bâ manga ga nahuni takoha mataha,
suria ga pe manitavaragi.
Tani na enoni ka manitavaragi.
Tahema na enoni getera ka usitenira ngavê.
6Tani na enoni ka gâga munimuni,
suria i mareha ta na marâ vige tamasia.
Tani na enoni ka gâga munimuni,
suria ga takusia vi mamênga na matena iata vige tamasi igê.
7Na enoni i nahuni takoha mataha,
ki girara na matena i araria vi tamasi igê.
Ma na ani i pe nahuni takoha ma ki manitavaragi,
ngaia ki pe girara.
8Na enoni ka usitenia ngavê na ani i tamasi bâraha
ma ki parêrahaga re tamasinga.
9Na marâ i korokoro tangago
ki girara i hagavorea na marâ i aera tangago.
Na marâ i aera tangago
ki girara i hagavorea na marâ i korokoro tangago.
10I ta na mateni na mahatanga iamu ki pe tamanigo bê aporo
ma i ta na mateni ngaia ki tamanigo kê nga nikâ.
11Na enoni raha ngaira ka girara ga votavota ma ka maki
ma na enoni purua ngaira ka girara ga akê me.
12I ta na mateni na marâ ga bâhihigaga
ka tunumigo re na haga.
13Na enoni ka obania na ani i tamasi takotako maninga.
Ma na enoni i pe nahuni takoha ki mareha,
henaka i rongorongo mamaki ngavê na tamasinga iana.
14Na mahatanga iana na ani i pe nahuni takoha tangago
ki asa vige tamanigo,
suria ngaia ki obania vigo barua akê nikâ.
15Na mahatanga iana ka pe rako
ma na gegeha iana ka akê me bâraha,
ma ki tarohenigi raha rârâ.
Manga go torea noga ta na marâ tenia i ngekê,
i gomaha ngaia ki obania aporo nga nikâ.
I hega, igo ko pe kitenia vari na enoni i manga ngekana?
16Na enoni i pe nahuni takoha, ki vi:
“Inê ka usiteniê.
Ngaira ka pe visiê koro renigi na hetamaniha iaku tangara.
Na ani gê tamanira ka tamasi erasiê.”
17I monari, na enoni ka tamasi hagaru renia.
18Na tatavaruana ki era teharia na atoberaniha.
Na enoni erataga ka gasuga ni hagarateta mareta
manga na enoni i atobera ki votavota.
19Na enoni i pe haneta tare
ngaia ki tamasi usuusu ma.
Na enoni ga pe nahuni takoha ka katokato vikana tare.
20Manga na enoni bekabekaga ma ki tamasi maramarêrava,
na enoni ka pe pasi rongoa,
suria i mareha vi na matena ge araria vige visia igê.
21Hagarako na matarehana ki hagabarasira na enoni
hanana vige tasitasi.
Tahema na obaerana ki pe erasia na mamaroha iata.
22Tani ka erasira mareta, suria ngaira ka maki purua ma
ma ka magutenigi na tamasinga iata na enoni.
23Manga go surusuru tanga na tamamu,
suria go maki vigu hagaiga,
vikana igo ko katoa purupuru na tamamu ki merongasigo.
24Na hagaparunga ka na tongo igê na tauhana na enoni
ma na enoni ga pe hagatogo surira mareta
ka katokato vikana tare.
25Na enoni hanago ki koro teharia na enoni ni hagaparunga.
Henaka, ma ngairerua hato karu hagarateterua so mareterua.
26Na tauhana na enoni ni hagaparunga ki erataga.
Na makiha ki gâga tare henia.
27Manga go tamasi takotako, igo ko akê me bâkoro.
Na enoni ni ramoha ka ageagesia na enoni ni takoha.
28Manga vi ngaira ma ka obanigo,
ngaira ki asa vige botage renigi na tarani go aharê igê.
Vikana igo ko maratorana nga na enoni
i tagara raha i mu ma ki page nahunigi rako na ngêra.
29Na mahatanga ma na vatevateha ka girara
ga hagagurura na enoni ni takoha mataha nikâ,
hanana ga buhia so na monariha.
Na marâ ngegana ka pagora,
hanana siana ka tamasigi na ramoniha.
30Na takoha mataha i pe vagavaga me mave
ngaia ki manga na ruruguha i pinihi i ano.
Ngairerua tagenaterua karu oga hagâbo.
31Na enoni i pinihia na bekabekaganiha iana,
ngaia ki koro teharia na ani i pinihia na takoha mataha iana.
Currently Selected:
SIRAKE 20: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific